ខែក្រោយ សម្ដេចធិបតី នឹងទៅទាក់ម៉ូយនៅសិង្ហបុរី ដើម្បីឱ្យមករកស៊ីនៅកម្ពុជា

សម្ដេ​ចធិបតី ហ៊ុន ម៉ាណែត​ នាយករដ្ឋមន្ត្រីកម្ពុជា បានថ្លែងថា នៅខែមិថុនា ឆ្នាំ២០២៤នេះ សម្ដេចនឹងទៅទាក់ម៉ូយ ទាក់ទាញវិនិយោគិនឱ្យមករកស៊ីនៅកម្ពុជា ក្នុងឱកាសបំពេញទស្សនកិច្ចផ្លូវការនៅប្រទេសសិង្ហបុរី។ សម្ដេចធិបតី បានថ្លែងបែបនេះ នៅក្នុងឱកាសអញ្ជើញជាអធិបតីភាព ប្រកាសបើកឱ្យដំណើរការជាផ្លូវការសមាគម សហព័ន្ធអ្នកវិនិយោគកម្ពុជា និងពិសាអាហារសាមគ្គីនៅថ្ងៃទី០៩ ខែឧសភា ឆ្នាំ២០២៤។

សម្ដេចធិបតី បានបន្តអះអាងថា អាទិភាពធំរបស់រដ្ឋាភិបាលនីតិកាលទី៧ គឺជាការទាក់ទាញ ការជំរុញវិនិយោគិនបរទេសឱ្យមករកស៊ីនៅកម្ពុជា ហើយស្ថិតនៅក្នុងនយោបាយការទូតរបស់កម្ពុជា។

ក្នុងពិធីដដែល សម្ដេចធិបតី បានអះអាងថា កាលពីពេលកន្លងទៅ ក្នុងពេលបិទសន្និបាតក្រសួងការបទេសសម្ដេចបានណែនាំឱ្យមន្ត្រីការទូតរបស់កម្ពុជា រាជរដ្ឋាភិបាលបានដាក់ទិសដៅអាទិភាពទៅលើការទូតសេដ្ឋកិច្ចជាអាទិភាពធំសម្រាប់ការងារក្រៅ។ សម្ដេចបានអះអាងទៀតថា កិច្ចការងារនេះ សម្ដេចផ្ទាល់បានធ្វើ ហើយមន្ត្រីនៃរដ្ឋាភិបាលក៏បានធ្វើច្រើន។

ចំពោះមូលហេតុដែលរាជរដ្ឋាភិបាលកំណត់យកការទូតសេដ្ឋកិច្ចជាអាទិភាពសំខាន់ សម្ដេចធិបតី បានពន្យល់ថាការទូតសេដ្ឋកិច្ចនឹងជួយពង្រឹងទំនាក់ទំនងរវាងរដ្ឋនិងរដ្ឋ តាមរយៈការលើកស្ទួយពាណិជ្ជកម្ម ហើយការទូតសេដ្ឋកិច្ច ក៏នឹងជួយពង្រឹងនូ​វទំនាក់ទំនងរវាងមនុស្ស និងមនុស្ស ដែលជាទំនាក់ទំនងសំខាន់។

នាយករដ្ឋមន្រ្តីកម្ពុជា គូសបញ្ជាក់ថា ទំនាក់ទំនងធុរកិច្ចមិនចងភ្ជាប់ជាមួយនយោបាយឡើយ ផ្ទុយពីការទូត យោធា ដែលភ្ជាប់ជាមួយនយោបាយ។ សម្ដេចបានបន្ថែមថា ក្នុងករណីការទូតមានបញ្ហា ទំនាក់ទំនងសេដ្ឋកិច្ច និងសេដ្ឋកិច្ច អាចទប់លំនឹងប្រទេសទាំងពីរ មិនឱ្យមានបញ្ហាអ្វីដែលធ្ងន់ធ្ងរខ្លាំង ព្រោះបើប្រទេសទាំងពីរប្រឈមគ្នាខ្លាំង នោះនឹងប៉ះពាល់ដល់សេដ្ឋកិច្ចប្រជាជននៃប្រទេសទាំងពីរ តាមរយៈវិនិយោគិនទាំងពីរប្រទេសដែលរកស៊ីនៅក្នុងប្រទេសនីមួយៗ។

គួរជម្រាបជូនបន្តិចថា មុននឹងទៅទាក់ម៉ូយនៅសិង្ហបុរីឱ្យមករកស៊ីនៅកម្ពុជា សម្ដេចធិបតី ហ៊ុន ម៉ាណែត នឹងត្រូវទៅទាក់ម៉ូយនៅប្រទេសកូរ៉េខាងត្បូងឱ្យមករកស៊ីនៅកម្ពុជា ដែលសម្ដេចនឹងអញ្ជើញធ្វើដំណើរចេញពីកម្ពុជានៅសប្ដាហ៍ក្រោយ៕