ពិធីបុណ្យចូលឆ្នាំថ្មីរៀបចំបានល្អ ខណៈបញ្ហានានាថយចុះ ៣០ ភាគរយ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ ថា ការរៀបចំពិធីបុណ្យចូលឆ្នាំថ្មីប្រពៃណីជាតិនៅឆ្នាំនេះរៀបចំបានល្អ ចំណែកបញ្ហានានាបានថយចុះប្រមាណ ៣០ ភាគរយ។ ការថ្លែងនេះ ធ្វើឡើង ខណៈសម្ដេចធិបតី អញ្ជើញជាអធិបតីសម្ពោធដាក់ឱ្យប្រើប្រាស់អគារសហសិក្សា អគារស្នាក់នៅ និងអគារអាហារដ្ឋាននៅសាកលវិទ្យាល័យការពារជាតិ នៅព្រឹកថ្ងៃទី១៩ ខែមេសា ឆ្នាំ២០២៤ នេះ។

សម្តេចធិបតី ហ៊ុន ម៉ាណែត មានប្រសាសន៍ថា ការរៀបចំពិធីបុណ្យចូលឆ្នាំថ្មីប្រពៃណីជាតិនៅឆ្នាំនេះរៀបចំបានល្អ បង្កភាពសប្បាយរីករាយជូនប្រជាពលរដ្ឋនៅគ្រប់ទីកន្លែង ដោយប្រជាពលរដ្ឋមិនបាច់ធ្វើដំណើរទៅកម្សាន្តនៅទីតាំង ឬខេត្តឆ្ងាយ ខណៈមូលដ្ឋាន និងខេត្តរបស់ខ្លួនមានការលេងល្បែងប្រជាប្រិយ និងប្រារព្ធកម្មវិធីអបអរបុណ្យចូលឆ្នាំថ្មី យ៉ាងអធិកអធម ផងដែរ។

សម្តេចធិបតី ហ៊ុន ម៉ាណែត មានប្រសាសន៍ថា៖ “បាតុភាពអវិជ្ជមាន ការឈ្លោះទាស់ទែង ការវ៉ៃគ្នា ក៏មិនឃើញមានច្រើន ហើយបញ្ហាអសន្តិសុខផ្សេងៗថយចុះ ៣០% ឆ្នាំនេះ ប្រៀបធៀបឆ្នាំទៅ។ ហើយការលេងដោយគោរពគ្នាជាច្រើន នេះជាស្មារីអបអរសាទររបស់ប្រជាជាតិខ្មែរសម្រាប់បុណ្យចូលឆ្នាំថ្មី”។

ជាមួយគ្នានេះ សម្តេចធិបតី ហ៊ុន ម៉ាណែត បានថ្លែងអំណរគុណដល់អាជ្ញាធរពាក់ព័ន្ធទាំងថ្នាក់ជាតិ និងក្រោមជាតិ កងកម្លាំង ព្រះសង្ឃ ប្រជាពលរដ្ឋគ្រប់រូប ដែលបានរួមគ្នារៀបចំព្រឹត្តិការណ៍បុណ្យចូលឆ្នាំថ្មីបានល្អប្រសើរ។

សម្ដេចធិបតី មានប្រសាសន៍ថា៖ “ខ្ញុំសូមអរគុណដល់គ្រប់ស្ថាប័នជាតិ កងឯកភាពថ្នាក់ជាតិ ថ្នាក់ក្រោមជាតិ អាជ្ញាធររាជធានីខេត្ត ស្រុកក្រុងខណ្ឌ ឃុំសង្កាត់ ព្រះចៅអធិការវត្ត គណៈគ្រប់គ្រង ជាពិសេស កងកម្លាំងប្រដាប់អាវុធទាំង៣ ប្រទេស មាននគរបាល អាវុធហត្ថ កងទ័ព ដែលចូលរួមថែរក្សាសន្ដិសុខ សុវត្ថិភាព។ នេះជាកិច្ចការចម្បង នៃការយកចិត្តទុកដាក់ធំរបស់រាជរដ្ឋាភិបាលកម្ពុជា គឺសន្តិសុខសណ្ដាប់ធ្នាប់នេះ ដែលយើងឃើញ ការប្រារព្ធពិធីចូលឆ្នាំប៉ុន្មានថ្ងៃនេះ ប្រព្រឹត្តទៅបានល្អ”។

ជាចុងក្រោយ សម្ដេចធិបតី ហ៊ុន ម៉ាណែត បានអរគុណសាលារាជធានីភ្នំពេញ ដែលបានរៀបចំរថយន្តក្រុងជាង ៤០០ គ្រឿង ជូនប្រជាពលរដ្ឋទៅតាមបណ្ដាខេត្តដោយមិនគិតថ្លៃ ដោយមានប្រជាពលរដ្ឋធ្វើដំណើរជាង ៧ម៉ឺននាក់។ ជាមួយគ្នានេះ ក៏មានផ្ដល់ជូនទឹកសុទ្ធ និងភេសជ្ជៈជូនអ្នកដំណើរថែមទៀត៕