ខេត្តកណ្តាលប្រកាសបិទចរាចរតាម​ផ្លូវទឹក​ ២ ថ្ងៃ ត្រៀមរៀបចំប្រកួតអុំទូក

មន្ទីរសាធារណការនិងដឹកជញ្ជួនខេត្តកណ្តាលបាន​ជូនដំណឹង​ពីការ​ចូលរួមអបអរសាទរ​ព្រះរាជពិធីបុណ្យខួប​លើក​ទី ១៩ នៃការគ្រង​ព្រះបរមរាជសម្បត្តិរបស់ព្រះករុណាព្រះបាទសម្តេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងព្រះរាជពិធីបុណ្យ អុំទូក បណ្តែត​ប្រទីប អកអំបុក សំពះព្រះខែនាពេលខាងមុខ។

យោងតាមសេចក្តីជូនដំណឹងរបស់មន្ទីរសាធារណការនិងដឹកជញ្ជួនបាន​ណែនាំ​​ពីការ​បិទចរាចរណ៍ទូកដរចម្លង ជលយាន សាឡង់បូមខ្សាច់ និងមធ្យោបាយដឹកជញ្ជូនផ្លូវទឹកគ្រប់ប្រភេទ តាមបណ្ដោយទន្លេបាសាក់ចាប់ពីវិហារអ្នកតាសានថៃជឺ ដល់ស្ពានមិត្តភាពកម្ពុជា-ចិន តាខ្មៅ (ស្ពានព្រែកសំរោង) ក្នុងក្រុងតាខ្មៅ ខេត្តកណ្តាល ចំនួន ០២ ថ្ងៃ ចាប់ពីថ្ងៃទី២៨ ដល់ថ្ងៃទី២៩ ខែតុលា ឆ្នាំ២០២៣ ព្រោះរដ្ឋបាលខេត្តកណ្តាល នឹងរៀបចំពិធីប្រណាំងទូកនៅមាត់ទន្លេបាសាក់ក្រុងតាខ្មៅ ខេត្តកណ្តាល រយៈពេលចំនួន ០១ ថ្ងៃ នៅថ្ងៃទី២៩ ខែតុលា ឆ្នាំ២០២៣។

ខេត្តកណ្តាលឆ្នាំនេះ​មានទូកសរុបចំនួន ៧៤ ទូក ចូលរួម ប្រណាំង ក្នុងនោះ រួមមាន៖ ទូកអុំខ្នាតអន្តរជាតិនារីបុរស និងទូកចែវបុរសនាទីជាដើម។

ជាមួយគ្នានេះ ខេត្តក៍មានរៀបចំ ដាក់តាំង ពិព័រណ៍ លក់ផលិតផល ក្នុងស្រុកជាច្រើនប្រភេទហើយនៅពេលរាត្រី​នឹង​មានរៀបចំបណ្តែតគោមលើផ្ទៃទឹក បាញ់កាំជ្រួចនិងមានកម្មវិធីប្រគុំតន្ត្រីសម័យដែលមានតារាចំរៀងល្បីៗចូលរួមផងដែរ៕

អត្ថបទ៖ សំអឿន