នាយករដ្ឋមន្ត្រីកម្ពុជា ប្រតិកម្មរឿង​​ប្រឌិតព័ត៌មាន ការសាងសង់ព្រែកជីកហ្វូណនតេជោ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី ២៧ ខែធ្នូ ឆ្នាំ ២០២៣ បានថ្លែងប្រតិកម្មចំពោះក្រុមប្រឆាំងមួយក្រុមនៅក្រៅប្រទេស ដែលជ្រក​ក្រោម​​ស្លាក​សារព័ត៌មាន ប្រឌិតព័ត៌មានមិនពិតជុំវិញការសាង​សង់ព្រែក​ជីកហ្វូណន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិកម្មរបស់សម្ដេចនាយករដ្ឋមន្ត្រីបានធ្វើឡើង បន្ទាប់ពីសារព័ត៌មានឌឹខេមបូឌាដេលី បានប្រឌិតព័ត៌មានមិនពិតថា បានប្រភពពីមន្ត្រីជាន់ខ្ពស់ក្រសួងសេដ្ឋកិច្ចកម្ពុជាថា រាជរដ្ឋាភិបាល ខ្ចីលុយចិនចំនួន ៥ ពាន់លានដុល្លារ ដើម្បីសាងសង់ព្រែកជីក និងដោះស្រាយវិបត្តិសេដ្ឋកិច្ចកម្ពុជា។

សម្ដេចធិបតី អះអាងថា នេះជាការប្រឌិតទាំងស្រុង ដើម្បីវាយប្រហារ​មក​លើរាជ​រដ្ឋាភិបាលកម្ពុជា ខណៈគម្រោងនេះ គេដឹងឭគ្រប់គ្នាហើយថា ជាគម្រោង BOT បានន័យថា សាងសង់ ធ្វើអាជីវកម្ម ហើយផ្ទេរ។

ក្រុមហ៊ុនដែលសុំសិទ្ធិវិនិយោគ ទទួលខុសត្រូវខ្ចីថវិកាមក ក្នុងការចំណាយ​សាងសង់ ខណៈរដ្ឋាភិបាលអនុញ្ញាត​ឱ្យប្រតិបត្តិការអាជីវកម្ម លុះដល់ពេល​ចប់កុងត្រា រដ្ឋាភិបាលអាចមានសិទ្ធិ​យកមកគ្រងវិញបាន ឬត្រូវបន្ត។

សម្ដេច ហ៊ុន ម៉ាណែត បញ្ជាក់ថា៖ «វាត្រង់តែឆ្ងាញ់ តាមប្រភពមន្ត្រីជាន់ខ្ពស់​ដែលសុំមិនបញ្ចេញមុខ អាហ្នឹងគេប្រើចិត្តសាស្ត្រ បងប្អូនអ្ហា ចិត្តសាស្ត្រមនុស្សយើង បើសិនគេនិយាយប្រាប់ក្ដោងៗ មិនសូវជឿទេ តែអាខ្សឹបហ្នឹងជឿណាស់ ហើយបើខ្សឹបថា កុំប្រាប់គេ គឺថាលាក់ការណ៍ ដឹងកាបុតក អាហ្នឹងគឺថាកាន់តែជឿទៀត»។

សម្ដេច ហ៊ុន ម៉ាណែត មិនជឿថា មានមន្ត្រីជាន់ខ្ពស់នៅក្រសួងសេដ្ឋកិច្ច ល្ងង់ដល់ថ្នាក់មិនស្គាល់ភាពខុសគ្នា រវាងឥណទាន និងគម្រោង BOT។ «ខ្ញុំមិនជឿថាមន្ត្រីជាន់ខ្ពស់យើងល្ង់ដល់ថ្នាក់ហ្នឹង» សម្ដេចធិបតីបន្ថែម។

សម្ដេច ហ៊ុន ម៉ាណែត បញ្ជាក់ថា ពេលដែលបង្កើតព្រែក នឹងផ្ដល់ផលប្រយោជន៍ច្រើន សម្រាប់ការតភ្ជាប់ដឹកទំនិញ ដើម្បីបង្កើនសេដ្ឋកិច្ចកម្ពុជា។

គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ គឺជា​គម្រោង​ប្រវត្តិសាស្ត្រលើកទី១ ក្នុងវិស័យដឹកជញ្ជូនផ្លូវ​ទឹករបស់កម្ពុជា ដើម្បីតភ្ជាប់​ប្រព័ន្ធ​ទន្លេមេគង្គនិងផ្លូវសមុទ្រ។

គម្រោងនេះ ធ្វើឡើងដើម្បីពង្រីកវិសាលភាព​នៃការ​ប្រើប្រាស់សក្តានុពលលើការដឹកជញ្ជូនតាមផ្លូវទឹក សំដៅចូលរួមលើកកម្ពស់​សកម្ម​ភាពសេដ្ឋកិច្ច​-សង្គមឱ្យកាន់​តែមានការរីកចម្រើនឈានទៅមុខមួយកម្រិតថែមទៀត និងផ្តល់ជាដំណោះស្រាយសមស្របលើបញ្ហាប្រឈម​និងឧបសគ្គនានានៃវិស័យដឹកជញ្ជូនតាមផ្លូវទឹកដែលយើងបាននិងកំពុងជួបប្រទះនាពេលបច្ចុប្បន្ន។

គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ ត្រូវបានបញ្ចប់ការសិក្សា​សមិទ្ធិ​លទ្ធភាពរួចរាល់ ដោយបាន​ប្រើប្រាស់រយៈពេលសរុប ២៦ខែ។

តាមការ​សិក្សា បានបង្ហាញថា ផ្លូវទឹកនេះមានប្រវែង ១៨០គីឡូម៉ែត្រ ចាប់ពីព្រែក​តាកែវនៃ​ទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីង នៃទន្លេ​បាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់​ខេត្តចំនួន៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាជនសរុបប្រមាណ ១.៦លាននាក់ រស់នៅអមសងខាងផ្លូវទឹក មានតម្លៃ ១.៧ពាន់លានដុល្លា។

ផ្លូវទឹកនេះមានទទឹងមុខកាត់ផ្នែកខាងលើប្រវែង១០០ម៉ែត្រ និងមុខកាត់ផ្នែកខាង​ក្រោម​ប្រមាណ ៨០ម៉ែត្រ និងជម្រៅទឹកប្រមាណ ៥,៤ម៉ែត្រ (ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ) មានគន្លងនា​វាចរណ៍ចំនួន ២គន្លង អាច​ចេញ-ចូល និងជៀសគ្នាបានដោយសុវត្ថិភាព៕

អត្ថបទ៖ ឡេង ដេត