ព័ត៌មានជាតិ

យកទីតាំងចាប់ពីមុខសាលាខេត្តបាត់ដំបង ក្នុងពិព័រណ៍ម្ហូបអាហារឆ្លងឆ្នាំសកលនៅខេត្តបាត់ដំបង

បានផុស

២ years មុន

នៅ

ថ្ងៃពុធ ១៣ ធ្នូ ២០២៣

ដោយ

ក្នុងកិច្ចប្រជុំត្រៀមរៀបចំពិព័រណ៍ម្ហូបអាហារ និងកម្មវិធីឆ្លងឆ្នាំសកលឆ្នាំ២០២៤ នៅរសៀលថ្ងៃទី១២ ខែធ្នូ ម្សិលមិញនេះ លោក សុខ លូ អភិបាលខេត្តបាត់ដំបង បានគូសបញ្ជាក់ថា ទីតាំងពិព័រណ៍ម្ហូបអាហារ ចាំបាច់ត្រូវរៀបចំចេញពីមុខសាលាខេត្តបាត់ដំបងឆ្ពោះទៅកាន់វិមានឯករាជ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ លូ មានប្រសាសន៍ថា ការរៀបចំពិធីបុណ្យម្ហូបអាហារប្រពៃណីនេះ ស្តង់ម្ហូបអាហារគឺត្រូវរៀបចំចេញពីមុខសាលាខេត្តបាត់ដំបងឆ្ពោះទៅកាន់វិមានឯករាជ្យធ្វើយ៉ាងណាឲ្យមានលក្ខណៈស្រស់ស្អាត មានរបៀបរៀបរយ ដើម្បីងាយស្រួលឲ្យភ្ញៀវទេសចរក្នុងការដើរទស្សនា និងជាវម្ហូបអាហារយកទៅពិសា។ លើសពីនេះទៀត ការរៀបចំឲ្យបានល្អជាចំណុចទាក់ទាញមួយដែលអាចទាក់ទាញភ្ញៀវជាតិ និងអន្តរជាតិឲ្យចូលមកទស្សនា បានភ្លក់នូវរសជាតិរបស់ម្ហូបអាហារក្រោមស្នាដៃរបស់អ្នកខេត្តបាត់ដំបង ព្រមទាំផ្ដល់ឱកាសដល់អាជីវករលក់នូវម្ហូបអាហារប្រចាំខ្លួន ដល់ភ្ញៀវជាតិ និងអន្តរជាតិបានស្គាល់កាន់តែទូលំទូលាយបន្ថែមទៀត។

ជាមួយគ្នានេះ លោក សុខ លូ បន្តថា នៅក្នុងពិធីបុណ្យម្ហូបអាហារនេះមិនមែនមានតែតាំងលក់មុខម្ហូបអាហារតែប៉ុណ្ណោះទេ ក៏មានការដាក់តាំងនូវផលិតផលរបស់ខ្មែរផងដែរ ក្រោមប្រធានបទ«ភូមិមួយផលិតផលមួយ» ដោយអនុញ្ញាតឲ្យប្រជាជននៅតាមភូមិ ឃុំ ស្រុក យកស្នាដៃផលិតផលរបស់ខ្លួន មកដាក់តាំងបង្ហាញដើម្បីលើកតម្កើងខេត្តបាត់ដំបងឲ្យមានមុខមាត់ បង្ហាញនូវសក្ដានុពលរបស់ខេត្តបាត់ដំបងផងដែរ។

កម្មវិធីនេះក៏លើកទឹកចិត្តដល់ពលរដ្ឋដែលរស់នៅក្នុងភូមិ ស្រុក ឃុំសង្កាត់ ក្រុងនៃខេត្តបាត់ដំបង មកចូលរួមឲ្យបានច្រើនកុះករក្នុងការបង្ហាញនូវមុខម្ហូបប្រចាំតំបន់ភូមិសាស្ត្ររបស់ខ្លួន ដើម្បីបង្ហាញឲ្យពលរដ្ឋនៅតំបន់ផ្សេងៗនៅក្នុងខេត្តបាត់ដំបង ក៏ដូចជាភ្ញៀវទេសចរ ដែលបានមកលេងកម្សាន្តនៅក្នុងខេត្តបាត់ដំបងបានស្គាល់រសជាតិ។

គួរបញ្ជាក់ថា ខេត្តបាត់ដំបង និងរៀបចំពិព័រណ៍ម្ហូបអាហារ និងកម្មវិធីឆ្លងឆ្នាំសកលឆ្នាំ២០២៤ ចំនួន ៣ ថ្ងៃជាប់គ្នា គឺចាប់ពីថ្ងៃទី២៩-៣០-៣១ ខែឆ្នូ ឆ្នាំ២០២៣ ខាងមុខ ឈានចូលឆ្នាំ២០២៤។ ការរៀបចំពិព័រណ៍ម្ហូបអាហារនេះធ្វើឡើងដើម្បីជាការអបអរសាទរដល់ក្រុងបាត់ដំបង ជាប់ជាទីក្រុងច្នៃប្រឌិតម្ហូបអាហារ របស់អង្គការយូណេស្កូ៕