ព្រះអង្គ ចន្ទ មុនី នឹងនិមន្តមកដល់ក្រុងបាត់ដំបង នារសៀលថ្ងៃនេះ

នៅរសៀលថ្ងៃទី២៥ ខែសីហា ឆ្នាំ២០២៤នេះ ព្រះធម្មវនវាសី ចន្ទ មុនី នឹងនិមន្តមកដល់ខាងមុខសាលាខេត្តបាត់ដំបងដែលព័ត៌មាននេះជាការផ្សព្វផ្សាយ និងជូនដំណឹងដល់ប្រជាពលរដ្ឋដែលមានបំណងចង់ជួបព្រះអង្គផ្ទាល់អាចអញ្ជើញធ្វើដំណើរមកកាន់ខាងមុខបរិវេណសាលាខេត្តបាត់ដំបង ព្រោះព្រះអង្គនឹងនិមន្តមកដល់នៅវេលាម៉ោង ២រសៀលថ្ងៃនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកនេះ លោក សុខ លូ អភិបាលខេត្តបាត់ដំបង លោក ដាញ់ អេងប៊ុនចាន់ ស្នងការនគរបាលខេត្ត និងប្រធានមន្ទីរនានាជុំវិញខេត្ត បានធ្វើដំណើរទៅកាន់ព្រំប្រទល់ខេត្តបន្ទាយមានជ័យ និងខេត្តបាត់ដំបង (ស្រុកម៉ាឡៃ-ស្រុកសំពៅលូន) ដើម្បីទទួលព្រះអង្គ ដែលយប់មិញនេះ ព្រះធម្មវនវាសី ចន្ទ មុនី គង់នៅវត្តអូរជុំឧត្តមសាមគ្គី (ហៅវត្តគីឡូ១៣)។

នៅព្រឹកថ្ងៃនេះដែរ ព្រះអង្គនឹងបន្តនិមន្តទៅកាន់ច្រកពីអន្តរជាតិដូង ដែលស្ថិតនៅក្នុងស្រុកកំរៀង និងនិមន្តចុះទៅពិនិត្យបង្គោលព្រំដែនលេខ៥៤ ស្ថិតក្នុងភូមិព្រះពុទ្ធ ឃុំបឹងរាំង ស្រុកកំរៀង បន្ទាប់មកព្រះអង្គនិងនិមន្តបន្តទៅកាន់ខេត្តប៉ៃលិន ព្រមទាំងបាននិមន្តបន្តដំណើរតាមផ្លូវជាតិលេខ៥៧ ឆ្ពោះមកកាន់ក្រុងបាត់ដំបង ដោយឆ្លងកាត់ស្រុករតនៈមណ្ឌល និងស្រុកបាណន់។

ដោយឡែក នៅរសៀលថ្ងៃនេះ ព្រះអង្គ ចន្ទ មុនី នឹងនិមន្តជួបជុំពុទ្ធបរិស័ទនៅរមណីយដ្ឋានភ្នំសំពៅ រួចនិមន្តបន្តមកជួប ជុំពុទ្ធបរិស័ទនៅខាងមុខអគារសារមន្ទីរប្រវត្តិសាស្ត្រខេត្តបាត់ដំបង (អគារសាលាខេត្តចាស់) ដើម្បីនិមន្តសំដែងធម្មទានអប់រំចិត្តជាមួយប្រជាពលរដ្ឋ ដែលមកពីគ្រប់ទិសទីក្នុងខេត្តបាត់ដំបងផងដែរ ៕ អត្ថបទ : សោ និយមរ័ត្ន