សិក្ខាសាលាពិគ្រោះយោបល់ កម្មវិធីសិក្សាមុខវិជ្ជាការបង្កាត់ពូជ បច្ចេកទេសចិញ្ចឹមវារីសត្វ

បណ្ឌិត អុឹម កុច រដ្ឋលេខាធិការ នៃក្រសួងអប់រំ យុវជន និងកីឡា តំណាង បណ្ឌិតសភាចារ្យ ហង់ជួន ណារ៉ុន ឧបនាយកដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញចូលរួមជាអធិបតីភាព ក្នុងការរៀបចំសិក្ខាសាលាពិគ្រោះយោបល់ កម្មវិធីសិក្សាមុខវិជ្ជាការបង្កាត់ពូជ បច្ចេកទេសចិញ្ចឹមវារីសត្វ និងមុខវិជ្ជាកែច្នៃផលិតផលវារីសត្វ។

នេះបើតាមការផ្ដល់ព័ត៌មាន ដោយក្រសួងអប់រំ យុវជន និងកីឡា នៅរសៀលថ្ងៃនេះ។ សិក្ខាសាលាពិគ្រោះយោបល់នេះ ប្រារព្ធ ថ្ងៃទី១២ ខែកញ្ញា ឆ្នាំ២០២៣នេះ នៅមជ្ឈមណ្ឌលអប់រំបច្ចេកទេស មិត្តភាព កម្ពុជា-ជប៉ុន ខេត្តសៀមរាប នៃក្រសួងអប់រំ យុវជន និងកីឡា។

សិក្ខាសាលានេះមានការគាំទ្រពី ទីភ្នាក់ងារអភិវឌ្ឍន៍សាធារណរដ្ឋឆែក តាមរយៈ​អង្គការ People in need ក្នុង​គម្រោងការ​បញ្ជ្រាបវារីវប្បកម្មក្នុងវិស័យអប់រំបច្ចេកទេស នៅមធ្យមសិក្សា ក្នុងគោលបំណងទទួលបានធាតុចូលពីអ្នកមានបទពិសោធន៍ពាក់ព័ន្ធ មានតំណាងគ្រឹះស្ថានឧត្តមសិក្សា វិស័យឯកជន ដើម្បីរៀប​ចំកម្មវិធី​សិក្សាថ្មី អាចឆ្លើយតប​នឹងតម្រូវការអ្នកសិក្សា និងតម្រូវការទីផ្សារ ការងារសហគ្រិនភាព និងផលិតភាព នៅតាមវិទ្យាល័យចំណេះទូទៅ និងបច្ចេកទេស ដើម្បីលើកកម្ពស់គុណភាពនៃការអប់រំបច្ចេកទេស និងវិជ្ជាជីវៈ និងរួមចំណែកក្នុងការឆ្លើយតបជាមួយចក្ខុវិស័យឆ្នាំ២០៣០ និងឆ្នាំ២០៥០ របស់កម្ពុជា។

វគ្គសិក្ខាសាលានេះ មានការចូលរួមពីគ្រូបង្រៀន នាយកវិទ្យាល័យបច្ចេកទេស វិទ្យាស្ថានបច្ចេកវិទ្យាកម្ពុជា វិទ្យាស្ថាន​កំពង់ស្ពឺ វិទ្យាស្ថានបច្ចេកវិទ្យាកំពង់ឈើទាល​សាលាជាតិ​កសិកម្ម​ព្រែកលៀប សាកលវិទ្យាល័យភូមិន្ទកសិកម្ម រដ្ឋបាលជលផល សហគ្រាសឯកជន កសិដ្ឋានចិញ្ចឹមសត្វទឹក សរុប ៤៦នាក់៕