ព័ត៌មានជាតិ

រដ្ឋបាលខេត្តត្រៀមក្រាលកៅស៊ូផ្លូវ១ខ្សែប្រវែងជិត១២គីឡូម៉ែត្រដែលបានខូចខាតដោយទឹកជំនន់

បានផុស

៤ years មុន

នៅ

ថ្ងៃពុធ ២៤ កុម្ភៈ ២០២១

ដោយ

កាលពីរសៀលថ្ងៃទី២៣ ខែកុម្ភៈ ឆ្នាំ២០២១ លោក ងួន រតនៈ អភិបាលខេត្តបាត់ដំបងបានដឹកនាំមន្ត្រីនៃមន្ទីរជំនាញពាក់ព័ន្ធរួមមាន មន្ទីរសាធារណៈការ, មន្ទីរអភិវឌ្ឍជនបទ និងមន្ទីរធនធានទឹកដើម្បីចុះពិនិត្យមើលផ្លូវលំមួយខ្សែដែលខូចខាតដោយទឹកជំនន់មានប្រវែងប្រមាណ១១,៥០០ម៉ែត្រស្មើនិង១១គីឡូម៉ែត្រកន្លះ ស្ថិតក្នុងឃុំព្រែកហ្លួង ស្រុកឯកភ្នំ ខេត្តបាត់ដំបង ដែលបច្ចុប្បន្នកំពុងដំណើរការក្នុងការឈូសឆាយពង្រីកកែលម្អរឡើងវិញ និងមានក្រាលកៅស៊ូផង។ ដែលគម្រោងនេះរដ្ឋបាលខេត្តបានធ្វើឡើងតាមសំណើរសំណូមពររបស់ប្រជាពលរដ្ឋនៅទីនោះដើម្បីបម្រើដល់ផលប្រយោជន៍ប្រជាពលរដ្ឋក្នុងការធ្វើដំណើរប្រាស្រ័យទំនាក់ទំនងគ្នា និងសម្រួលដល់ការដឹកជញ្ជូនកសិផលទៅកាន់ទីផ្សារផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះដែរលោកអភិបាលខេត្តរួមនឹងមន្ត្រីពាក់ព័ន្ធក៏បានបន្តពិនិត្យមើលស្ពានអូរព្រែកអំបិលមួយកន្លែងដែលស្ពាននេះបានតភ្ជាប់សម្រាប់២ភូមិមានភូមិបាក់រទេះ និងភូមិដូនឥន្ទស្ថិតក្នុងឃុំព្រែកហ្លួង ស្រុកឯកភ្នំដើម្បីសាងសង់ទ្វារទឹកផងដែរសម្រាប់ការពារកុំឲ្យដំណាំស្រូវប្រមាណជិត២០០០ហិកតាជនលិចទឹកខូចខាតនារដូវវស្សាខាងមុខដោយក្នុងឱកាសនោះក៏មានពលរដ្ឋជាច្រើនបានចូលរួមផងដែរ។

ឆ្លៀតក្នុងឱកាសនេះដែរ លោកអភិបាលខេត្តក៏បានផ្ដាំផ្ញើដល់អាជ្ញាធរស្រុកឃុំត្រូវបន្តផ្សព្វផ្សាយអប់រំដល់ប្រជាពលរដ្ឋក្នុងសហគមន៍ទាំងអស់ឲ្យចូលរួមអនុវត្តនូវវិធានការការពាររបស់ក្រសួងសុខាភិបាលក្នុងការទប់ស្កាត់មេរោគកូវីដ១៩ និងផ្សព្វផ្សាយនូវសារជាអនុសាសន៍របស់សម្តេចតេជោប្រមុខរាជរដ្ឋាភិបាលជាមួយនឹងការផ្ទុះរីករាលដាលជំងឺកូវីដ១៩ដល់សហគមន៍ ក្នុងព្រឹត្តិការសហគមន៍២០កុម្ភៈ ដែលមិនទាន់មានការថមថយនៅឡើយ។

ជាពិសេសផ្សព្វផ្សាយឲ្យបងប្អូនប្រជាពលរដ្ឋទាំងអស់បន្តចូលរួមទប់ស្កាត់និងការពារការរីករាលដាលនៃជំងឺកូវីដ១៩តាមរយៈការបន្តអនុវត្តវិធានការរបស់សម្តេចអគ្គមហាសេនាបតីតេជោ ហ៊ុនសែន ដែលមានខ្លឹមសារដូចខាងក្រោមនេះ ៣ការពារមាន ១,ពាក់ម៉ាស់ ២,លាងដៃ៣,គម្លាតសុវត្ថិភាពសង្គមនិងគម្លាតសុវត្ថិភាពបុគ្គល។ ចំណែក៣កុំមាន ១,កុំចូលទៅកន្លែងបិទជិតគ្មានខ្យល់ចេញចូល និងកុំប្រើម៉ាស៊ីនត្រជាក់ច្រើនពេករកកន្លែងមានខ្យល់ចេញចូល ២,កុំទៅកន្លែងមនុស្សច្រើនកុះករ៣,កុំប៉ះពាល់គ្នាកុំចាប់ដៃគ្នាកុំកៀកស្មាគ្នាកុំឱបគ្នាជាដើម។

លោកអភិបាលខេត្តក៏បានដាស់តឿនដល់បងប្អូនប្រជាពលរដ្ឋផងដែរថា បើសិនជាប្រជាពលរដ្ឋដែលមានបងប្អូនកូនក្មួយបានវិលត្រឡប់មកពីប្រទេសថៃ ហើយគេចវេះមិនចូលរួមធ្វើចត្តាឡីស័កសូមរាយការណ៍ឲ្យអាជ្ញាធរឬសមត្ថកិច្ចជាបន្ទាន់។ បើមិនដូច្នោះទេពលករនោះត្រូវប្រឈមមុខច្បាប់ដោយការផាកពិន័យជាសាច់ប្រាក់ធ្ងន់ធ្ងរចាប់ពី១លានរៀលទៅ៥លានរៀលហើយអ្នកផ្សំគំនិតដឹក

ជញ្ជូនពលករគេចពីកន្លែងធ្វើចត្តាឡីស័កក៏ត្រូវផាកពិន័យពី៥លានទៅ១០លានរៀលផងដែរ៕

អត្ថបទ ៖ សៅ សារិទ្ធ