កម្ពុជា ចុះអនុស្សារណៈអនុវត្តគម្រោង “កម្មវិធីបណ្តុះបណ្តាលគ្រូបង្រៀននៅអាស៊ីអាគ្នេយ៍“

នាយកដ្ឋានស្រាវជ្រាវវិទ្យាសាស្រ្ត នៃក្រសួងអប់រំ យុវជន និងកីឡា ព្រះរាជាណាចក្រកម្ពុជា សម្រេចចុះអនុស្សារណៈយោគយល់គ្នា (MoU) ជាមួយមជ្ឈមណ្ឌល SEAMEO STEM-ED ដើម្បីអនុវត្តគម្រោង “កម្មវិធីបណ្តុះបណ្តាលគ្រូបង្រៀននៅអាស៊ីអាគ្នេយ៍“ ដែលជាភាសាអង់គ្លេសហៅថា “Southeast Asian Teacher Education Programme (SEA-TEP)”។ នេះបើតាមការផ្ដល់ព័ត៌មានពីក្រសួងអប់រំ យុវជន និងកីឡា នៅថ្ងៃទី១៩ ខែមករា ឆ្នាំ២០២៤ នេះ។

ពិធីចុះអនុស្សារណៈយោគយល់គ្នានេះ ប្រារព្ធក្រោមអធិបតីភាព បណ្ឌិត ទូច វិសាលសុខ រដ្ឋលេខាធិការក្រសួងអប់រំ យុវជន និងកីឡា តំណាង បណ្ឌិតសភាចារ្យឧបនាយករដ្ឋមន្រ្តី នៅទីស្តីការក្រសួងអប់រំ យុវជន និងកីឡា នាថ្ងៃទី១៨ ខែមករា ឆ្នាំ២០២៤។

គម្រោងនេះមានរយៈពេល ២ឆ្នាំ និងមានប្រទេសចំនួន ៤ ចូលរួមដូចជា៖ ប្រទេសថៃ ឥណ្ឌូណេស៊ី កាហ្សាស្ថាន និងកម្ពុជា។ គោលបំណងនៃគម្រោងនេះ គឺដើម្បីអភិវឌ្ឍសមត្ថភាពគ្រូបង្រៀនលើវិធីសាស្រ្តបង្រៀន និងសមត្ថភាពរៀបចំឯកសារបង្រៀន និងការស្រាវជ្រាវផ្នែកស្ទែមនៅកម្ពុជា ដោយមានគ្រឹះស្ថានបណ្តុះបណ្តាលគ្រូចូលរួមចំនួន ៣។

គ្រឹះស្ថានទាំង ៣ នោះរួមមាន៖ វិទ្យាស្ថានជាតិអប់រំ វិទ្យាស្ថានគរុកោសល្យរាជធានីភ្នំពេញ និងវិទ្យាស្ថានគរុកោសល្យបាត់ដំបង ចូលរួមអនុវត្តផ្ទាល់ និងនាយកដ្ឋានស្រាវជ្រាវវិទ្យាសាស្រ្ត និងអ្នកពាក់ព័ន្ធផ្សេងៗមកពីក្រសួងអប់រំ យុវជន និងកីឡា ជាក្រុមការងារស្រាវជ្រាវ៕