ទឹកទន្លេមេគង្គកើនឡើង ៣ ថ្ងៃជាប់គ្នា ខណៈកម្ពុជាហៀបនឹងទទួលរងនូវឥទ្ធិពលព្យុះឈ្មោះ «សាវឡា»

កម្ពស់ទឹកទន្លេមេគង្គបានកើនឡើង​ ៣ ថ្ងៃជាប់ៗគ្នា នាប៉ុន្មានថ្ងៃកន្លងមកនេះ ខណៈកម្ពុជាកំ​ពុង​ទទួល​រងនូវឥទ្ធិពលប្រព័ន្ធសម្ពាធទាប ដែលអូសបន្លាយលើភាគខាងជើងនៃប្រទេសថៃ ឡាវ និង​វៀតណាម ហើយព្យុះទីហ្វុងឈ្មោះ «សាវឡា» ដែលនឹងចូលមកដល់ភាគ​អាគ្នេយ៍ប្រទេស​ចិន​នៅ​ថ្ងៃទី ២ ខែកញ្ញានេះ។

យោងតាមការព្យាការណ៍កម្ពស់ទឹក របស់ក្រសួងធនធានទឹក និងឧតុនិយម ចេញផ្សាយនៅថ្ងៃទី ០១ ខែកញ្ញា ឆ្នាំ ២០២៣ នេះថា ស្ថានីយជលសាស្ត្រទន្លេមេគង្គ-ស្ទឹងត្រែង ទឹកមានកម្ពស់ ៧,៣៤ ម៉ែត្រ កើនឡើង ០,៥០ ម៉ែត្រ បើប្រៀបនឹងថ្ងៃម្សិលមិញ។ ទន្លេមេគង្គ-ក្រចេះ កម្ពស់ ១៦,៣៩ ម៉ែត្រ ទន្លេមេគង្គ-កំពង់ចាម កម្ពស់ ៩,៩០ ម៉ែត្រ ស្ថានីយជលសាស្ត្រទន្លេបាសាក់-ចតុមុខ ៦,០៥ ម៉ែត្រ។

លោក ចាន់ យុត្ថា រដ្ឋលេខាធិការ ក្រសួងធនធានទឹក និងឧតុនិយមបានប្រាប់កម្ពុជាថ្មីថា កម្ពស់ទឹកមិនទាន់មានការកើនឡើងខ្លាំងនោះទេ ប៉ុន្តែមានភ្លៀងធ្លាក់រាយប៉ាយនៅតាមបណ្ដាស្ថានីយនៅប្រទេសថៃ និងប្រទេសឡាវ។

ដោយឡែក ទឹកទន្លេមេគង្គនៅក្នុងប្រទេសកម្ពុជា ទឹកនៅមានកម្រិតទាបនៅឡើយ បន្ទាប់ពីបានស្រកចុះប្រមាណ ៣ សប្ដាហ៍កន្លងមកនេះ។

លោកថា ប្រសិនបើទឹកឡើង ក៏ឡើងតិចតូចនោះដែរ ខណៈទឹកទន្លេតាមបណ្ដាស្ថានីយ៍ផ្សេងៗមិនមានការប្រែប្រួលខ្លាំងនោះដែរ។

ជាមួយគ្នានេះក្រសួងធនធានទឹក និងឧតុនិយមបានបញ្ជាក់ថា ចាប់ពីថ្ងៃទី ០១ ដល់ថ្ងៃទី ០៤ ខែកញ្ញា ឆ្នាំ ២០២៣នៅតំបន់មាត់សមុទ្រ នឹងអាចមានភ្លៀងធ្លាក់ជាប់ជាបន្តបន្ទាប់ពីបង្គួរទៅច្រើន លាយឡំដោយផ្គរ រន្ទះ និងខ្យល់កន្តា្រក់ នៅលើផ្ទៃសមុទ្រ មានភ្លៀង និងខ្យល់បក់បោករលកខ្ពស់ៗ ដែលក្រសួងប្រាប់ឱ្យសាធារណៈជនប្រុងប្រយ័ត្ន៕

អត្ថបទ៖ ឡេង ដេត