ព័ត៌មានជាតិ

ប្រើប្រាស់ ម៉ាស៊ីន ៣ ប្រភេទ តាមដានគុណភាពការដ្ឋានស្ថាបនាផ្លូវជាតិលេខ ៤៨

បានផុស

២ years មុន

នៅ

ថ្ងៃចន្ទ ២២ មេសា ២០២៤

ដោយ

វឌ្ឍនភាពគម្រោងលើកកម្រិតគុណភាពផ្លូវជាតិលេខ ៤៨ (ស្រែអំបិល-កោះកុង) សម្រេចបាន ៥២.១២%។ ខណៈដំណើរការស្ថាបនាសម្រេចបានលទ្ធផលជាច្រើនភាគរយ ក្រសួងសាធារណការនិងដឹកជញ្ជូន កំពុងជំរុញឲ្យក្រុមហ៊ុនទទួលបន្ទុកសាងសង់ឈានទៅសម្រេចឱ្យបាន ៦០% នៅត្រឹមខែមិថុនា ឆ្នាំ២០២៤ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សូរ វ៉ិចទ័រ ប្រធានគម្រោងផ្លូវជាតិលេខ ៤៨ បានបញ្ជាក់ថា គម្រោងលើកកម្រិតគុណភាពផ្លូវជាតិលេខ ៤៨ បំបែកពីផ្លូវជាតិលេខ ៤ រហូតដល់ក្រុងខេមរភូមិន្ទខេត្តកោះកុង ដែលមានប្រវែងសរុប ១៤៨ គីឡូម៉ែត្រ កំពុងមមាញឹកក្នុងការអ៊ុត AC ជាបន្តបន្ទាប់។

ដើម្បីធានាគុណភាពស្តង់ដាបច្ចេកទេសលើគម្រោងសាងសង់ផ្លូវមួយខ្សែនេះ លោក សូរ វ៉ិចទ័រ បានបញ្ជាក់ថា មានការតាមដានត្រួតពិនិត្យជាដំណាក់ៗ ជាមួយការប្រើប្រាស់ឧបករណ៍សម្រាប់ត្រួតពិនិត្យមានដូចជាៈ ម៉ាស៊ីន FWD ប្រភេទធំ ម៉ាស៊ីន LWD ប្រភេទតូច និងម៉ាស៊ីនត្រួតពិនិត្យ Nuclear។

បើតាមមន្រ្តីក្រសួងសាធារណការនិងដឹកជញ្ជូន រាល់ការពិនិត្យត្រូវមានលក្ខណៈហ្មត់ចត់ លទ្ធផលខ្ពស់ជាងស្តង់ដារកំណត់ និងមានទិន្នន័យតាមដានទាំងអស់ទាំងកាលបរិច្ឆេទនិងចំណុចដែលបានត្រួតពិនិត្យ។

កំណាត់ផ្លូវជាតិលេខ ៤៨ ប្រវែង ១៤៨ គីឡូម៉ែត្រ តម្រូវឱ្យមានការបន្ថែមទៅលើប្លង់ដើមការងារ (Variation Order) ដែលមានកិច្ចការជាច្រើនក្នុងនោះដូចជាពង្រីកទំហំផ្លូវ ២ គន្លង ពី ១១ ម៉ែត្រ ទៅ ១៣ ម៉ែត្រ កាត់ចំណោតភ្នំបន្ថែម កាត់បន្ថយចំណោតផ្លូវបន្ថែម ពង្រីកពី ២ គន្លង ទៅ ៤ គន្លង នៅ PK84 ជាដើម។

លោក សូរ វ៉ិចទ័រ បានបញ្ជាក់ថា ទន្ទឹមនឹងវឌ្ឍនភាព គម្រោងក៏ជួបភាពយឺតយ៉ាវខ្លះបណ្តាលមកពីជំងឺកូវីដ-១៩ និងកត្តាភូមិសាស្ត្រ ខណៈដែលតំបន់នោះនារដូវវស្សាមានភ្លៀងធ្លាក់ខ្លាំងរយៈពេល ៦ ខែក្នុងមួយឆ្នាំ ដូច្នេះរយៈពេលនៃការអនុវត្តការងារមានពេលតែ ៦ ខែប៉ុណ្ណោះ៕