មន្ត្រី ថា ការរិះគន់ដើម្បីកែលម្អ​ រាជរដ្ឋាភិបាល នឹងយកមកពិចារណា​ ហើយដោះស្រាយ

មន្ត្រីរាជរដ្ឋាភិបាល លើកឡើងថា រាល់ការរិះគន់ដែលមានចរិតកែលម្អ ដើម្បីផលប្រយោជន៍ជាតិ និងប្រជាជន រាជរដ្ឋាភិបាលស្វាគមន៍ និងរីករាយទទួលយកមកពិចារណា និងខិតខំដោះស្រាយជូន។

ការលើកឡើងបែបនេះ ក្រោយសង្កេតឃើញថា ជារឿយៗតែងមានការរិះគន់ ចោទប្រកាន់ ជាពិសេសចែករំលែកព័ត៌មានមួយចំនួននៅលើបណ្ដាញទំនាក់ទំនងសង្គម ពាក់ព័ន្ធទៅនឹងបញ្ហាប្រឈមនៅតាមមូលដ្ឋាន ក៏ដូចជាចំណុចមិនប្រក្រតីផ្សេងៗនៅក្នុងសង្គម។ ប៉ុន្តែ រាល់ការរិះគន់ និងការចែករំលែកព័ត៌មានខ្លះហាក់ប្រាសចាកពីការពិត មានលក្ខណៈកុហក ភូតភរ ឬបំផ្លើសបំភ្លៃលើសពីសភាពជាក់ស្ដែង ជាដើម។

លោក គួច វែងស្រ៊ុន រដ្ឋលេខាធិការទីស្ដីការគណៈរដ្ឋមន្ត្រី បានលើកឡើងនៅលើបណ្ដាញទំនាក់ទំនងសង្គមហ្វេសប៊ុករបស់លោក ដូច្នេះថា៖ «រិះគន់ដើម្បីកែលម្អ​ ចែករំលែកព័ត៌មានពិត​ រាជរដ្ឋាភិបាល នឹងយកមកពិចារណា​ ហើយ កែសម្រួល»​។ លោករដ្ឋលេខាធិការ បានគូសបញ្ជាក់ថា បើសិនជាបញ្ហាពិត​ ជាពិសេសបានផ្ដល់ផលប៉ះពាល់ដល់ផលប្រយោជន៍រួមរបស់ជាតិ​ និងប្រជាជន​ ហើយមហាជនមានការប្រតិកម្មខ្ពស់​ រាជរដ្ឋាភិបាល​ តែងមានចំណាត់ការជាប់ជាប្រចាំ​ និងប្រកបដោយភាពម៉ឺងម៉ាត់បំផុត។

លោករដ្ឋលេខាធិការ បានបញ្ជាក់បន្ថែមថា ក្រុមបុគ្គលខ្លះ​ មិនមែនចែកចាយព័ត៌មាន ដើម្បីចេតនាវិជ្ជមាននោះឡើយ​ តែជាការចែកចាយ ឬផ្សព្វផ្សាយព័ត៌មាន ដែលមានលក្ខណៈជាការបញ្ឆេះកំហឹងមហាជនឱ្យខឹង ឬស្អប់អាជ្ញាធរ​ និងមូលបង្កាច់ភាពត្រឹមត្រូវ​ ក៏ដូចជាអ្វីដែលជាសកម្មភាព​ និងសមិទ្ធផលរបស់រាជរដ្ឋាភិបាលដែលបានខិតខំបម្រើផលប្រយោជន៍ជាតិ​ និងប្រជាជនទៅវិញ​។

មន្រ្តីរាជរដ្ឋាភិបាលរូបនេះ បានសង្កត់ធ្ងន់ថា ទង្វើបែបនេះរបស់ពួកគេ គឺក្នុងគោលដៅតែមួយមុខគត់​ គឺនយោបាយខ្មៅងងឹត ហើយចង់គេងចំណេញពេក​ តាមរយ:ការកុហកបោកប្រាស់នេះ​ ក៏បានបង្ហាញពីសណ្តាននៃចរឹតដ៏ខ្មៅរបស់អ្នកទាំងនោះផងដែរ៕