ព័ត៌មានជាតិ

រាជរដ្ឋាភិបាល នឹងពង្រីកវិសាលភាពផ្តល់ប្រាក់ឧបត្ថម្ភស្ត្រីមានផ្ទៃពោះ និងកុមារអាយុក្រោម ២ ឆ្នាំ ដល់នគរបាល និងយោធិនជានារី

បានផុស

១ year មុន

នៅ

ថ្ងៃសុក្រ ១៩ មេសា ២០២៤

ដោយ

រាជរដ្ឋាភិបាល នឹងពង្រីកវិសាលភាពកម្មវិធីផ្តល់ប្រាក់ឧបត្ថម្ភសម្រាប់ស្ត្រីមានផ្ទៃពោះ និងកុមារអាយុក្រោម ២ ឆ្នាំ ដល់នគរបាល និងយោធិនជានារី ដើម្បីចូលរួមលើកស្ទួយដល់ជីវភាពរស់នៅរបស់ពួកគេកាន់តែប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការពង្រីកវិសាលភាពកម្មវិធីផ្តល់ប្រាក់ឧបត្ថម្ភសម្រាប់ស្ត្រីមានផ្ទៃពោះ និងកុមារអាយុក្រោម ២ ឆ្នាំ ដល់នគរបាល និងយោធិនជានារី ត្រូវបានលើកយកមកពិភាក្សាក្នុងកិច្ចប្រជុំមួយ កាលពីរសៀលថ្ងៃទី ១៨ មេសា រវាងអគ្គលេខាធិការដ្ឋានក្រុមប្រឹក្សាជាតិគាំពារសង្គម ជាមួយនឹង ប.ស.ស នៅទីស្ដីការក្រសួងសេដ្ឋកិច្ច និងហិរញ្ញវត្ថុ ក្រោមការដឹកនាំដោយផ្ទាល់របស់ លោក យោគ សាមឌី អគ្គលេខាធិការរង នៃអគ្គលេខាធិការក្រុមប្រឹក្សាជាតិគាំពារសង្គម។

បើតាមលោកបណ្ឌិត ហេង សុផាន់ណារិទ្ធ អគ្គនាយករង ប.ស.ស តំណាងលោក ម៉េង ហុង អគ្គនាយក ប.ស.ស ស្ដីទី នៃក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ការពង្រីកវិសាលភាព នៃកម្មវិធីផ្តល់ប្រាក់ឧបត្ថម្ភរបស់រាជរដ្ឋាភិបាលសម្រាប់ស្ត្រីមានផ្ទៃពោះ និងកុមារអាយុក្រោម ២ ឆ្នាំ ដល់នគរបាល និងយោធិនជានារី ត្រូវបានអគ្គលេខាធិការដ្ឋានក្រុមប្រឹក្សាជាតិគាំពារសង្គម បើកកិច្ចប្រជុំពិភាក្សាម្តងរួចមកហើយ កាលពីខែធ្នូ ឆ្នាំ ២០២៣ កន្លងទៅ ហើយនៅរសៀលថ្ងៃទី ១៨ ខែមេសា ឆ្នាំ ២០២៤ បានបើកកិច្ចប្រជុំបន្តដើម្បីពិភាក្សាលម្អិត និងឱ្យបានស៊ីជម្រៅបន្ថែមទៀត ដើម្បីធ្វើរបាយការណ៍គោរពឆ្លងថ្នាក់ដឹកនាំដើម្បីចាត់នីតិវិធីបន្ត។

លោកបណ្ឌិត បានបន្តថា កិច្ចប្រជុំដើម្បីពិភាក្សា និងផ្ដល់នូវធាតុចូលសំខាន់ៗ បន្ថែម ពាក់ព័ន្ធនឹងការអនុវត្តការងារប្រចាំរបស់ ប.ស.ស ដើម្បីឱ្យការពង្រីកវិសាលទៅដល់នគរបាល និងយោធិនជានារី ដែលជាបុគ្គលពុំទាន់មានចែងនៅក្នុងប្រកាសអន្តរក្រសួងលេខ ២៥២/២៣ កប/ប្រក, ប.ស.ស ចុះថ្ងៃទី ២១ ខែសីហា ឆ្នាំ ២០២៣ ស្ដីពីការអនុវត្តកម្មវិធីផ្ដល់ប្រាក់ឧបត្ថម្ភរបស់រាជរដ្ឋាភិបាល សម្រាប់សមាជិក ប.ស.ស ជាស្ត្រីមានផ្ទៃពោះ និងកុមារអាយុក្រោម ២ (ពីរ) ឆ្នាំ មានប្រសិទ្ធភាព និងតម្លាភាព។

កម្មវិធីផ្តល់ប្រាក់ឧបត្ថម្ភសម្រាប់ស្ត្រីមានផ្ទៃពោះ និងកុមារអាយុក្រោម ២ ឆ្នាំ ត្រូវបានរាជរដ្ឋាភិបាលផ្តល់ជូនកម្មករ-និយោជិតស្ត្រីមានផ្ទៃពោះ និងកុមារក្រោមអាយុ ២ ឆ្នាំ ក្នុងនោះមុនពេលសម្រាលកូន កម្មករ-និយោជិតស្ត្រីមានផ្ទៃពោះ ទទួលបានប្រាក់ឧបត្ថម្ភចំនួន ៤ លើក ដោយ ១ លើក ទទួលបានថវិកា ៨ ម៉ឺនរៀល។ ពេលសម្រាលកូន ទទួលបានប្រាក់ឧបត្ថម្ភដោយកូន ១ ទទួលបានថវិកា ៨០ ម៉ឺនរៀល កូនភ្លោះពីរ ទទួលបាន ១ លាន ២ សែនរៀល និងកូនភ្លោះបី ទទួលបាន ១ លាន ៦ សែនរៀល និងទទួលបានការឧបត្ថម្ភពិសេសបន្ថែមពី សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ចំនួន ៥ លានរៀល ទៀតផងដែរ។ ក្រោយពេលសម្រាលកូន កម្មករ-និយោជិតស្ត្រីមានផ្ទៃពោះ ទទួលបានប្រាក់ឧបត្ថម្ភចំនួន ១០ លើក ដោយ ១ លើកទទួលបាន ៨ ម៉ឺនរៀល ក្នុងនោះ ៣ លើក នៅពេលទៅទទួលសេវាពិនិត្យសុខភាព ក្រោយពេលសម្រាលកូន និង ៧ លើកទៀត នៅពេលយកកូនទៅទទួលថ្នាំបង្ការរហូតដល់អាយុ ២ ឆ្នាំ៕

អត្ថបទ ៖ សំអឿន