សម្ដេច ហ៊ុន ម៉ាណែត៖ឱ្យតែផ្ដល់ឱកាស គណបក្សប្រជាជននៅតែបន្តបម្រើពលរដ្ឋតាមកិច្ចសន្យា

«ឱ្យតែពលរដ្ឋផ្ដល់ឱកាស គណបក្សប្រជាជនកម្ពុជានៅតែបន្តបម្រើប្រយោជន៍ពលរដ្ឋតាមកិច្ចសន្យារបស់ខ្លួន ដោយមិនភូតភរឡើយ»។ នេះជាការថ្លែងរបស់សម្ដេចធិបតី ហ៊ុន ម៉ាណែត នៅចំពោះមុខប្រជាពលរដ្ឋក្នុងពិធីសម្ពោធមន្ទីរពេទ្យតេជោសែន កោះធំ ខេត្តកណ្ដាល នាព្រឹកថ្ងៃពុធនេះ។

អញ្ជើញជាអធិបតីក្នុងពិធីសម្ពោធមន្ទីរពេទ្យតេជោសែន កោះធំ នាព្រឹកថ្ងៃទី១៣ ខែមីនា ឆ្នាំ២០២៤នេះ សម្ដេចធិបតី ហ៊ុន ម៉ាណែត ថ្លែងអំណរគុណដល់ប្រជាពលរដ្ឋទាំងអស់ចំពោះការជឿទុកចិត្តលើការដឹកនាំរបស់គណបក្សប្រជាជនកម្ពុជាជាង ៤០ឆ្នាំមកនេះ ជាពិសេសតាមរយៈការបោះឆ្នោតគាំទ្រយ៉ាងច្រើនលើសលប់ នាពេលកន្លងមក។

សម្ដេចធិបតី បានបញ្ជាក់ថា តាមរយៈការគាំទ្រយ៉ាងច្រើនលើសលប់នេះ គឺជាការផ្ដល់ឱកាសជូនគណបក្សប្រជាជនកម្ពុជា ក្នុងការបន្តដឹកនាំប្រទេសជាតិតទៅមុខ ក្នុងបុព្វហេតុបម្រើប្រយោជន៍ប្រជាពលរដ្ឋ និងប្រទេសជាតិឱ្យកាន់តែរីកចម្រើនថែមទៀត។ ម៉្យាងវិញទៀត ការគាំទ្រនេះទៀតសោត គឺសំខាន់ណាស់ ក៏ជាការផ្ដល់នូវលទ្ធភាពដើម្បីឱ្យរាជរដ្ឋាភិបាល ដឹកនាំដោយគណបក្សប្រជាជនកម្ពុជា អាចដាក់ចេញនូវគោលនយោបាយ ក៏ដូចជាដាក់ចេញឱកាសក្នុងការកសាងបន្ថែមនូវសមិទ្ធផលជូនជាតិ និងប្រជាជន។

ដូច្នេះ សម្ដេចនាយករដ្ឋមន្ត្រី បានសង្កត់ធ្ងន់ថា «ឱ្យតែផ្ដល់ឱកាស គណបក្សប្រជាជនកម្ពុជា នៅតែបម្រើប្រជាជន និងកសាងសមិទ្ធផលតាមកិច្ចសន្យា ដោយមិនមានការភូតកុហក នេះជាកិច្ចការសំខាន់»៕