វត្តមាន​ព្រះធម្មវនវាសី ចន្ទ មុនី នៅទឹកដីអង្គរ​ទាញ​​បាន​ភ្ញៀវទេសចរបែបសាសនាជាង​ ២១ ម៉ឺន នាក់

នៅក្នុងរយៈពេល ៣ ថ្ងៃ ចាប់ពីថ្ងៃទី ២៨ ដល់ទី៣០ ខែ តុលា ឆ្នាំ២០២៣ ប្រជាពលរដ្ឋខ្មែរទាំងក្មេងចាស់ប្រុសស្រី​មកពីបណ្តារាជធានីខេត្តបានចូលមកកាន់ខេត្តសៀមរាប ដើម្បីស្វែងទៅជួបព្រះភ័ក្រ្កព្រះធម្ម វនវាសី ចន្ទ មុនី ( ហៅសង្ឃធុដង្គ) នៅប្រាសាទអង្គរ និងទីកន្លែងផ្សេងៗទៀតក្នុងក្រុងសៀមរាប។

តាមការបញ្ជាក់របស់លោក​ ប៉ាក់ សុខុម រដ្ឋលេខាធិការក្រសួងទេសចរណ៍បានគូសបញ្ជាក់ថា បារមីរបស់ព្រះតេជគណព្រះធម្ម វនវាសី ចន្ទ មុនី និមន្តមកកាន់ទឹកដីអង្គរបានធ្វើឲ្យខេត្តសៀមរាប​ក្នុង​រយៈពេល ៣ ថ្ងៃ​ បានទាក់ទាញយកភ្ញៀវទេសចរជាតិ​ប្រមាណជាង ២១ ម៉ឺននាក់ ព្រមទាំងភ្ញៀវបរទេស​មួយ​ចំនួ​ន​ផងដែរ។

លោក​ថា តាម​រយៈ​ចំនួន​ទេសចរ​យ៉ាងច្រើន​លើសលុប​នេះ​ស​ឲ្យឃើញថា វិស័យទេសចរបែបសាសនាក៏​ជាចលករដ៏សំខាន់​ក្នុងវិស័យទេចរណ៍នៅកម្ពុជា។

កន្លងមកអ្នកទេសចរដែលចូលមក​កម្សាន្តក្នុង​ខេត្ត​សៀមរាប ភាគច្រើនបានត្រឹមតែមើលប្រាសាទតែមិនបានស្គាល់អ្វីដែល​ស៊ីជម្រៅជាងនេះ។ បើតាម​លោក​ ប៉ាក់ សុខុម ក្រសួងទេសចរណ៍​កំពុងគិតគូរ​អភិវឌ្ឍ​វិស័យទេសចរណ៍បែបជំនឿសាសនានៅតាមទីវត្តអារាមចំណាស់​ៗ​អាយុកាលរាប់រយឆ្នាំ ដើម្បី​ទាក់ទាញដល់ភ្ញៀវទេសចជាតិ និងអន្តរជាតិ​ច្រើន​បន្ថែម​ទៀត៕