បច្ចុប្បន្ន ប.ស.ស មានមន្ទីរពេទ្យជាដៃគូសហការជាង១៥០០ ទាំងរដ្ឋ និងឯកជន នៅទូទាំងប្រទេស  

បេឡាជាតិសន្តិសុខសង្គម (ប.ស.ស) បានដើរតួនាទីដ៏សំខាន់ក្នុងកិច្ចគាំពារសង្គម ដែលបាននិងកំពុងចូលរួមចំណែកយ៉ាងសំខាន់លើការលើកកម្ពស់សុខុមាលភាព និងជីវភាពរបស់ប្រជាពលរដ្ឋ ជាពិសេសការផ្ដល់សេវាវេជ្ជសាស្ត្រនៅតាមមន្ទីរជាដៃគូរបស់ ប.ស.ស ដោយឥតគិតថ្លៃ។ គិតមកដល់ពេលនេះ ប.ស.ស មានមន្ទីរពេទ្យជាដៃគូសហការសរុបចំនួន ជាង១ ៥០០មន្ទីរពេទ្យ ទាំងរដ្ឋ និងឯកជន នៅទូទាំងប្រទេស។

បើតាមរបាយការណ៍ គឺបច្ចុប្បន្ននេះ ប.ស.ស បានចុះកិច្ចព្រមព្រៀងជាមួយមូលដ្ឋានសុខាភិបាលសរុបចំនួន១ ៥៣០ មូលដ្ឋានសុខាភិបាលនៅទូទាំងប្រទេស ដែលក្នុងនោះ មូលដ្ឋានសុខាភិបាលសាធារណៈ (មន្ទីរពេទ្យរដ្ឋ) មានចំនួន១ ៣៩៥ និងមូលដ្ឋានសុខាភិបាលឯកជន (មន្ទីរពេទ្យឯកជន) មានចំនួន១៣៥។

លោក ម៉េង ហុង អគ្គនាយកស្ដីទីបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ បានចាត់ទុកការចូលរួមសហការពីមូលដ្ឋានសុខាភិបាល ដែលបានចុះកិច្ចព្រមព្រៀងជាមួយ ប.ស.ស គឺជាកត្តាសំខាន់ និងចាំបាច់បំផុតក្នុងការធ្វើឱ្យប្រសើរឡើងនៃការផ្តល់សេវាជូនសមាជិក ប.ស.ស ប្រកបដោយប្រសិទ្ធភាព និងទាន់ពេលវេលា។

ទន្ទឹមនឹងការកើនឡើងមូលដ្ឋានសុខាភិបាលជាដៃគូនេះ ប.ស.ស ក៏បានបន្តខិតខំប្រឹងប្រែងស្វែងរកកិច្ចសហការជាមួយក្រសួងសុខាភិបាល ដើម្បីពង្រឹងយន្តការតាមដានគុណភាពនៃការផ្តល់សេវារបស់មូលដ្ឋានសុខាភិបាល ដែលជាដៃគូរបស់ ប.ស.ស នេះឱ្យកាន់តែប្រសើរឡើងបន្ថែមទៀត ប្រកបដោយប្រសិទ្ធភាព គុណភាពខ្ពស់ ទាន់ពេលវេលា និងជាទំនុកចិត្តដល់អ្នកមកទទួលសេវា ដែលជាសមាជិក ប.ស.ស។ បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ ក៏បានតែងអំពាវនាវដល់មូលដ្ឋានសុខាភិបាលដៃគូឱ្យចូលរួមសហការក្នុងការធ្វើឱ្យប្រសើរឡើងនៃការផ្តល់សេវាជូនសមាជិក ប.ស.ស ផងដែរ។

បើតាមលោក ហេង​ សុផាន់ណារិទ្ធ អគ្គនាយករងបេឡាជាតិសន្តិសុខសង្គម (ប.ស.ស) បច្ចុប្បន្ន របបសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ បាននិងកំពុងអនុវត្តរបបសន្តិសុខសង្គមសំខាន់ៗ ដូចជា៖ របបសន្តិសុខសង្គមផ្នែកហានិភ័យការងារ របបសន្តិសុខសង្គមផ្នែកថែទាំសុខភាព របបសន្តិសុខសង្គមសម្រាប់ប្រាក់សោធនសម្រាប់វិស័យឯកជន និងថ្មីៗនេះ រាជរដ្ឋាភិបាល បានដាក់ឱ្យអនុវត្តរបបសន្តិសុខសង្គមផ្នែកថែទាំសុខភាពតាមរបបវិភាគទានដោយស្ម័គ្រចិត្តសម្រាប់បុគ្គលស្វ័យនិយោជ និងអ្នកនៅក្នុងបន្ទុក ប.ស.ស៕