ព័ត៌មានជាតិ

ក្រសួងការងារ អំពាវនាវពលរដ្ឋមានរបរផ្ទាល់ខ្លួនធ្វើបណ្ណ ប.ស.ស ដើម្បីទទួលបានអត្ថប្រយោជន៍ផ្នែកថែទាំសុខភាពពីរាជរដ្ឋាភិបាល

បានផុស

១ year មុន

នៅ

ថ្ងៃសុក្រ ១៥ មីនា ២០២៤

ដោយ

លោក ម៉េង ហុង អគ្គនាយកបេឡាជាតិសន្តិសុខសង្គមស្ដីទី នៃក្រសួងការងារ និងបណ្ដុះបណ្ដាលវិជ្ជាជីវៈ អំពាវនាវដល់ប្រជាពលរដ្ឋពុំទាន់មានបណ្ណសមាជិក ប.ស.ស ជាពិសេសអ្នកប្រកបរបររកស៊ីដោយខ្លួនឯង (បុគ្គលស្វ័យនិយោជន៍) និងអ្នកនៅក្នុងបន្ទុកសមាជិក ប.ស.ស មកធ្វើបណ្ណ ប.ស.ស ឱ្យបានគ្រប់ៗ គ្នា ដើម្បីទទួលបានអត្ថប្រយោជន៍ផ្នែកថែទាំសុខភាពពីរាជរដ្ឋាភិបាល ខណៈគិតត្រឹមបំណាច់ខែកុម្ភៈ ឆ្នាំ ២០២៤ ចំនួនសមាជិក ប.ស.ស សរុបកើនដល់ជាង ២ លាននាក់ រួចមកហើយ។ ក្នុងនោះសមាជិក ប.ស.ស ជាស្ត្រី មានចំនួនប្រមាណជា ១ លាន ១៥ ម៉ឺននាក់ ដែលកំពុងមានសិទ្ធិទទួលបានសេវាពិនិត្យ និងព្យាបាលជំងឺនៅតាមមូលដ្ឋានសុខាភិបាលដៃគូ ប.ស.ស ដោយឥតបង់ថ្លៃទូទាំងប្រទេស ព្រមទាំងទទួលបានអត្ថប្រយោជន៍របបសន្តិសុខសង្គមផ្សេងៗ ជាច្រើនទៀតផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្ថែមថា ការមានបណ្ណ ប.ស.ស គឺមានសារៈសំខាន់ណាស់សម្រាប់ខ្លួនឯង និងគ្រួសារ ពិសេសអាចធានានូវការចំណាយថវិកាផ្ទាល់ខ្លួននៅពេលមានជំងឺ ឬគ្រោះថ្នាក់ជាយថាហេតុណាមួយ ព្រមទាំងជាការរួមចំណែកធានានូវនិរន្ដរភាពរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត និងដើម្បីសម្រេចបាននូវការគ្របដណ្ដប់សុខភាពជាសកល ស្របតាមយុទ្ធសាស្ត្របញ្ចកោណ ដំណាក់កាលទី ១ របស់រាជរដ្ឋាភិបាល។

គួរកត់សម្គាល់ថា បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្មីៗ នេះ បានលើកបង្ហាញពីទិសដៅអនុវត្តបន្តរបស់ខ្លួនក្នុងឆ្នាំ ២០២៤ ដើម្បីធានាប្រសិទ្ធភាពការងារក្នុងការគាំពារសុខុមាលភាពពលរដ្ឋកម្ពុជា និងផ្សព្វផ្សាយអំពីរបបសន្តិសុខសង្គម ទៅដល់ប្រជាពលរដ្ឋកម្ពុជានៅទូទាំងប្រទេស។ ក្នុងនោះ ប.ស.ស នឹងបន្តពង្រីកការផ្សព្វផ្សាយអំពីរបបថែទាំសុខភាពតាមរបបភាគទានដោយស្ម័គ្រចិត្ត ដល់មន្ត្រីរាជការតាមក្រសួងស្ថាប័ន, បន្តជំរុញការផ្សព្វផ្សាយអំពីអត្ថប្រយោជន៍របបសន្តិសុខសង្គមគ្រប់រូបភាព និងគ្រប់ទម្រង់ប្រកបដោយភាពប្រទាក់ក្រឡាគ្នា, សិក្សារៀបចំ និងបង្កើតក្រុមការងារសម្របសម្រួលចុះបញ្ជីចល័តនៅតាមទីប្រជុំជន,ផ្សារ និងបន្តពង្រឹង ព្រមទាំងបង្កើនគុណភាព ប្រសិទ្ធភាព នៃការផ្តល់សេវាមូលដ្ឋានសុខាភិបាលជាដៃគូ ប.ស.ស ដែលជាការចាំបាច់បំផុត។

អនុលោមតាមទិសដៅអាទិភាព នៃ “យុទ្ធសាស្ត្របញ្ចកោណ-ដំណាក់កាលទី ១” និង “កម្មវិធីនយោបាយអាទិភាព” របស់រាជរដ្ឋាភិបាលក្នុងអាណត្តិនេះ បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ ត្រូវបានចាត់ទុកជាបេសកកម្មអាទិភាពដ៏សំខាន់ ដើម្បីធានាការអនុវត្តរបបសន្តិសុខសង្គម ប្រកបដោយសមធម៌ និងសាមគ្គីធម៌សង្គមក្នុងការលើកកម្ពស់សុខុមាលភាព និងជីវភាពប្រជាពលរដ្ឋ។

ទន្ទឹមនឹងនេះ ដើម្បីបន្តជំរុញការអភិវឌ្ឍរបបសន្តិសុខសង្គមដល់កម្មករ-និយោជិត និងមន្ត្រីសាធារណៈ អតីតមន្ត្រីរាជការ និងអតីតយុទ្ធជន បុគ្គលស្វ័យនិយោជន៍ អ្នកក្នុងបន្ទុកសមាជិក ប.ស.ស និងចូលរួមអនុវត្តគោលនយោបាយវិស័យសេដ្ឋកិច្ចក្រៅប្រព័ន្ធផងនោះ បេឡាជាតិសន្តិសុខសង្គម (ប.ស.ស) ក៏បាននិងកំពុងអនុវត្តសកម្មភាពតាមរយៈកម្មវិធីអាទិភាពចំនួន ៥ រួមមាន ៖ ទី ១.ការពង្រីកវិសាលភាព នៃការអនុវត្តរបបសន្តិសុខសង្គម។ ទី ២.ការពង្រឹងគុណភាព និងសមត្ថភាពផ្ដល់សេវា។ ទី ៣.ការលើកកម្ពស់ការយល់ដឹង និងពង្រឹងការអនុវត្តច្បាប់។ ទី ៤.ការធានានិរន្តរភាពមូលនិធិសន្តិសុខសង្គម។ និង ទី ៥.ការអភិវឌ្ឍសមត្ថភាពស្ថាប័ន៕