លោក ទូច សុខៈ ៖១សប្តាហ៍ មន្ត្រីផ្តល់សេវាអត្តសញ្ញាណកម្មដល់ពលរដ្ឋជិត២ម៉ឺនសេវានៅទូទាំងប្រទេស

បើតាមអ្នកនាំពាក្យរងក្រសួងមហាផ្ទៃ លោក ទូច សុខៈ បានឱ្យដឹងថា នៅក្នុងសប្ដាហ៍កន្លងទៅ មន្រ្តីអត្តសញ្ញាណកម្មទូទាំងប្រទេស ក្របខណ្ឌអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ បាន ផ្ដល់ សេវា អត្តសញ្ញាណកម្ម ជូនប្រជាពលរដ្ឋ ទាំង២៥ខេត្ត ក្រុង បានចំនួន១៦.៦២២សេវា។

តាមប្រភពដដែលបានបង្ហាញថា សម្រាប់សប្ដាហ៍ចុងក្រោយនេះវិញ សេវាដែលបានផ្ដល់ជូនប្រជាពលរដ្ឋនោះរួមមាន សេវាអត្តសញ្ញាណបណ្ណមានចំនួន៥.៥០៦សន្លឹក។ លិខិតឆ្លងដែនមានចំនួន៥.៦៨៦លិខិត ចំណែកលិខិតធ្វើដំណើរមានចំនួន១.៣២៨លខិត រីឯ សៀវភៅស្នាក់នៅមានចំនួន២.២៧៩ក្បាល និងសៀវភៅគ្រួសារមានចំនួន១.៨២៣ក្បាល។

 តាមអនុសាសន៍ណែនាំដ៏ខ្ពង់ខ្ពស់របស់សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងទស្សនៈ«អ្វីៗធ្វើដើម្បីផ្ដល់ភាពកក់ក្ដៅជូនប្រជាពលរដ្ឋ» របស់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ, អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ មិនត្រឹងតែស្វះស្វែងផ្តល់សេវាកម្មជូនពលរដ្ឋក្នុងប្រទេសនោះទេ ក៏បាននឹងកំពុងសហការជាមួយស្ថានទូតព្រះរាជាណាចក្រកម្ពុជាប្រចាំនៅសាធារណរដ្ឋកូរ៉េ (ខាងត្បូង) ផ្តល់សេវាលិខិតឆ្លងដែនធម្មតាជូនពលរដ្ឋ និងពលករខ្មែរនៅទីនោះផងដែរ៕