ច្រកចូលកោះពេជ្រមួយទៀតទើបបើកឱ្យចរាចរណ៍ឡើងវិញ

បន្ទាប់ពីបិទចរាចរណ៍ពីយប់រំលងអធ្រាត្រឈានចូលថ្ងៃសៅរ៍ ទី២០ ខែកុម្ភៈ នេះមក រដ្ឋបាលសាលារាជធានីភ្នំពេញ បានបើកឱ្យប្រជាពលរដ្ឋធ្វើចរាចរណ៍លើស្ពានឥន្ទធនូដើម្បីចេញចូលទីក្រុងកោះពេជ្រឡើងវិញ។

លោក ថេង សុថុន អភិបាល ខណ្ឌចំការមន បានប្រាប់ កម្ពុជាថ្មី នៅយប់នេះថា ការបើកច្រកស្ពានឥន្ទធនូនេះ តាមបទបញ្ជាពីអភិបាលរាជធានីភ្នំពេញ។

លោក ថេង សុថុន ផ្ញើសារតាម Telegram ថា៖ “ចុងក្រោយនេះដោយមានបទបញ្ជាថ្មីពីឯកឧត្ដម ឃួង ស្រេង អភិបាលរាជធានីភ្នំពេញ បានអនុញ្ញាតអោយបើកចរាចរណ៍ផ្លូវលើស្ពានឥន្ធធនូវិញហើយ នៅតែស្ពានហង្សទេដែលនៅបិទដដែល”។

គួរបញ្ជាក់ថា បន្ទាប់ពីរកឃើញ អ្នកស្នាក់នៅខុនដូមួយដែលស្ថិតនៅ ទីក្រុងកោះពេជ្រ វិជ្ជមានវីរុសកូវីដ១៩ នោះ ធ្វើឱ្យអាជ្ញាធរបិទគ្រប់ច្រកចេញចូលទាំង៣ទីក្រុងកោះពេជ្រទាំងយប់ គឺទុកតែច្រកតាមស្ពាននាគភ្លោះប៉ុណ្ណោះជូនសាធារណជនចេញចូលកោះពេជ្របាន។

គួររំលឹកថា កាលពីព្រឹកថ្ងៃសៅរ៍ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសការឆ្លងកូវីដ-១៩ចូលសហគមន៍លើកទី៣នៅកម្ពុជា ដែលហៅថា “ព្រឹត្តិការណ៍សហគមន៍ ២០ កុម្ភៈ” ឈានទៅដល់បិទទីតាំងពាក់ព័ន្ធមួយចំនួនដូចជា ទីក្រុងកោះពេជ្រ និង ក្លឹប N8 នៅរាជធានីភ្នំពេញ និងភោជនីយដ្ឋាននៅក្រុងតាខ្មៅ ខេត្តកណ្ដាល ជាដើម។

តាមសេចក្ដីប្រកាសរបស់ក្រសួងសុខាភិបាលថ្ងៃនេះ បានបញ្ជាក់ថា គិតត្រឹមថ្ងៃទី២០ កុម្ភៈ កម្ពុជាបានរកឃើញអ្នកផ្ទុកមេរោគកូវីដ-១៩ ពាក់ព័ន្ធ “ព្រឹត្តិការណ៍ ២០ កុម្ភៈ” ចំនួន៤៣នាក់ហើយ ដែលភាគច្រើនជាជនជាតិចិន៕

អត្ថបទៈ ច័ន្ទ វីរៈ

សូមអានអត្ថបទពាក់ព័ន្ធ៖ សង្ស័យបុគ្គលិកភោជនីយដ្ឋាន នៅក្រុងតាខ្មៅ ពាក់ព័ន្ធព្រឹត្តិការណ៍ ២០ កុម្ភៈ

សម្ដេចតេជោ ហ៊ុន សែន ប្រកាស ព្រឹត្តិការណ៍សហគមន៍លើក​ទី៣​នៅកម្ពុជា “ព្រឹត្តិការណ៍​សហគមន៍ ២០ កុម្ភៈ”​