ការឆបោកតាមអនឡាញនៅតែជាមុខព្រួញសំខាន់ ដែលលោក ស ថេត ជំរុញឱ្យកម្លាំងនគរបាលបង្កើនការទប់ស្កាត់និងបង្រ្កាប  

នាយឧត្ដមសេនីយ៍ ស ថេត អគ្គស្នងការនគរបាលជាតិ ណែនាំឱ្យកងកម្លាំងនគរបាលជាតិគ្រប់ជាន់ថ្នាក់បង្កើនការតាមដាន ស្រាវជ្រាវ ទប់ស្កាត់ និងបង្រ្កាបឧក្រិដ្ឋកម្មឆ្លងដែនគ្រប់ប្រភេទ រួមទាំងបទល្មើសគ្រឿងញៀន និងឆបោកតាមប្រព័ន្ធបច្ចេកវិទ្យា (Online Scams)។ ការទប់ស្កាត់បានបទល្មើសទាំងនេះ លោក ថា ដើម្បីធានាបានសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ជាពិសេសការទាមទារភាពស្អាតស្អំ និងកិត្តិយសរបស់កម្ពុជាមកវិញ។

លោកនាយឧត្តមសេនីយ៍ ស ថេត បានលើកឡើងនៅក្នុងកិច្ចប្រជុំត្រួតពិនិត្យការងារសន្តិសុខ កាលពីព្រឹកថ្ងៃទី៧ ខែកក្កដា ឆ្នាំ២០២៦នេះថា ស្ថិតក្នុងសម្ពាធនៃការប្រកួតប្រជែងភូមិសាស្រ្តនយោបាយរវាងប្រទេសមហាអំណាច ជាមួយនឹងការបន្តកើតមានអំពើភេរវកម្ម ឧក្រិដ្ឋកម្មឆ្លងដែនគ្រប់ប្រភេទ គួបផ្សំនឹងការប្រើប្រាស់ប្រព័ន្ធបច្ចេកវិទ្យាធ្វើជាមធ្យោបាយប្រព្រឹត្តបទល្មើសនៅលើសកលលោក គឺបានជះឥទ្ធិពលជាអវិជ្ជមានមកលើកម្ពុជា។

ក្នុងន័យនេះ លោក បានសង្កត់ធ្ងន់ពីភាពចាំបាច់នៃការចូលរួមរបស់កងកម្លាំងនគរបាលជាតិដែលទាមទារឱ្យមានការរួមសហការគ្នាដាច់ខាតពុះពារជម្នះឱ្យបាននូវឧបសគ្គនានាដើម្បីថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពជូនប្រជាពលរដ្ឋឱ្យកាន់តែមានប្រសិទ្ធភាពខ្ពស់បំផុត។

លោកអគ្គស្នងការ បានក្រើនរំលឹកដល់មន្រ្តីជំនាញពាក់ព័ន្ធទាំងអស់ត្រូវបង្កើនការយកចិត្តទុកដាក់បន្ថែមទៀតលើបទល្មើសឧក្រិដ្ឋ ដូចជា អំពើឃាតកម្ម ទាំងលើពលរដ្ឋខ្មែរ និងជនបរទេស ការចាប់បង្ខាំងមនុស្ស បទល្មើសជំរិតទារប្រាក់ បទល្មើសគ្រឿងញៀន ជួញដូរមនុស្ស ក្មេងទំនើង ល្បែងស៊ីសងខុសច្បាប់ និងបទល្មើសមិនប្រពៃណី រួមទាំងបទល្មើសសេដ្ឋកិច្ចដែលធ្វើឱ្យប៉ះពាល់ដល់សុខភាពប្រជាពលរដ្ឋក្នុងសង្គម។

បើទោះជាយ៉ាងនេះក្តី នាយឧត្តមសេនីយ៍ ស ថេត ក៏មិនភ្លេចថ្លែងការកោតសរសើរ និងវាយតម្លៃខ្ពស់ ចំពោះកងកម្លាំងនគរបាលគ្រប់លំដាប់ថ្នាក់ ដែលបានខិតខំប្រឹងប្រែងបំពេញតួនាទីភារកិច្ចបានល្អ ដើម្បីសុខសុវត្ថិភាពជូនប្រជាពលរដ្ឋ និងសង្គមជាតិទាំងមូល៕