សម្តេច ហ៊ុន ម៉ាណែត អំពាវនាវកុំឱ្យម្ចាស់ផ្ទះជួលដំឡើងថ្លៃផ្ទះជួល

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវដល់ម្ចាស់ផ្ទះជួលកុំដំឡើងថ្លៃផ្ទះជួល។ សម្ដេចនាយករដ្ឋមន្ត្រីកម្ពុជា បានអំពាវនាវបែបនេះ នៅលើគណនីហ្វេសប៊ុកផ្ទាល់ខ្លួននាល្ងាចថ្ងៃទី២៨ ខែកញ្ញានេះ  ដើម្បីជាការរក្សាប្រភពចំណូលម្ចាស់ផ្ទះជួលផង និងដើម្បីជួយកម្មករ និយោជិតផង។

 ក្រោយកម្មករ និយោជិតទទួលបាននូវប្រាក់ឈ្នួលអប្បបរមាថ្មីសម្រាប់ឆ្នាំ២០២៤ គឺ២០៤ដុល្លារអាមេរិក ក្នុង ១ខែ សម្ដេច ហ៊ុន ម៉ាណែត បានស្នើទៅកាន់ម្ចាស់ផ្ទះជួល ក្នុងខ្លឹមសារដើមថា “ខ្ញុំសូមអំពាវនាវដល់ម្ចាស់ផ្ទះជួលទាំងអស់ សូមរក្សាថ្លៃជួលដើម្បីរក្សានូវប្រភពចំណូលរបស់ខ្លួនឯងផង ជួយដល់បងប្អូនកម្មករនិយោជិតផង និងជួយរួមចំណែកដល់ការអនុវត្តច្បាប់ស្តីពីភិតិសន្យាពិសេសដែលនៅជាធរមានផង”។

សម្ដេច ហ៊ុន ម៉ាណែត ក៏សូមអបអរសាទរជាមួយ កម្មករនិយោជិតវិស័យកាត់ដេរ សម្លៀកបំពាក់ ស្បែកជើង និងផលិតផលធ្វើដំណើរដែលទទួលបាននូវប្រាក់ឈ្នួលអប្បបរមាថ្មីសម្រាប់ឆ្នាំ២០២៤ គឺ២០៤ដុល្លារអាមេរិក ក្នុង ១ខែ។

ជាមួយគ្នានេះ សម្ដេចធិបតី ហ៊ុន ម៉ាណែត បានសន្យាថា រាជរដ្ឋាភិបាលនឹងខិតខំតភ្ជាប់បណ្តាញអគ្គិសនី និងបណ្តាញទឹកស្អាតដល់គ្រប់បន្ទប់ជួល ដើម្បីជួយដល់ម្ចាស់ផ្ទះជួល និងជួយដល់កម្មករនិយោជិតដែលជាអ្នកជួលបន្ទប់៕