ក្រសួងកិច្ចការនារី ផ្សព្វផ្សាយពីផលប៉ះពាល់នៃអំពើហិង្សា និងគ្រឿងស្រវឹងដល់សិស្សខេត្តបាត់ដំបង

ក្រសួងកិច្ចការនារី បានរៀបចំវេទិកានារីរតនៈស្តីពី “យុវជនរួមគ្នាកាត់បន្ថយអំពើហិង្សា” ដល់ពលរដ្ឋដែលរស់​នៅខេត្តបាត់ដំបងរយៈពេល ៣ ថ្ងៃ នៅវិទ្យាល័យគោលដៅចំនួន៣ សរុបមានសិស្សានុសិស្សចូលរួម ៤៥៩នាក់ ស្រី ៣០៦នាក់។

យោងតាមការផ្សព្វផ្សាយតាមរយៈទំព័រហ្វេសប៊ុករបស់ក្រសួងកិច្ចការនារី នៅថ្ងៃទី២៣ ខែកញ្ញា បានបញ្ជាក់ថា វេទិកានេះ រៀបចំឡើងក្នុងគោលបំណង៖ “ផ្សព្វផ្សាយដល់ប្រជាពលរដ្ឋ ជាពិសេសយុវវ័យឲ្យបានយល់ដឹងពីឫសគល់ និងផលប៉ះពាល់អំពើហិង្សា ការសេពគ្រឿងស្រវឹង បីជំហ៊ានក្នុងការដោះស្រាយអារម្មណ៍ពិបាកៗ ធ្វើដូចម្តេច​ដើម្បីឱ្យគ្រួសារមានសុភមង្គល និងលើកទឹកចិត្តដល់យុវវ័យ ក្នុងការចូលរួមទប់ស្កាត់ និងកាត់បន្ថយ​អំពើហិង្សា”។

ចំពោះវិទ្យាល័យគោលដៅចំនួន៣ មានដូចជា វិទ្យាល័យ នេតយ៉ង់ វិទ្យាល័យ សង្កែ និងវិទ្យាល័យ មោងឫស្សី ដែលស្ថិតក្នុ្ងងបាត់ដំបង និងមានរយៈពេល៣ថ្ងៃ ចាប់ពីថ្ងៃទី២០ ដល់ថ្ងៃទី២២ ខែកញ្ញា កន្លងទៅ។ ជាមួយគ្នានេះ មានការចូលរួមពីលោកស្រី ប៊ុន ពុទ្ធី រដ្ឋលេខាធិការ នៃក្រសួងកិច្ចការនារី ភាគីពាក់ព័ន្ធផ្សេងទៀត និងសិស្សានុសិស្សចូលរួម សរុបចំនួន៤៥៩នាក់។

សូមជម្រាបថា នារីរតនៈ មានន័យថា នារីគឺជារតនៈសម្បត្តិដែលជាត្បូងពេជ្រដ៏មានតម្លៃ។ រាជរដ្ឋាភិបាលកម្ពុជា មានគោលដៅលើកស្ទួយស្ថានភាពស្រ្តីខ្មែរ ឲ្យរួចផុតពីភាពងាយរងគ្រោះឈានឆ្ពោះទៅរកភាពថ្កុំថ្កើនរុងរឿង ថ្លៃថ្នូរសម្បូរសប្បាយ តាមរយៈធ្វើការផ្លាស់ប្តូរឥរិយាបទអវិជ្ជមានរបស់សង្គម ដែលមិនសូវលើកតម្កើនស្ត្រីដូចបុរស៕