ស្នើ​កុំ​ដំឡើង​ថ្លៃទឹកស្អាត​​​​ប៉ះពាល់ដល់អ្នក​វិនិយោគ​​នៅ​តំបន់សេដ្ឋកិច្ចពិសេសក្រុងព្រះសីហនុ

អគ្គនាយករងតំបន់សេដ្ឋកិច្ចពិសេសក្រុងព្រះសីហនុ បាន​ស្នើឲ្យ​អាជ្ញាធរ​ខេត្តព្រះសីហនុ​ជួយ​សម្របសម្រួល​កុំ​ឲ្យ​មានការ​ដំឡើង​ថ្លៃទឹកស្អាត​ប្រើប្រាស់ ព្រោះតំបន់សេដ្ឋកិច្ចពិសេស​ជាកម្លាំងចលករនៃការអភិវឌ្ឍសេដ្ឋកិច្ចកម្ពុជា។

ខណៈ​តំបន់សេដ្ឋកិច្ចពិសេស​ក្រុង​ព្រះសីហនុ​កំពុង​មានការអភិវឌ្ឍទាក់ទាញ​សហគ្រាស​វិនិយោគ​ជាច្រើន ការ​ដំឡើង​ថ្លៃ​អាច​ធ្វើឲ្យ​ប៉ះពាល់ដល់អ្នកវិនិយោគ។ នេះបើ​តាម​លោក Liu Lianchi អគ្គនាយករង​តំបន់សេដ្ឋកិច្ចពិសេស​​។

​លោក Liu Lianchi បានស្មើឲ្យ​អភិបាលជួយសម្របសម្រួលបញ្ហាតម្លៃទឹកស្អាត ព្រោះពេលមុនមានតម្លៃ​ ៣៩ សេនក្នុងមួយម៉ែត្រគីប និងសុំឡើង ៤៥ សេនក្នុងមួយម៉ែត្រគីបគឺឡើង ១៥ ភាគរយ ក៏ប៉ុន្តែក្រុមហ៊ុនអានកូ វ៉ធើរ សឹបផ្លាយ គ្រោងដំឡើង​តម្លៃការប្រើប្រាស់ទឹកស្អាតរហូតដល់ ២ ៥០០ រៀលក្នុងមួយម៉ែត្រគីប ឬស្មើនឹងជាង ៦២ សេនក្នុងមួយ​ម៉ែត្រគីប សម្រាប់ការ​ប្រើប្រាស់ចាប់ពី ៣០១ ម៉ែត្រគីបឡើងទៅ។

លោកគួច ចំរើន អភិបាលខេត្តព្រះសីហនុមានប្រសាសសន៍ថា រាជរដ្ឋាភិបាលអាណត្តិទី ៧ បានលើកទឹកចិត្តដល់អ្នកវិនិយោគក្នុងការកាត់បន្ថយតម្លៃ​អគ្គិសនីសម្រាប់ក្រុមវិនិយោគក្នុងប្រទេសកម្ពុជា។ ចំពោះបញ្ហាទឹកស្អាត​ក៏មិនត្រូវឡើងថ្លៃហួសហេតុ​ពេកដែរ ព្រោះតំបន់សេដ្ឋ​កិច្ចពិសេសក្រុងព្រះសីហនុ ជាក្បាលម៉ាស៊ីនបង្កើនសេដ្ឋកិច្ចសម្រាប់អ្នកវិនិយោគនៅព្រះរាជាណាចក្រកម្ពុជា ក៏ដូចជាសម្រាប់ខេត្តព្រះសីហនុ។

លោក​អភិបាល​ខេត្ត​បាន​លើកឡើង​ថា ​កំណើនការ​នាំចេញនាំចូលនៅ​តំបន់​សេដ្ឋកិច្ចពិសេស រួមចំណែកក្នុងការលើកកម្ពស់សេដ្ឋកិច្ចដល់បុគ្គលិក កម្មករនិងស្រូបយកថវិកាក្នុងមួយខែជាង ១០ លានដុល្លារអាមេរិកចូលក្នុងសហគមមូលដ្ឋាន​ប្រជាពលរដ្ឋ​បង្វិលចូលសេដ្ឋកិច្ចក្នុងខេត្ត។

លោកអភិបាលខេត្តបាន​ឲ្យ​ក្រុមហ៊ុន អានកូ វ៉ធើរ សឹបផ្លាយ ទទួលយកសំណើ​និងសំណូមពររបស់តំបន់សេដ្ឋកិច្ចពិសេសក្រុងព្រះសីហនុ គឺតម្លៃទឹកស្អាតក្នុងមួយម៉ែត្រគីប ៤៥ សេន ដើម្បីចូលរួមចំណែកកសាងសេដ្ឋកិច្ចខេត្ត​ក្រោយបញ្ចប់​ពីវិបត្តិកូវីដ១៩។

លោកនាយកក្រុមហ៊ុន អានកូ វ៉ធើរ សឹបផ្លាយ ទទួលយកការសម្របសម្រួលរបស់លោកអភិបាលខេត្តព្រះសីហនុ ក៏ដូចជា​ការ​ស្នើ​ឡើងពីអគ្គនាយករងតំបន់សេដ្ឋកិច្ចពិសេសក្រុងព្រះសីហនុ ដោយ​នឹង​យកទៅ​ពិគ្រោះ​ជាមួយ​ថ្នាក់ដឹកនាំ​​ពិនិត្យសម្រេច។

បើតាមអគ្គនាយករងតំបន់សេដ្ឋកិច្ចពិសេសក្រុងព្រះសីហនុ មកដល់បច្ចុប្បន្នតំបន់សេដ្ឋកិច្ចពិសេស​ក្រុង​ព្រះសីហនុ​ទាក់ទាញសហគ្រាសចំនួន ១៧៥ គិតត្រឹម ៩ ខែដើមឆ្នាំ២០២៣ ហើយ​ទំហំការនាំចេញ​នាំចូលមានការកើនឡើង ២០ ភាគរយ​៕

អត្ថបទ៖ ស៊ុយ ចាន់ធា