សហជីពឯករាជ្យមួយ អំពាវនាវដល់កម្មករអញ្ជើញទៅបោះឆ្នោតនៅថ្ងៃទី ២៣ កក្កដា ឲ្យបានគ្រប់ៗគ្នា

សម្ព័ន្ធសហជីពជាតិ (NTUC) ដែលអះអាងថា ជាសហជីពឯករាជ្យមួយ បានអំពាវនាវដល់កម្មករ-និ​យោជិតទាំងអស់ អញ្ជើញទៅបោះឆ្នោតជ្រើសតាំង តំណាងរាស្រ្ដ នីតិកាលទី ៧ ឲ្យបានគ្រប់ៗគ្នា ហើយនិងគូសលើសន្លឹកឆ្នោតឲ្យបានត្រឹមត្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ្វា សាលី ប្រធានសម្ព័ន្ធសហជីពជាតិ (NTUC) មានប្រសាសន៍ប្រាប់កម្ពុជាថ្មីថា សន្លឹកឆ្នោតរបស់កម្មករ-និយោជិតមួយសន្លឹកៗ គឺពិតជាមានតម្លៃបំផុត ក្នុងការពង្រឹងលទ្ធិប្រជាធិបតេយ្យ ប្រព័ន្ធយុត្តិធម៌ នីតិរដ្ឋ និងយន្តការចរចាដំឡើងប្រាក់ឈ្នួល សម្រាប់កម្មករ-និយោជិតនៅឆ្នាំ ២០២៤ខាងមុខ។

លោកបន្ថែមថា «យើងចង់ឲ្យបងប្អូនកម្មករ-កម្មការនី ក៏ដូចជាសមាជិក-សមាជិកា និងបងប្អូនប្រជាពលរដ្ឋទាំងអស់ អញ្ជើញទៅចូលរួមបោះឆ្នោតឲ្យបានគ្រប់ៗគ្នា ចៀសវាងជឿតាមពាក្យចចាមអារាម ពាក្យឃោសនាបំប៉ោង បំភ្លៃ ដែលធ្វើឲ្យការបោះឆ្នោតយើង ក៏ដូចជាធ្វើឲ្យបងប្អូនយើងមានការយល់ច្រឡំ គូសខ្វែង ២,៣ គណបក្សអីចឹង»។

លោក ហ្វា សាលី បានបន្តថា អ្វីដែលជាការចង់របស់សហជីពរបស់លោក ដែលជាសហជីពឯករាជ្យ គឺចង់ឲ្យកម្មករ-នយោជិត និងប្រជាពលរដ្ឋខ្មែរ ដែលមានឈ្មោះក្នុងបញ្ជីបោះឆ្នោត អញ្ជើញទៅបោះឆ្នោតទាំងអស់គ្នា ហើយគូសលើសន្លឹកឆ្នោតឲ្យបានត្រឹមត្រូវ។

ប្រធានសហជីពរូបនេះ​ លើកឡើងថា «ក្នុងនាមយើងជាប្រជាពលរដ្ឋ យើងត្រូវតែបំពេញនូវកាតព្វកិច្ចរបស់ពួកយើង ជាសិទ្ធិ ជាឆន្ទៈរបស់ពួកយើង ក្នុងការទៅបោះឆ្នោតឲ្យបានគ្រប់ៗគ្នា ដើម្បីឲ្យប្រទេសកម្ពុជា មានមុខមានមាត់នៅក្នុងឆាកអន្តរជាតិ»។

ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នឹងប្រព្រឹត្តទៅនៅថ្ងៃអាទិត្យទី ២៣ ខែកក្កដា ឆ្នាំ ២០២៣ខាងមុខ។ ការបោះឆ្នោតនេះ មានគណបក្សនយោបាយចំនួន ១៨ នឹងចូលរួមប្រកួតប្រជែងស្វែងការគាំទ្រពីប្រជាពលរដ្ឋម្ចាស់ឆ្នោត។ ប្រជាពលរដ្ឋ សិស្ស និស្សិត អាជីវករ និងកម្មករ-និយោ​ជិត ដែលមានឈ្មោះក្នុងបញ្ជីបោះឆ្នោត បាននិងកំពុងត្រៀមខ្លួនចេញទៅបោះឆ្នោតគ្រប់ៗគ្នា នៅចុងសប្ដាហ៍នេះ៕