រដ្ឋាភិបាលតាមដានដោះស្រាយបញ្ហាខ្វះខាតទឹក និងផ្ដល់បច្ចេកទេសកសិកម្ម ខណៈស្រូវឡើងថ្លៃ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសសន៍ថា រាជរដ្ឋាភិបាលបានតាមដានបញ្ហាខ្វះខាតទឹកជាប្រចាំ ព្រមទាំងគិតគូរផ្ដល់បច្ចេកទេសកសិកម្ម ខណៈឆ្នាំនេះស្រូវបានថ្លៃ កសិករសម្រុកធ្វើស្រូវប្រាំងលើសផែនការ ជាង ២ដង។

ការមានប្រសាសន៍នេះ ធ្វើឡើង ក្នុងឱកាស សម្តេចមហាបវរធិបតី ហ៊ុន ម៉ាណែត អញ្ជើញជាអធិបតី ក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសង្គម​កិច្ច អតីតយុទ្ធជន និងយុវនីតិសម្បទា នាព្រឹកថ្ងៃអង្គារ ថ្ងៃទី៦ ខែកុម្ភៈ ឆ្នាំ២០២៤ នេះ។

សម្ដេចធិបតី ហ៊ុន ម៉ាណែត មានប្រសាសន៍ថា ឆ្នាំនេះស្រូវឡើងថ្លៃល្អ ខណៈរាជរដ្ឋាភិបាលបានតាមដានបញ្ហាការប្រើប្រាស់ទឹក ការបង្កបង្កើនផល គ្រាន់តែនៅពោធិ៍សាត់មួយ គ្រាន់តែធ្វើលើសផែនការ ២៧៩% ១ ជា ២។

សម្ដេចធិបតី ហ៊ុន ម៉ាណែត មានប្រសាសន៍បញ្ជាក់បន្ថែមថា៖ “អ៊ីចឹងយើងដាក់អន្តរគមន៍ដោះស្រាយទឹក ផ្ដល់ការជួយផ្សេងជូនគាត់។ ហើយចុងក្រោយ កម្មវីធីដាក់ពង្រាយបច្ចេកទេសកសិកម្ម។ យើងប្រឡងជ្រើសរើសមន្ត្រី គឺដើម្បីជួយកសិករឱ្យពួកគាត់រឹងដៃរឹងជើងខ្លួនឯង មិនមែនឱ្យពួកគាត់ពឹងផ្អែកលើមន្ត្រីបច្ចេកទេសទៅដាំដុះឱ្យគាត់ លក់ឱ្យគាត់ទេ”។

ដោយសារស្រូវឆ្នាំនេះឡើងថ្លៃ ប្រជាកសិករបានសម្រុកធ្វើស្រែប្រាំងរហូតលើសផែនការ ១ ទ្វេជា ២។ ក្នុងនោះខេត្តដែលជួបបញ្ហាខ្វះទឹកធ្វើស្រែប្រាំងដូចជា ពោធិ៍សាត់ បាត់ដំបង បន្ទាយមានជ័យ កំពង់ចាម កណ្ដាល ស្វាយរៀង ជាដើម។ ក្នុងពេលប្រជាកសិករខ្វះទឹកធ្វើស្រែប្រាំង និងប្រើប្រាស់នេះ អាជ្ញាធរខេត្តនីមួយៗបានជួយអន្តរគមន៍ដោយបូមទឹកបញ្ជូនតាមប្រឡាន ប្រព័ន្ធធារាសាស្ត្រនានា ដើម្បីសង្គ្រោះស្រូវប្រាំង។

គួរបញ្ជាក់ថា ពិធីបើកសន្និបាតត្រូវបានធ្វើឡើងក្រោមអធិបតីភាព លោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធ​ជន និងយុវនីតិសម្បទា។ ពិធីបើកនេះ ក៏មានការអញ្ជើញចូលរួមពីថ្នាក់ដឹកនាំក្រសួង ថ្នាក់ដឹកនាំអង្គភាពស្ថិតក្រោម​សមត្ថ​កិច្ចក្រសួង ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានី-ខេត្ត ប្រធានសាខាមូលនិធិជាតិជំនួយសង្គមរាជធានី-ខេត្តទាំង២៥ ព្រមទាំង​តំណាង​ក្រសួង ស្ថាប័នពាក់ព័ន្ធ តំណាងអង្គការសង្គមស៊ីវិលជាដៃគូអភិវឌ្ឍន៍ទាំងជាតិ និងអន្តរជាតិផងដែរ។ សន្និ​បាត​នោះ បានអនុញ្ញាតឱ្យថ្នាក់ដឹកនាំអង្គភាពជំនាញឡើងធ្វើបទ​អន្តរាគមន៍ ក៏ដូចជាការផ្តល់មតិផ្សេងៗ​ពីថ្នាក់ដឹកនាំក្រសួង ដើម្បីកែលំអរចំណុចខ្វះខាត ក៏ដូចជាផ្តល់ជាទស្សនទានល្អៗបន្ថែមជំរុញឱ្យការងារ​កាន់​តែល្អប្រសើរ។

ក្រសួងសង្គមកិច្ច អតីតយុទ្ធជន និងយុវនីតិសម្បទាមានមុខងារ និងភារកិច្ចរៀបចំ និងអនុវត្តគោល​នយោ​បាយ យុទ្ធសាស្ត្រទិសដៅ និងផែនការរួមរបស់រាជរដ្ឋាភិបាល ក្នុងវិស័យសង្គមកិច្ច អតីតយុទ្ធជន និងយុវនី​តិសម្បទា, រៀបចំគោលនយោបាយ ផែនការយុទ្ធសាស្រ្តផែនការសកម្មភាព គោលដៅ ទិសដៅ កម្មវិធី យន្ត​ការ​ក្នុងការគ្រប់គ្រង ដឹកនាំ ចាត់ចែង ផ្តល់សេវាគាំពារដល់មុខសញ្ញាក្នុងវិស័យសង្គមកិច្ច អតីតយុទ្ធ​ជន និងយុវនីតិសម្បទា, កសាង និងអនុវត្តលិខិតបទដ្ឋានគតិយុត្ត គោលការណ៍ណែនាំ និងផែន​ការ​ពាក់​ព័ន្ធ​នឹងវិស័យសង្គមកិច្ច អតីតយុទ្ធជន និងយុវនីតិសម្បទាស្របតាមលិខិតបទដ្ឋានជាតិ និងអន្តរជាតិ, សិក្សា​ស្រាវជ្រាវបែបវិទ្យាសាស្ត្រលើផ្នែកសង្គមកិច្ច គ្រប់គ្រងការងារស្មុំកូនក្នុង​ប្រទេស និង អន្តរប្រទេស, ដឹកនាំ គ្រប់គ្រង និងសហការជាមួយដៃគូ អង្គការមិនមែនរដ្ឋាភិបាលនានាដែលធ្វើសកម្ម​ភាព លើវិស័យសង្គមកិច្ច អតីតយុទ្ធជន និងយុវនីតិសម្បទា, រៀបចំបង្កើតយន្តការជំរុញបំផុសការចូលរួម​សកម្មភាពការងារសង្គមកិច្ច សាមគ្គីធម៌សង្គម លើកទឹកចិត្តដល់ក្រុមហ៊ុន សហគ្រាសរដ្ឋ ឯកជន អង្គការមនុស្សធម៌ ដៃគូអភិវឌ្ឍ សហគមន៍ និង មហាជនដែលបានចូលរួមសកម្មភាពដើម្បីសង្គម, អនុវត្ត​ភារកិច្ច​ផ្សេងៗទៀត ដែលរាជរដ្ឋាភិបាលប្រគល់ជូនក្រសួងសង្គមកិច្ច អតីតយុទ្ធជន និងយុវនីតិសម្បទា៕