សម្ដេច ហ៊ុន ម៉ាណែត និងប្រធានាធិបតីហ្វីលីពីន គ្រោងផ្លាស់ប្ដូរទស្សនកិច្ចផ្លូវការពេលសមស្រប

ក្នុងជំនួបសម្តែងការគួរសម នៅទីក្រុងហ្សាការតា នាថ្ងៃទី៧ ខែកញ្ញានេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក ហ្វឺឌីណាន់ ម៉ាកូស ប្រធានាធិបតីហ្វីលីពីន គ្រោងផ្លាស់ប្ដូរដំណើរទស្សនកិច្ចផ្លូវការពេលសមស្របណាមួយ។

ក្នុងជំនួបនេះ សម្តេចធិបតី ហ៊ុន ម៉ាណែត បានសម្តែងនូវការស្វាគមន៍ដ៏កក់ក្តៅចំពោះលោក ហ្វឺឌីណាន់ ម៉ាកូស និងបានថ្លែងអំណរគុណជូនចំពោះប្រជាជន និងប្រទេសហ្វីលីពីន ដែលបានគាំទ្រកម្ពុជាក្នុងការបំពេញកាតព្វកិច្ចជាប្រធានអាស៊ាននៅឆ្នាំ ២០២២ និងចំពោះការចូលរួមរបស់កីឡាករហ្វីលីពីននៅក្នុងការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ កន្លងមក។

ឆ្លើយតបចំពោះការស្វាគមន៍នេះ លោកប្រធានាធិបតីហ្វីលីពីន បានសម្តែងការអបអរសាទរចំពោះសម្តេចធិបតី ហ៊ុន ម៉ាណែត ដែលត្រូវបានជ្រើសតាំងជានាយករដ្ឋមន្រ្តី នៃរាជរដ្ឋាភិបាលកម្ពុជា នីតិកាលទី៧។ ជាមួយគ្នានេះ លោកប្រធានាធិបតី ក៏បានផ្តាំផ្ញើនូវការអរគុណផងដែរជូនចំពោះសម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ ដែលកន្លងមកតែងនាំមកនូវគំនិតផ្តួចផ្តើម ទិសដៅនយោបាយ និងគោលការណ៍នយោបាយ សម្រាប់អនុវត្តន៍នៅក្នុងក្របខណ្ឌអាស៊ាន នាពេលសម្តេចតេជោ នៅជានាយករដ្ឋមន្រ្តីកម្ពុជា។

ក្នុងឱកាសនោះដែរ ថ្នាក់ដឹកនាំទាំងពីរ បានពិភាក្សាទៅលើវិស័យជាច្រើន ដែលមានសក្តានុពលសម្រាប់ជាកម្មវត្ថុនៃការពង្រឹង និងពង្រីកសហប្រតិបត្តិការបន្ថែមរវាងកម្ពុជា និងហ្វីលីពីន ដើម្បីជាឧត្តមប្រយោជន៍នៃប្រជាជាតិទាំងពីរ។ វិស័យដែលមានសក្តានុពលទាំងនោះ រួមមាន៖ ពាណិជ្ជកម្ម ការអភិវឌ្ឍវិស័យឯកជន ទេសចរណ៍ អប់រំ បណ្តុះបណ្តាល សន្តិសុខ ការពារជាតិ និងការតភ្ជាប់លើគ្រប់រូបភាពរវាងប្រទេសទាំងពីរ។

ថ្នាក់ដឹកនាំទាំងពីរ បានបង្ហាញនូវទឹកចិត្តសោមនស្សចំពោះឱកាសផ្លាស់ប្តូរយោបល់ទៅវិញទៅមកក្នុងក្របខណ្ឌទ្វេភាគីនេះ ដែលជាយន្តការនៃកិច្ចសហប្រតិបត្តិការបន្ថែមលើយន្តការពហុភាគីនៃក្របខណ្ឌអាស៊ាន ។ ថ្នាក់ដឹកនាំទាំងពីរ បានគោរពអញ្ជើញគ្នាទៅវិញទៅមក ដើម្បីបំពេញទស្សនកិច្ចផ្លូវការ ក្នុងពេលសមស្របណាមួយ នាពេលអនាគតផងដែរ៕