អគ្គស្នងការឱ្យលុបបំបាត់រាល់ចំណុចខ្វះខាត​ សំដៅបញ្ចៀសការរិះគន់មិនល្អដល់ស្ថាប័ននគរបាលជាតិ

ដោយកត់សម្គាល់ថា កន្លងទៅ​​ មានមតិរិះគន់មួយចំនួនដល់បុគ្គលជានគរបាលដែលធ្វើឱ្យជះឥទ្ធិពលមិនល្អដល់ស្ថាប័ននគរបាលជាតិទាំងមូល លោកនាយឧត្តមសេនីយ៍ ស ថេត​ អគ្គស្នងការនគរបាលជាតិ​ បានប្រាប់មន្ត្រីនគរបាលត្រូវតែ​លុប​បំបាត់ និងកែប្រែរាល់អ្វីដែលជាចំណុចខ្វះខាតរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ថែមពីនេះ លោកនាយឧត្តមសេនីយ៍ អគ្គស្នងការនគរបាលជាតិ ក៏បានដាក់ចេញការណែនាំមួយចំនួនដែលជាទិសដៅការងារបន្ដទៅកាន់បណ្ដាអង្គភាព នាយកដ្ឋាន មន្ទីរ និងស្នងការដ្ឋាននគរបាលរាជធានី-ខេត្តទាំងអស់ ត្រូវបន្ដផ្ដោតយកចិត្តទុកដាក់ក្នុងការបំពេញការងារ ដើម្បីធានាដល់ប្រសិទ្ធភាពខ្ពស់ ជាពិសេសការទប់ស្កាត់ និងបង្ការបង្រ្កាបបទល្មើសគ្រប់ប្រភេទ ពិសេសករណីគ្រឿងញៀន និងក្មេងទំនើង។

ការលើកឡើងទាំងនេះរបស់លោកនាយឧត្តមសេនីយ៍ ស ថេត ក្នុងឱកាសអញ្ជើញជាអធិបតីពិធីប្រកាសផ្ទេរភារកិច្ច និងតែងតាំងមុខតំណែងនាយនគរបាលថ្នាក់ឧត្តមសេនីយ៍ ព្រមទាំងកិច្ចប្រជុំប្រចាំខែ និងផ្សព្វផ្សាយសភាពការណ៍ថ្មីៗរបស់អគ្គស្នងការដ្ឋាននគរបាលជាតិ កាលពីថ្ងៃទី១៧ ខែមិថុនា ឆ្នាំ២០២៤។

នាយឧត្តមសេនីយ៍ ស ថេត​ ក៏បានណែនាំឱ្យបន្ដពង្រឹងយន្ដការប្រចាំបញ្ជា និងប្រព័ន្ធទូរស័ព្ទទាន់ហេតុការណ៍ ដើម្បីអន្ដរាគមន៍ដោះស្រាយសំណូមពររបស់ប្រជាពលរដ្ឋ ព្រមទាំងថែបំប៉នកម្លាំងអន្ដរាគមន៍ឱ្យបានរឹងមាំ មានវិន័យកងកម្លាំង សំដៅត្រៀមដោះស្រាយហេតុការណ៍ជាយថាហេតុ។ ទន្ទឹមនេះ ត្រូវខិតខំលើកកម្ពស់ប្រសិទ្ធភាពការងាររបស់ក្រុមប្រតិកម្មរហ័ស ដើម្បីឆ្លើយតបនឹងសំណូមពរ ឬមតិរិះគន់របស់សាធារណៈជនបានទាន់ពេលវេលា សំដៅការពារនូវកិត្តិយស និងសេចក្ដីថ្លៃថ្នូររបស់កងកម្លាំងនគរបាលជាតិ៕