រដ្ឋបាលក្រុងប៉ោយប៉ែតចាត់វិធានការក្តៅរុះរើ សំណង់តូបលក់ដូរលើចំណីផ្លូវសាធារណៈ

រដ្ឋបាលក្រុងប៉ោយប៉ែតនៅព្រឹកថ្ងៃទី ២៩ ខែសីហា ឆ្នាំ ២០២៣នេះបានប្រើវិធានការក្តៅដោយក្រុមការងារចម្រុះរួមមាននគរបាល កម្លាំងអាវុធហត្ថ ប្រជាការពារភូមិទាំងបីសង្កាត់របស់រដ្ឋបាលក្រុងដឹកនាំដោយព្រះរាជអាជ្ញារងអមសាលាដំបូងខេត្តលោក បោន សិលា អភិបាលរងក្រុងប៉ោយប៉ែតបានចុះធ្វើការរុះរើ និងកាត់សំយាបដែលអាជីវករក្រុមហ៊ុនពលរដ្ឋ​សង់រំលោភលើចំណីផ្លូវសាធារណៈទូទាំងក្រុងប៉ោយប៉ែតតែចាប់ផ្តើមពីចំនុចរង្វងមូលមុខច្រកអន្តរជាតិប៉ោយប៉ែតមកភ្លើងស្តុបផ្សារកណ្តាល។

ការចុះរុះរើជាក់ស្តែងនេះធ្វើឡើងបន្ទាប់ពីរដ្ឋបាលក្រុងប៉ោយប៉ែតបានជូនដំណឹងរួចម្តងហើយកាលពីថ្ងៃទី ២២ ​ខែឧសភា ឆ្នាំ ២០២៣ស្តីពីការរៀបចំសណ្តាប់ធ្នាប់ និងកាត់សំយ៉ាបដែលសហគ្រាសក្រុមហ៊ុនពាណិជ្ជករប្រជាពលរដ្ឋសាងសង់ និងលក់ ដូររំលោភលើដីចំណីផ្លូវសាធារណៈក្នុងទីប្រជុំជនក្រុងប៉ោយប៉ែតជាពិសេសនៅតាមបណ្ដោយផ្លូវជាតិលេខ៥ ដែលមានការរំលោភកាន់កាប់ចូលចំណីផ្លូវសាធារណៈឱ្យរុះរើដោយស្ម័គ្រចិត្តឱ្យបានមុនថ្ងៃទី ២៩ ខែសីហា ឆ្នាំ២០២៣​ប៉ុន្តែបងប្អូនប្រជាពលរដ្ឋមិនចូលរួមអនុវត្តតាមការជូនដំណឹងរបស់រដ្ឋបាលក្រុងឡើយ។

តាមការជាក់ស្តែងក្រុមការងារបានរុះរើផ្សាយកាត់ផ្តាច់នៅតូបលក់ដូរ ប៉ាណូពាណិជ្ជកម្មផ្សេងៗសំយ៉ាបផ្ទះ ផូផ្កាដែលបានសងនិងដាក់លើដីចំណីផ្លូវក្នុងចន្លោះ៥ម៉ែត្រតាមគំនូសបាញ់ថ្នាំដែលរដ្ឋបាលក្រុងបានកំណត់រួចបានជាច្រើន។

ជាមួយនិងវិធានការរុះរើរបស់រដ្ឋបាលក្រុងនេះប្រជាពលរដ្ឋមួយចំនួនដែលរងការរុះរើនឹងត្រូវរុះរើមិនមានការប្រឆាំងអ្វីឡើយថែមទាំងរីករាយជាមួយវិធានការនេះដែលធ្វើដោយស្មើភាពហើយមានរបៀបរៀបរយសណ្តាប់ធ្នាប់ល្អ។ចំពោះមូលហេតុដែលពួកគាត់មិនបានរើតាមការកំណត់ដោយខ្លះរកជាងមករើពុំបានខ្លះទៀតចាំមើលក្រែងក្រុងបានតែនិយាយ។

ចំពោះការកាត់សំយាប រុះរើ គឺ៖

– តាមផ្លូវជាតិលេខ៥ សងខាងផ្លូវ ពីចិញ្ចឹមផ្លូវ ៥ម៉ែត្រ យ៉ាងតិច

– តាមផ្លូវក្នុងទីប្រជុំជន សងខាងផ្លូវ ពីចិញ្ចឹមផ្លូវ ៣ម៉ែត្រ ទៅ៥ម៉ែត្រ យ៉ាងតិច។

លោក គាត ហ៊ុល អភិបាលក្រុងប៉ោយប៉ែត បានឱ្យដឹងកាលពីកន្លងថា រដ្ឋបាលក្រុងបានខិតខំណាស់លើការរៀបចំសណ្តាប់ធ្នាប់ឱ្យមានសោភ័ណភាពសមជាទីក្រុង និងសមជាក្រុងនៃមុខមាត់ប្រទេសដែលមានច្រកអន្តរជាតិប៉ោយប៉ែតដ៍សំខាន់សម្រាបភ្ញៀវទេសចរណ៍ចេញចូលកម្ពុជា។

ក្នុងនោះក្រុងបានរៀបចំអោយមានរង្វងមូលដ៍ស្រសស្អាត ផ្លូវថ្មើជើងពីមាត់ច្រកអន្តរជាតិមកដល់សួន ប៉ោយប៉ែតតេជោឈ្នះឈ្នះ ,ដាក់បង្គោលភ្លើងសងខាងផ្លូវ ,ចាក់ផ្លូវបេតុងនិងដាក់ប្រព័ន្ធលូរំដោះទឹក។

លោកសង្ឃឹមថាបន្ទាប់ពីសមត្ថកិច្ចចុះរុះរើហើយបងប្អូនប្រជាពលរដ្ឋនិងចូលរួមអនុវត្តតាមការជូនដំណឹងរបស់រដ្ឋបាលក្រុងដោយមិនលក់ដូរឬសាងសងអ្វីលើដីចំណីផ្លូវទៀតឡើយ។ ដើម្បីឲ្យរដ្ឋបាលក្រុងរៀបចំជាផ្លូវថ្មើរជើង និងរៀបចំដាក់បង្គោលភ្លើងបំភ្លឺផ្លូវបន្ថែមទៀតឲ្យកាន់តែមានសណ្តាប់ធ្នាប់ និងសោភ័ណភាពល្អប្រសើរក្នុងទីក្រុងយើងទាំងអស់គ្នា៕

អត្ថបទ៖ អពៅ