ខេត្តចំនួន៧ ពុំសូវមានសកម្មភាពក្មេងទំនើង ខណៈខេត្តកណ្តាលសមត្ថកិច្ចឃាត់ក្មេងទំនើងច្រើនជាងគេ

អ្នកនាំពាក្យរងក្រសួងមហាផ្ទៃលោក ទូច សុឃៈ បានឱ្យដឹងថា ក្នុងរយៈពេលមួយសប្តាហ៍ចុងក្រោយនេះ​ សមត្ថកិច្ចចំណុះឱ្យក្រសួងមហាផ្ទៃ បានបង្ក្រាបក្រុមក្មេងទំនើង ៦៨ករណី ឃាត់ខ្លួនជាង ៣០០នាក់ នៅក្នុងរាជធានី-ខេត្ត ចំនួន ១៨ ​។

លោក ទូច សុឃៈ នៅថ្ងៃទី​១១ ខែមិថុនា បានថ្លែងថា គិតពីថ្ងៃទី​៣ ដល់ថ្ងៃទី​៩ ខែមិថុនា ឆ្នាំ ២០២៤ ​កម្លាំងសមត្ថកិច្ច​ចំណុះឱ្យក្រសួង អាជ្ញាធរដែនដី បានប្រតិបត្តិការរួមគ្នាយ៉ាងយកចិត្តទុកដាក់ តាមអនុសាសន៍​របស់នា​យករដ្ឋមន្រ្តី សម្តេចធិបតី ហ៊ុន ម៉ាណែត។ ជាលទ្ធផលក្នុងការបង្ក្រាប ៧ថ្ងៃចុងក្រោយនេះ ​បង្ក្រាបបាន ៦៨ ករណី ឃាត់ក្រុមក្មេងទំនើងបានចំនួន​៣០២​នាក់ ។

លោកបញ្ជាក់ថា សកម្មភាពរបស់ក្រុមក្មេងទំនើងនៅក្នុងរយៈពេលមួយសប្តាហ៍ចុងក្រោយនេះ បានកើតឡើងនៅក្នុងដែនដីនៃរាជធានី​ ខេត្តចំនួន ១៨ ក្នុងនោះរួមមាន ខេត្តកណ្តាល កំពង់ឆ្នាំង ប៉ៃលិន កំពង់ស្ពឺ តាកែវ បន្ទាយមានជ័យ ក្រចេះ ស្វាយរៀង ពោធិ៍សាត់ កំពង់ចាម បាត់ដំបង រតនគិរី មណ្ឌលគិរី ព្រៃវែង ឧត្តរមានជ័យ កំពង់ធំ សៀមរាប និងរាជធានីភ្នំពេញ។ ចំណែក ខេត្តចំនួន ៧ ទៀត រួមមាន កំពត កែប កោះកុង ព្រះវិហារ  សីហនុ ស្ទឹងត្រែង និងខេត្តត្បូងឃ្មុំ មិនមានកើត​ឡើងសកម្មភាព​អវិជ្ជមានរបស់​ក្រុមក្មេងទំនើងនោះទេ។

ក្នុងចំណោមទាំង ១៨រាជធានី ខេត្ត គឺមានរាជធានី ខេត្ត ចំនួន​៤ មានកើតឡើងនូវករណី និងឃាត់ខ្លួនក្រុមក្មេងទំនើង គួរឱ្យកត់សម្គាល់ ដែលក្នុងនោះរាជធានីភ្នំពេញ មាន ១៨ករណី ឃាត់ខ្លួនក្រុមក្មេងទំនើងចំនួន​៣៦នាក់ កណ្តាល ៨ ករណី ឃាត់ខ្លួន ៤១នាក់ កំពង់ស្ពឺ ៦ ករណី ឃាត់៤០នាក់ និងខេត្តតាកែវ ៦ករណី ឃាត់ខ្លួនក្រុមក្មេងទំនើងបាន ៣៥នាក់។

លោកបញ្ជាក់ថា៖«ភាគច្រើនបំផុតនៃក្មេងទំនើងទាំងអស់ គឺសមត្ថកិច្ចកសាងសំណុំរឿង បញ្ជូន​ទៅ​តុលាការ ដើម្បីបន្តនីតិវិធីច្បាប់ ដោយក្នុងនោះតុលាការ បានចោទប្រកាន់ និងឃុំខ្លួនបណ្តោះអាសន្ន»។ លោកគូសរំលេចថា ក្នុងករណីទាំងនេះ បង្ក្រាបបានប្រសិទ្ធភាព ១០០ភាគរយ ពោលកើតឡើង៥ ករណី គឺបង្ក្រាបបានទាំង ៥ករណី​។

កាលពីថ្ងៃទី​២៣​ ខែឧសភា ឆ្នាំ ២០២៤ នាយករដ្ឋមន្រ្តី សម្តេចធិបតី ហ៊ុន ម៉ាណែត បានចេញបញ្ជាឱ្យអភិបាល​រាជធានី ខេត្ត និងសមត្ថកិច្ចគ្រប់ជាន់ថ្នាក់ទូទាំងប្រទេស ត្រូវមានវិធានបង្ក្រាបចំពោះក្មេងទំនើង និងអនុវត្ដន៍ឱ្យបានម៉ឺងម៉ាត់បំផុត។ ការចេញបទបញ្ជានេះ ក្រោយសម្តេចបានសង្កេតឃើញថា មាន​សកម្ម​​ភាព​​ក្មេងទំនើងធ្វើសកម្មភាពកាប់ចាក់គ្នាជាបន្តបន្ទាប់នៅក្នុងរាជធានីភ្នំពេញតាមបណ្តាញ​សង្គម​រហូត​ដល់​ធ្វើឱ្យខូចទ្រព្យសម្បត្តិភាគីម្ខាងទៀតផងដែរ៕

អត្ថបទ៖ ឡាយ សាមាន