ឯកឧត្តម ហ៊ុន ម៉ានិត៖ ការគាំទ្រកងទ័ពជួរមុខពីអ្នកខាងក្រោយ មិនអាចកាត់ផ្តាច់គ្នាបានឡើយ

ឧត្តមសេនីយ៍ឯក ហ៊ុន ម៉ានិត អគ្គនាយកនៃអគ្គនាយកដ្ឋានស្រាវជ្រាវចារកិច្ច នៃក្រសួងការពារជាតិ និងជាមេបញ្ជាការ​រងកងទ័ពជើងគោក​ បានលើកឡើងថា ការគាំទ្រដល់កងទ័ពជួរមុខពីសំណាក់អ្នកខាងក្រោយ គឺមិនអាចកាត់ផ្តាច់ពីគ្នាបានទេ។

ការលើកឡើងនេះ គ្រាដែលឯកឧត្តមឧត្តមសេនីយ៍ឯក ហ៊ុន ម៉ានិត អញ្ជើញជាអធិបតីក្នុងពិធីចងសម្ព័ន្ធមេត្រីភាពរវាងសភាពាណិជ្ជកម្មកម្ពុជា ជាមួយកងពលតូចអន្តរាគមន៍លេខ៨ កាលពីថ្ងៃទី១ ខែឧសភា ឆ្នាំ២០២៤។ ក្នុងឱកាសនោះ ឧត្តមសេនីយ៍ឯក ហ៊ុន ម៉ានិត បានថ្លែងថា ការងារចងសម្ព័ន្ធមេត្រីភាពនេះ បានបង្ហាញពីសិល្បៈនៃវប្បធម៌ចែករំលែកពីគ្រប់មជ្ឈដ្ឋាន ជាពិសេសអង្គភាពស្ថាប័នស៊ីវិល និងក្រុមហ៊ុនឯកជន នៅសមរភូមិក្រោយ ដើម្បីគាំទ្រលើកទឹកចិត្តទាំងសម្ភារ និងកម្លាំងកាយចិត្តដល់កងទ័ពជួរមុខ ដែលបានលះបង់ពលី និងបូជាសព្វសារពើ ការពារបូរណភាពដែនដី ជាតិមាតុភូមិ។

ឧត្តមសេនីយ៍ឯក ហ៊ុន ម៉ានិត ចាត់ទុកថា ការគាំទ្រដល់កងទ័ពជួរមុខពីសំណាក់អ្នកខាងក្រោយ គឺមិនអាចកាត់ផ្តាច់ពីគ្នាបានទេ ដែលនេះហើយជាការពង្រឹងស្មារតីសាមគ្គីភាព ជាពិសេសស្មារតីស្នេហាជាតិ ចូលរួមជាមួយរាជរដ្ឋាភិបាលក្នុងការកសាងពង្រឹងលើខឿនការពារជាតិ និងការអភិវឌ្ឍកងយោធពលខេមរភូមិន្ទ។

ឧត្តមសេនីយ៍ឯក មេបញ្ជាការរងកងទ័ពជើងគោក បានសង្កត់ធ្ងន់ថា ដោយសារកត្តាសុខសន្តិភាព និងស្ថិរភាពនៅតាមបណ្តោយព្រំដែន បានផ្តល់ឱកាសឱ្យយើងទាំងអស់ចូលរួមអភិវឌ្ឍលើគ្រប់វិស័យ ជំរុញកំណើនសេដ្ឋកិច្ច និងលើកស្ទួយជីវភាពប្រជាជន។ ដូច្នេះ ឧត្តមសេនីយ៍ឯក ហ៊ុន ម៉ានិត បានលើកឡើងយ៉ាងដូច្នេះថា៖ «យើងនឹងបន្តចាប់ដៃគ្នា កៀកស្មាគ្នា បន្តចូលរួមគាំទ្រជាបន្តបន្ទាប់ទៀត ដើម្បីថែរក្សាការពារសុខសន្តិភាព ស្ថិរភាពសង្គម បូរណភាពទឹកដី ចូលរួមអភិវឌ្ឍប្រកបដោយចីរភាព»៕