ក្រសួងមហាផ្ទៃ ឃាត់ខ្លួនក្មេងទំនើង១២០នាក់លើ ៥១ករណី ត្រឹម​រយៈពេល២សប្ដាហ៍ដើមឆ្នាំនេះ

លោក ទូច សុខៈ អ្នកនាំពាក្យរងក្រសួងមហាផ្ទៃ បានឱ្យដឹងថា ក្នុងរយៈពេល២សប្ដាហ៍ គិតពីថ្ងៃទី២ ដល់ថ្ងៃទី១៥ ខែ​មករា ឆ្នាំ២០២៤ សមត្ថកិច្ចចំណុះក្រសួងមហាផ្ទៃ បានបង្ក្រាបករណីក្មេងទំនើងនៅទូទាំងប្រទេសសរុប៥១ករណី និងឃាត់ខ្លួនជនសង្ស័យបាន១២០នាក់ ដើម្បីចាត់ការតាមនីតិវិធី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមរបាយការណ៍ប្រចាំថ្ងៃ ដែលបង្ហាញឱ្យដឹងដោយលោក ទូច សុខៈ គឺការិយាល័យនគរបាលព្រហ្មទណ្ឌទាំងកម្រិតស្រាល និងទាំងកម្រិតធ្ងន់ បាននិងកំពុងតែធ្វើការជាមួយប្រជាពលរដ្ឋនៅតាមមូលដ្ឋាន ​ក្រោមការបញ្ជាផ្ទាល់ពីស្នងការនគរបាលរាជធានី-ខេត្ត រហូតប៉ុស្តិ៍នគរបាលរដ្ឋបាលទូទាំងប្រទេស ដើម្បីដាក់​វិធានការបង្ការ ទប់ស្កាត់ និងបង្ក្រាបក្រុមក្មេងទំនើង។ លោក ទូច សុខៈ បញ្ជាក់ថា តាមការសង្កេត គឺក្រុមក្មេងទំនើងបានបង្កើតជាក្រុមនៅតាមភូមិ ឃុំ សង្កាត់ និង​គ្រឹះស្ថានអប់រំរដ្ឋ ឯកជនមួយចំនួន។

អ្នកនាំពាក្យរងរូបនេះ បន្តថា ករណីបង្ក្រាបក្មេងទំនើង គឺជាចំណុចអាទិភាពមួយ ​ដែលត្រូវដោះស្រាយ​នៅទូទាំងប្រទេសក្នុងចំណោមទិសដៅអាទិភាពទាំង៦ ដែលដាក់ចេញដោយលោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផៃ្ទ តាមទស្សនៈអ្វីៗធ្វើដើម្បីផ្ដល់ភាពកក់ក្ដៅជូនប្រជាពលរដ្ឋ។

បើតាមលោក ទូច សុខៈ លទ្ធផលនៃចំណាត់ការពីមួយសប្តាហ៍ទៅមួយសប្តា​ហ៍ គឺត្រូវបានតាមដានយ៉ាង​យកចិត្តទុកដាក់ពីសំណាក់លោកឧបនាយករដ្ឋមន្ត្រី ស សុខា ដោយលោក តែងក្រើនរំលឹក ផ្សារភ្ជាប់នឹងការកោតសរសើរដល់កិច្ចខិតខំប្រឹងប្រែងរបស់សមត្ថកិច្ច អាជ្ញាធរ ប្រជាការពារ និងតួអង្គពាក់ព័ន្ធទាំងអស់ ព្រមទាំងជំរុញបន្តឱ្យធ្វើការយ៉ាងយក​ចិត្តទុកដាក់បន្ថែមទៀត ដើម្បីបម្រើប្រជាពលរដ្ឋប្រកបដោយការទទួលខុសត្រូវ ម្ចាស់ការតាមតួនាទីភារកិច្ចឱ្យបានលឿនរហ័ស និងទាន់ពេលវេលាតបទៅនឹងបទល្មើសនានា៕