ព័ត៌មានជាតិ

រដ្ឋបាលរាជធានីកំពុងជួសជុលជង្ហុកសំបុកមាន់ មហាវិថីព្រះនរោត្តម មុននឹងអនុវត្តតាមគម្រោងដោយអ៊ុតកៅស៊ូAC កម្រាស់០.៥សង់ទីម៉ែត្រ

បានផុស

១ year មុន

នៅ

ថ្ងៃអាទិត្យ ២១ កុម្ភៈ ២០២១

ដោយ

រដ្ឋបាលរាជធានីភ្នំពេញ បាននឹងកំពុងជួសជុលសំបុកមាន់មហាវិថីព្រះនរោត្តម មុននឹងអនុវត្តតាមគម្រោង ដោយធ្វើការអ៊ុតកៅស៊ូAC កម្រាស់០.៥ សង់ទីម៉ែត្រ ដើម្បីដាក់ឱ្យបងប្អូនប្រជាពលរដ្ឋធ្វើដំណើរងាយស្រួលជាងមុន និងដើម្បីលើកសោភ័ណភាពរាជធានីភ្នំពេញឲ្យកាន់តែស្រស់បំព្រងផងដែរ។

រដ្ឋបាលរាជធានីភ្នំពេញបានយក ចិត្តទុកដាក់ជាបន្តបន្ទាប់ ពីបញ្ហាការខូចខាតផ្លូវ ជង្ហុកសំបុកមាន់ ការកកស្ទះចរាចរណ៍និងរៀបចំសណ្ដាប់ធ្នាប់នៅតាមបណ្ដាមហាវិថីតូចធំនិងផ្លូវតូចៗមួយចំនួនធំក្នុងមូលដ្ឋានទាំង១៤ខណ្ឌ ដើម្បីកាត់បន្ថយការកកស្ទះចរាចរណ៍ផងដែរ។ សំរាប់មូលដ្ឋានខណ្ឌដូនពេញរដ្ឋបាលរាជធានីភ្នំពេញ បាននឹងកំពុងដំណើរការអ៊ុតកៅស៊ូប្រភេទAC ចំនួន១៦ខ្សែ ដែលរងការខូចខាតត្រូវជួសជុលជង្ហុក សំបុកមាន់ និងអ៊ុតកៅស៊ូឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅពេលនេះក្រុមការងារបាននឹងកំពុង សកម្មភាពជួសជុលសំបុកមាន់ ផ្លូវអ៊ុតកៅស៊ូAC នៅបណ្តោយមហាវិថីព្រះនរោត្តម ចាប់ពីរង្វង់មូល រមណីយដ្ឋានវប្បធម៌ ប្រវត្តិសាស្ត្រវត្តភ្នំ រហូតរង្វង់មូលវិមានឯករាជ្យ។ បន្ទាប់ពីជួសជុលសំបុកមាន់រួចរាល់ មន្ត្រីជំនាញនឹង អនុវត្តតាមគម្រោង ដោយធ្វើការអ៊ុតកៅស៊ូAC កម្រាស់០.៥ សង់ទីម៉ែត្រ ដើម្បីដាក់ឱ្យបងប្អូនប្រជាពលរដ្ឋធ្វើដំណើរងាយស្រួលជាងមុន និងដើម្បីលើកសោភ័ណភាពទីក្រុងផងដែរ។

សូមបញ្ជាក់ថា គម្រោង ជួសជុលផ្លូវអ៊ុតកៅស៊ូ ប្រភេទAC កម្រាស់ ០.៥សង់ទីម៉ែត្រ នេះជាគម្រោង ថវិការបស់រដ្ឋបាលរាជធានីភ្នំពេញ ក្រោមគំនិតផ្ដួចផ្ដើមរបស់លោក ឃួង ស្រេង អភិបាល នៃគណៈអភិបាលរាជធានីភ្នំពេញ ដែលលោកតែងតែយកចិត្តទុកដាក់អំពីការងារអភិវឌ្ឍន៍មូលដ្ឋាន ក្នុងគោលបំណងលើកកម្ពស់ជីវភាព និងការរស់នៅរបស់ប្រជាពលរដ្ឋឱ្យកាន់តែល្អប្រសើរឡើងមួយកម្រិតទៀត៕

អត្ថបទ ៖ ស្រីរ័ត្ន