ពលរដ្ឋជាង ១០០ គ្រួសារនៅក្រុងសិរីសោភ័ណ​ត្រូវទឹកជនលិច​ ខណៈអាជ្ញាធរជម្លៀសជិត ៤០ គ្រួសារ

អាជ្ញាធរក្រុងសិរិសោភ័ណ​បានចុះពិនិត្យមើលស្ថានភាពទឹកក្នុងភូមិសាស្រ្តក្រុងសិរីសោភ័ណពេល​ដែល​ទឹកមានការជន់ឡើងនៅតំបន់មួយចំនួននៅក្នុងក្រុងសិរីសោភ័ណក្នុងរយៈពេល ៣ ថ្ងៃកន្លងមកនេះ។ ​

ការចុះមើលពីស្ថានភាពទឹកនេះមានប្រជាពលរដ្ឋចំនួន ១៣៧ គ្រួសារកំពុងប្រឈមនឹងជំនន់​ទឹកភ្លៀង ដើម្បីឆ្លើយតបឲ្យបានទាន់ពេលវេលា អាជ្ញាធរបានជម្លៀស​ប្រជាពលរដ្ឋចំនួន​ ៣៧​ គ្រួសារ មកដាក់នៅក្នុងបេនឡានថ្មី ស្ថិតក្នុងភូមិ ៣ សង្កាត់ព្រះពន្លា ក្រុង សិរីសោភ័ណ ខេត្តបន្ទាយមានជ័យ។

លោក ស្រេង សុផល អភិបាលក្រុងសិរីសោភ័ណបានឱ្យដឹងថា ស្ថានភាពទឹកនៅតំបន់មួយចំនួននៅក្នុងក្រុងសិរីសោភ័ណនេះមានការជន់ឡើង តំបន់ខ្លះទឹកហូរលើផ្លូវដូចជាក្នុងសង្កាត់ព្រះពន្លា។

ចំពោះដំណាំកសិកម្មវិញលោកបញ្ជាក់ថា មិនទាន់ទទួលរងផលប៉ះពាល់នោះទេ បើធៀបទៅនឹងឆ្នាំ២០២០ ឡើងខ្លាំងទឹកលិចស្ទើរទូទាំងខេត្តតែឆ្នាំ ២០២៣នេះតូច មិនទាន់ដល់កម្រិតដូចឆ្នាំ២០២០នោះទេ។

លោកក៏បានសំណូមពរដល់បងប្អូនពលរដ្ឋដែលរស់នៅតំបន់ផ្លូវទឹក ឬតំបន់ទំនាបធ្លាប់ទទួលរងការជន់លិច ត្រូវមានការប្រុងប្រយ័ត្នឲ្យបានខ្ពស់ ចំពោះកូនចៅតូចៗ មិនត្រូវបណ្តែតបណ្តោយឲ្យចុះលេងទឹកឡើយ ក្រែងកើតមានករណីលង់ទឹកជាយថាហេតុ ណាមួយកើតឡើងពិសេសត្រូវប្រុងប្រយ័ត្ន សត្វអសិរពិសជាដើម បើមានករណីសត្វទិច ឬខាំ ត្រូវប្រញ៉ាប់ទៅមណ្ឌលសុខភាព ឬមន្ទីរពេទ្យ ដើម្បីធ្វើការព្យាបាលឲ្យបានទាន់ពេលវេលា។

ម្យ៉ាងវិញទៀត លោក ស្រេង សុផល បានឲ្យកម្លាំងទាំង ៣ មាន កម្លាំងនគរបាល អាវុធហត្ថ និងយោធា ត្រៀមរួចជាស្រេចនូវឧបករណ៍ ឬសម្ភារសម្រាប់សង្គ្រោះបន្ទាន់ ក្នុងករណីជំនន់ទឹកភ្លៀងកើនឡើង ដើម្បីជួយសង្គ្រាះបងប្អូនពលរដ្ឋ នៅមូលដ្ឋានឲ្យបានទាន់ពេលវេលា។

ពេលដែលជន់ទឹកភ្លៀង បានធ្លាក់មកបណ្តើរពីប្រទេសថៃ ហើយលោកបានណែនាំដល់សង្កាត់នីមួយៗ ត្រូវចុះពិនិត្យតាមដានឲ្យបានជាប្រចាំអំពីស្ថានភាពទឹក។

ជាវិធានការទៅពេលខាងមុខ សង្កាត់ទាំងអស់នៅក្នុងក្រុងត្រូវរិះរកគ្រប់មធ្យោបាយ សម្រាប់រក្សាទឹកទុកប្រើប្រាស់នៅរដូវប្រាំងពេលខាងមុខ ដោយឆ្នាំនេះសង្កេតឃើញថា ទឹកជន់ឆ្នាំនេះតិចជាងបណ្តាឆ្នាំមុនៗ ដែលតម្រូវឲ្យយើងជាអាជ្ញាធរធ្វើយ៉ាងរក្សាទឹកទុកប្រើប្រាស់នៅរដូវប្រាំងខាងមុខកុំឲ្យមានការខ្វះខាត។

គួបញ្ជាក់ផងដែរថា ខេត្តបន្ទាយមានជ័យមាន២ក្រុង និង៧ ស្រុក តួលេខមាននេះមានតែក្រុងសិរីសោភ័ណទេចំណែក ក្រុងប៉ោយប៉ែត និងស្រុកទាំង ៧ ចាំសរុបនៅពេលក្រោយ៕

អត្ថបទ៖ វ៉ាន់ ណាង