ព័ត៌មានជាតិ

ដីព្រៃលិចទឹកជាង៣០ ហិកតានៅក្នុងឃុំច្រណូកត្រូវបានគេលួចឈូសឆាយនៅពេលយប់ទន្ទ្រានយកជាកម្មសិទ្ធិ

បានផុស

៥ years មុន

នៅ

ថ្ងៃចន្ទ ១ កុម្ភៈ ២០២១

ដោយ

ប្រជាពលរដ្ឋរស់នៅឃុំច្រណូក ស្រុកកំពង់លែងខេត្តកំពង់ឆ្នាំងនៅព្រឹកថ្ងៃទី ៣១ ខែ មករា ឆ្នាំ២០២១ បានឲ្យដឹងថាដីព្រៃលិចទឹកតំបន់៣របស់សហគមន៍ នៅចំណុចច្រាំងចោតក្នុងឃុំច្រណូក ដែលការពារ ដោយជលផលត្រូវបានជនខិលខូចយកត្រាក់ទ័រចំនួន ៦គ្រឿងលួចឈូសឆាយនៅពេលយប់ជាងកន្លះខែមកហើយ ដែលដែលក្រោយពេលបែកការណ៍នៅយប់ថ្ងៃទី ៣០ ខែមករានេះតែប៉ុណ្ណោះ។ មកដល់ពេលនេះគេបានឈូសឆាយអស់ជាង ៣០ហិកតាហើយ ដោយពុំឃើញមានសមត្ថកិច្ចទប់ស្កាត់ឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពនេះគេសង្ស័យថា ជាការឃុបឃិតបំផ្លាញព្រៃលិចទឹករបស់រដ្ឋ ដែលថ្នាក់លើគួរតែទប់ស្កាត់និងបង្ក្រាបឱ្យមានប្រសិទ្ធភាព។ប្រជាពលរដ្ឋបានបញ្ជាក់ឲ្យដឹងទៀតថាព្រៃលិចទឹកនៅតំបន់នេះមានជាង ១០០ហិកតា ដែលពីមុនមានរោងសមត្ថកិច្ចជលផលមួយនៅក្បែរនេះ ស្នាក់នៅប្រចាំការការពារ និងនៅក្នុងឆ្នាំ ២០១៩ សមត្ថកិច្ចចម្រុះក៏ធ្លាប់ចុះបង្ក្រាបចាប់យកត្រាក់ទ័រមួយចំនួនដែលឈូសឆាយចំណុចនេះបញ្ជូនទៅតុលាការផងដែរ។ប៉ុន្តែផ្ទុយទៅវិញនៅដើមឆ្នាំ ២០២១នេះបែរជាមានគេចូលមកលួចឈូសថាយកយ៉ាងរលូនទៅវិញ។ ដូចនេះប្រជាពល រដ្ឋស្នើសុំសមត្ថកិច្ចពាក់ព័ន្ធជួយទប់ស្កាត់ និងបង្ក្រាបការពារព្រៃ លិចទឹកឲ្យបានគង់វង្ស កុំឲ្យជនដទៃទៀតយកតម្រាប់តាម។

ទាក់ទងនឹងករណីនេះ លោក ឈុំ ឈៀង មេឃុំច្រណូកបានឆ្លើយតាមទូរសព្ទប្រាប់ក្រុមអ្នកសារព័ត៌ មានយើងថា ដីនៅចំណុចនេះ មានម្ចាស់អស់ទៅហើយ និងទើបតែខានធ្វើស្រែ៣ឆ្នាំប៉ុណ្ណោះ ហេតុអី្វក៏ឈូសធ្វើស្រែមិនបាន។ចំណែកប្រជាពលរដ្ឋម្នាក់ឈ្មោះផលបានឆ្លើយប្រាប់តាមទូរស័ព្ទថាពីមុនមកដីនៅចំណុចនេះជាដីរបស់គាត់បានកាប់ ៦ឆ្នាំមកហើយមានទំហំ ៣,៤ ហិកតា ប៉ុន្តែក្រោយមកត្រូវបានសមត្ថកិច្ចហាមឃាត់ទើបក្នុងពេលថ្មីៗនេះគាត់លក់ថោកៗទៅឱ្យគេ។

ដោយឡែកប្រជាពលរដ្ឋម្នាក់ទៀតបានលួចបង្ហើបឲ្យដឹងថា ដីនេះម្ចាស់ក្រោយបីបួននាក់បានលួចរត់ការស្ងាត់ៗតាំងពីថ្នាក់ក្រោមរហូតថ្នាក់លើយ៉ាងរលូនរួចអស់ហើយ ទើបគេហ៊ានឈូសឆាយទន្ទ្រានយកជាកម្មសិទ្ធិបែបនេះ។

ជុំវិញករណីនេះលោក លី ឡា នាយខណ្ឌរដ្ឋបាលជលផលកំពង់ឆ្នាំងនៅល្ងាចថ្ងៃទី៣១ ខែ មករានេះ បានឆ្លើយតាមទូរស័ព្ទបញ្ជាក់ឲ្យដឹងថា ករណីលួចឈូសឆាយទន្ទ្រានយកដីព្រៃលិចទឹកនៅចំណុចខាងលើនេះ សមត្ថកិច្ចជលផលគឺលោក ងី មន្ត្រីជលផលស្រុកកំពង់លែង បានចុះកសាងសំណុំ រឿងបញ្ជូនទៅតុលាការរួចហើយ។ដូច្នេះដីព្រៃលិចទឹកនៅចំណុចនេះគឺសមត្ថកិច្ចជំនាញ មិនអនុញ្ញាតអោយជនណាម្នាក់យកជាកម្មសិទ្ធិបានឡើយ។ ប៉ុន្តែកន្លងមកលោកមេឃុំច្រណូកចេះតែហ៊ានស៊ីញ៉េលក់ទិញ ដូច្នេះរឿងនេះគាត់ត្រូវប្រឈមមុខជាមួយផ្លូវច្បាប់៕

ឈៀង ថារិទ្ធ