រដ្ឋបាលរាជធានីភ្នំពេញ រៀបចំពិធីអកអំបុកនៅរមណីយដ្ឋានវត្តភ្នំ

រដ្ឋបាលរាជធានីភ្នំពេញ បានរៀបចំឲ្យមានពិធីអកអំបុក នៅរមណីយដ្ឋានប្រវត្តិសាស្ត្រវត្តភ្នំ ដែលជាបេះដូង និងជានិមិត្តរូបនៃរាជធានីភ្នំពេញ នៅរាត្រីថ្ងៃ ១៥កើត ពេញបរមី ខែកត្តិក ឆ្នាំថោះ ព.ស ២៥៦៧ ត្រូវនឹងថ្ងៃទី ២៧វិច្ឆិកា ឆ្នាំ ២០២៣។

ពិធីនេះធ្វើឡើងដោយមានការអញ្ជើញចូលរួមពីលោក កើត ឆែ អភិបាលរងរាជធានី តំណាងឲ្យលោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកស្រី និងលោក ម៉ប់ សារិន ប្រធានក្រុមប្រឹក្សារាជធានីភ្នំពេញ ខណៈដែលពិធីនេះត្រូវបានខកខានប្រារព្ធធ្វើ តាំងពីឆ្នាំ ៣ឆ្នាំមុន ដោយសារការរីករាលដាលនៃជំងឺកូវីដ-១៩។

ឆ្នាំនេះ រដ្ឋបាលរាជធានីភ្នំពេញ ក៏បានប្រារព្ធពិធីនេះឡើងវិញចំថ្ងៃទី ២ នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុក ហើយពិធីនេះក៏ត្រូវបានរៀបចំធ្វើឡើងវិញ ជាលើកដំបូងផងដែរ ក្នុងអាណត្តិទី ៧ នៃរាជរដ្ឋាភិបាល ដែលមានសម្តេចធិបតី​ ហ៊ុន ម៉ាណែត ជានាយករដ្ឋមន្ត្រី។

នេះក៏ជាព្រះរាជពិធីមួយ ដែលប្រារព្ធនៅក្នុងព្រះរាជវង្សានុវង្ស រហូតដល់ប្រជាពលរដ្ឋសាមញ្ញ ក៏និយមប្រារព្វពិធីនេះ តាមផ្ទះសម្បែងរៀងៗខ្លួន តាមស្ថាប័ន អង្គភាព និងតាមវត្តអារាមផងដែរ។ ចំពោះគ្រឿងរណ្តាប់សំខាន់ ដែលគេយកមកប្រើក្នុងពិធីអកអំបុក ដែលរួមមាន៖ អំបុក,ចេកទុំ,ដូងខ្ចី ផ្កាភ្ញីរួមទាំងគ្រឿងសក្ការៈបូជាមួយចំនូនទៀត។

ពិធីនេះ ភាគច្រើនគេប្រារព្ធឡើងនៅចំពេលរដូវទឹកសម្រកក្នុងខែកត្តិក ដែលជាថ្ងៃព្រះចន្ទ័រះ ពេញបរមី និងពេញរង្វង់មូល ហើយពិធីនេះ ក៏បានផ្សាភ្ជាប់ជាមួយព្រះរាជពិធីបុណ្យអុំទូក បណ្តែតប្រទីបផងដែរ៕

អត្ថបទ៖ ស្រីរ័ត្ន