ព័ត៌មានជាតិ

អ្នកនាំពាក្យ ៖ ដើមឆ្នាំនេះ មានគ្រឹះស្ថានឧត្ដមសិក្សាឯកជន ៤ បន្ថែមទៀត បានស្នើសុំបង្កើតថ្មី

បានផុស

២ years មុន

នៅ

ថ្ងៃពុធ ២៩ ឧសភា ២០២៤

ដោយ

លោក កាន់ ពុទ្ធី អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅរសៀលថ្ងៃទី ២៩ ឧសភា នេះថា នៅដើមឆ្នាំ ២០២៤ នេះ មានគ្រឹះស្ថានឧត្ដមសិក្សាឯកជនចំនួន ៤ បន្ថែមទៀត បានស្នើសុំបង្កើតថ្មីដែលធ្វើឱ្យចំនួនគ្រឹះស្ថានឧត្តមសិក្សាឯកជនកើនឡើងដល់ជាង ១១០ សាលា។

លោកបានបន្តថា ការបង្កើតគ្រឹះស្ថានឧត្តមសិក្សាឯកជនចំនួន ៤ បន្ថែមទៀតនេះ នឹងចូលរួមចំណែកយ៉ាងសំខាន់ក្នុងការលើកកម្ពស់គុណភាពអប់រំ ក៏ដូចជាកសាងធនធានមនុស្សនៅប្រទេសកម្ពុជាកាន់តែប្រសើរថែមទៀត ខណៈឆ្នាំ ២០២៣ កន្លងទៅ ក្រសួងអប់រំ បានផ្តល់អាជ្ញាបណ្ណដល់គ្រឹះស្ថានសិក្សាឯកជនចំនួន ៤១ សាលា។

លោកបានបន្តទៀតថា គិតត្រឹមឆ្នាំ ២០២៣ កន្លងទៅនេះ មានគ្រឹះស្ថានឧត្ដមសិក្សាសរុបចំនួន ១៨៩ ក្នុងនោះគ្រឹះស្ថានឧត្ដមសិក្សាសាធារណៈចំនួន ៧៩ និងគ្រឹះស្ថានឧត្ដមសិក្សាឯកជនចំនួន ១១០ ដោយមាននិស្សិតសរុបចំនួន ២៨៤ ៥៩៩ នាក់ ស្រីមាន ១៤៨ ៧៥៧ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកគ្រឹះស្ថានសិក្សាឯកជន ចាប់ពីកម្រិតមត្តេយ្យសិក្សារហូតដល់មធ្យមសិក្សាចំនួន ២ ១៨០ សាលា នៅទូទាំងប្រទេស ក្នុងនោះមានគ្រឹះស្ថានសិក្សាកម្រិតមត្តេយ្យសិក្សាច្រើនជាងគេរហូតដល់ទៅ ៩០៧ សាលា បឋមសិក្សាមាន ៨៥៨ សាលា អនុវិទ្យាល័យមាន ៩៩ សាលា និងវិទ្យាល័យមាន ៣១៦ សាលា៕

អត្ថបទ ៖ សំអឿន