ក្រសួងសុខាភិបាល អំពាវនាវដល់ពលរដ្ឋរងគ្រោះ​ដោយទឹកជំនន់ការពារសុខភាព​ចៀសផុតពីជំងឺឆ្លងនានា

ក្រសួងសុខាភិបាល បានធ្វើការអំពាវនាវដល់ពលរដ្ឋដែលរងគ្រោះដោយសារទឹកជំនន់ទន្លេមេគង្គ និងជំនន់ទឹកភ្លៀង​ត្រូវការការពារសុខភាពឱ្យបានល្អ ដើម្បីចៀសផុតពីជំងឺឆ្លងនានានៅពេលទឹកជន់លិចនិងទឹកស្រក។

យោងតាមសេចក្តីប្រកាសព័ត៌មានរបស់ក្រសួងសុខាភិបាល ចុះថ្ងៃទី៦តុលាបានឱ្យដឹងថាដើម្បីចៀស​វាងនូវជំងឺផ្សេងៗ​ដូចជា ជំងឺរាគ ជំងឺរាគមួល ពុល ជំងឺរលាកផ្លូវដង្ហើមស្រួចស្រាវ និងជំងឺដទៃផ្សេងទៀតប្រជាពលរដ្ឋ ត្រូវបរិភោគ​ទឹកស្អាតដោយប្រើធុងចម្រុះ ឬដាំទឹកឱ្យពុះឬប្រើប្រាស់ទឹកដោយប្រើថ្នាំក្លរីន ឬក្លរ៉ាមីន ៥០០មីលីក្រាម ចំនួនពីរគ្រាប់​អាចលាយទឹក៣០លីត្រ រួចទុក រយៈពេល ៣០នាទី មុនប្រើ ត្រូវលាងសម្អាតបន្លែ និងផ្លែឈើជាមួយទឹកស្អាត អាហារចម្អិនឱ្យបានឆ្អិនល្អ និងគ្របអាហារឱ្យបានជិត ដើម្បីការពាររុយរោម និងធូលីដីហុយចូល ព្រមទាំងសម្អាត​កន្លែងធ្វើម្ហូប និងសម្ភារៈផ្ទះបាយដូចជា ចាន ឆ្នាំង ស្លាប ព្រា ខ្ទះ កាំបិតជ្រញ់ឱ្យបានស្អាត។ លាងសម្អាតដៃជាមួយ​សាប៊ូឱ្យបានញឹកញាប់ មុននិងក្រោយបរិភោគ អាហារ និងក្រោយចេញពីបង្គន់ ត្រូវធ្វើអនាម័យខ្លួនប្រាណ​ឱ្យបានស្អាត​ដោយងូតទឹកដុះសាប៊ូ កក់សក់ និងបោកសម្លៀកបំពាក់ឱ្យបាន ស្អាតបង្ការនូវការកើតជំងឺសើរស្បែក ពងទឹក កមរមាស់ជាដើម។

ក្រសួងបានបន្តថា ក្រោយពេលទឹកជំនន់ត្រូវបន្តបរិភោគចំណីអាហារស្អាត ទឹកស្អាត និងអនាម័យខ្លួនប្រាណ​ឱ្យបាន​ស្អាត ដើម្បីចៀសវាងនូវជំងឺផ្សេងៗ ត្រូវបន្តសម្រាន្តក្នុងមុងគ្រប់ពេលដើម្បីការពារជំងឺគ្រុនឈាមជំងឺគ្រុនចាញ់ ជំងឺហ្សីកា និងជំងឺ ផ្សេងៗទៀត ត្រូវពិនិត្យមើលផ្ទះក្រែងមានបាក់ស្រុតនាំឱ្យមានគ្រោះថ្នាក់ ប្រុងប្រយ័ត្នក្រែងមានសត្វពស់ ឬសត្វ អសិរពិសផ្សេងៗ។ អនាម័យបរិស្ថានជុំវិញ និងក្នុងផ្ទះ ព្រោះក្រោយពេលទឹកស្រកទៅ បានបន្សល់នូវ ភាពកខ្វក់ និងមេរោគជាច្រើនរស់នៅក្នុងទឹក ចៀសវាងនូវការដក់ទឹកជុំវិញផ្ទះ និងក្នុងផ្ទះនាំឱ្យមានដង្កូវទឹកកើតមូសខ្លា និងមូស​ដែកគោលអាចបង្កឱ្យមានជំងឺគ្រុនឈាមនិងជំងឺគ្រុនចាញ់ ស្តារនិងសំអាត អណ្តូងទឹកឡើងវិញមុននឹងប្រើប្រាស់ ព្រមទាំង​ជួសជុល និងសង់បង្គន់ឡើងវិញដោយជានិច្ចកាល ត្រូវបន្ទោរបង់ក្នុងបង្គន់គ្រប់ពេល។

ជាមួយគ្នានេះដែរ ក្រសួងក៏បានណែនាំទៀតថាមុនពេលទឹកជំនន់ត្រូវតាមដានស្ថានភាពទឹកជំនន់ ត្រៀមទីទួលសុវត្ថិភាព និងស្បៀងអាហារត្រូវធ្វើរបងព័ទ្ធជុំវិញស្រះ ឬកន្លែង ដែលមានទឹកជ្រៅ ត្រូវថែរក្សាបរិស្ថានឱ្យបានស្អាត និងសាងសង់​បង្គន់ ឱ្យខ្ពស់ដើម្បីការពារទឹកជំនន់។

ចំណែកក្នុងអំឡុងពេលមានទឹកជំនន់មិនត្រូវចូលទៅក្នុងផ្ទះចាស់ ឬអាគារទ្រុឌទ្រោម​ព្រោះអាចស្រុតបាក់បែក​បង្កឱ្យគ្រោះថ្នាក់ មិនត្រូវប៉ះពាល់គ្រឿងប្រើប្រាស់អគ្គិសនីដោយដៃសើមឬកំពុងឈរនៅក្នុងទឹក។ នៅពេលធ្វើ​ដំណើរដោយ ជិះទូក ឬ កាណូត នៅពេលយប់ត្រូវមានភ្លើងបំភ្លឺត្រូវសម្រាន្តក្នុងមុងគ្រប់ពេលដើម្បីការពារជំងឺគ្រុនឈាម គ្រុនចាញ់ និងជំងឺផ្សេងៗ ចំពោះស្ត្រីមានផ្ទៃពោះត្រូវតាមដាន និងពិនិត្យផ្ទៃពោះតាមការកំណត់របស់មណ្ឌលសុខភាព ឬមន្ទីរពេទ្យបើស្រ្តីគ្រប់ខែជិតដល់ពេលសម្រាលត្រូវរកកន្លែងស្នាក់នៅក្បែរមណ្ឌលសុខភាព ឬមន្ទីរពេទ្យ​ដែល​នៅជិត​លោក​អ្នកបំផុត ត្រូវនាំកូនៗរបស់លោកអ្នកទៅចាក់ថ្នាំបង្ការតាមការកំណត់របស់គ្រូពេទ្យ និងផ្ដល់អាហារដល់ពួកគ ឱ្យបានត្រឹមត្រូវត្រូវប្រុងប្រយ័ត្នចំពោះកុមារី និងក្មេងស្រីពេលនៅទីទួលសុវត្ថិភាពក្រែងមានអំពើហិង្សាផ្លូវភេទ ត្រូវជួយមនុស្សចាស់ក្នុងក្រុមគ្រួសារលោកអ្នក និងមនុស្សចាស់ជិតខាង និងផ្ដល់ការគាំទ្រ ដល់សមាជិកគ្រួសារ ឬកុមារពិការ ដូចជា ឈើច្រត់ រទេះរុញ ឬថ្នាំពេទ្យដែលគាត់កំពុងប្រើប្រាស់ជាប្រចាំមួយចំនួន​ដែលជាតម្រូវការចាំបាច់​របស់ពួកគាត់ ពេលធ្វើដំណើរតាមទូកមិនត្រូវដាក់មនុស្សហួសកម្រិត បើមានអ្នកណាម្នាក់លង់ទឹកត្រូវហៅរកជំនួយ​ជាបន្ទាន់ត្រូវប្រុងប្រយ័ត្នចៀសវាងនូវគ្រោះថ្នាក់លង់ទឹកត្រូវការពារកុមារតូចៗមិនឱ្យចុះទឹក និងពន្យល់កុមារពីគ្រោះ​ថ្នាក់នៃការលង់ទឹកក៏ដូចជានាំកុមារទៅកន្លែងខ្ពស់ និងត្រូវមានអ្នកថែទាំ ព្រមទាំងប្រើអាវ ពោង ឬប៊ីដុងជ័រគ្រប់ពេល​កុមារចេញពីផ្ទះត្រូវប្រុងប្រយ័ត្នគ្រោះថ្នាក់ដោយសារពស់ចឹក ឬសត្វអាសិរពិសផ្សេងៗ ដោយពិនិត្យឱ្យបានត្រឹមត្រូវ មុនទៅកាន់ទីទួលសុវត្ថិភាព ឬមុនទៅធ្វើការជិតគំនអុស និងគំនរឈើ។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា គិតត្រឹមដើម​ខែតុលានេះ មានខេត្តចំនួន ៧រួមមានខេត្តបាត់ដំបង ពោធិ៍សាត់ សៀមរាប កំពង់ធំ ព្រះវិហារ បន្ទាយមានជ័យ​និងខេត្តកណ្តាល រងគ្រោះដោយសារជំនន់ទឹកភ្លៀងបានបណ្តាលឱ្យប៉ះពាល់​ប្រជាពលរដ្ឋចំនួន២៨៧១៦គ្រួសារ​លិចផ្ទះ១៥៣៩៣ខ្នងជម្លៀសប្រជាពលរដ្ឋ១៨១០គ្រួសារសំណាំស្រូវ២១៨៥០ហិកតានិងដំណាំរួមផ្សំ ៤១៧២ហិកតា៕

អត្ថបទ៖ សំអឿន