នាយករដ្ឋមន្ត្រី ៖ ការបន្តដំឡើងប្រាក់ឈ្នួលកម្មករ ជាគោលនយោបាយរបស់រាជរដ្ឋាភិបាល

ការបន្តដំឡើងប្រាក់ឈ្នួលដល់កម្មករ-និយោជិត នៅក្នុងវិស័យកាត់ដេរសំលៀកបំពាក់ គឺជាគោលនយោបាយរបស់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ហើយការដំឡើងត្រូវធ្វើឡើងជាជំហានៗ។ នេះជាការបញ្ជាក់របស់ឯកឧត្ដមបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា។

ការបញ្ជាក់នេះ បានធ្វើឡើងក្នុងពិធីជួបសំណេះសំណាលជាមួយកម្មករ-និយោជិត តាមរោងចក្រ សហគ្រាសចំនួន ១៨.០០០នាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី ២៩ ខែសីហា ឆ្នាំ ២០២៣នេះ។

ឯកឧត្ដមបណ្ឌិត ហ៊ុន ម៉ាណែត បានរំលឹកថា កាលពីឆ្នាំ ១៩៩៧ ប្រាក់ឈ្នួលរបស់កម្មករ-និយោជិត មានត្រឹមតែ ៤០ ដុល្លារប៉ុណ្ណោះ ហើយអត្ថប្រយោជន៍ផ្សេងៗស្ទើរតែគ្មានថែមទៀត។ ប៉ុន្តែគិតត្រឹមឆ្នាំ ២០២៣នេះ កម្មករ-និយោជិត មានប្រាក់ឈ្នួលគោលចំនួន ២០០ដុល្លារ ដោយមិនទាន់បូកនឹងអត្ថប្រយោជន៍ផ្សេងៗផង។

ឯកឧត្ដមបណ្ឌិត ហ៊ុន ម៉ាណែត បានថ្លែងបន្តថា «ហើយឥឡូវឆ្នាំនេះ យើងកំពុងតែចរចាការដំឡើងបៀរវត្សអប្បបរមាទៀត ឆ្នាំ ២០២៤ យើងចាប់ផ្ដើមតាំងពីខែ ៧ ចរចា ឥឡូវកំពុងតែចរចាបន្ថែមទៀត ហើយវាជាគោលនយោបាយរបស់រដ្ឋាភិបាល ដែលដឹកនាំត្រឹមនៅបន្តបង្កើន បងប្អូនគិតថា អត់ទាន់គ្រប់ ត្រូវហើយ រដ្ឋាភិបាលទទួលស្គាល់ ហេតុហ្នឹងហើយបានជាយើងខិតខំដំឡើងជាបណ្ដើរៗ ប៉ុន្តែយើងត្រូវធ្វើយ៉ាងណា ជាជំហានដើម្បីឲ្យភាពប្រកួតប្រជែង និងរក្សាភាពប្រកួតប្រជែងរបស់យើង និងរក្សាកំណើនរបស់យើង ជាពិសេសនៅក្នុងវិស័យនេះតែម្ដង»៕