ព័ត៌មានជាតិ

ចិនចង់ឱ្យអឺរ៉ុបលុបចោលវិធានការបង្កើនពន្ធត្រឹមថ្ងៃ ៤ កក្កដា ខណៈភាគីទាំង២គ្រោងជួបគ្នាពិភាក្សាគ្នា

បានផុស

២ years មុន

នៅ

ថ្ងៃចន្ទ ២៤ មិថុនា ២០២៤

ដោយ

កាសែតរដ្ឋចិន Global Times បានរាយការណ៍នៅថ្ងៃចន្ទនេះថា រដ្ឋាភិបាលចិនចង់ឱ្យសហភាពអឺរ៉ុបលុបចោលវិធានការដំឡើងពន្ធលើរថយន្តអគ្គិសនីនាំចូលពីចិនត្រឹមថ្ងៃទី ៤ ខែកក្កដា ខណៈភាគីទាំង២ព្រមព្រៀងគ្នាសម្រាប់ជំនួបពិភាក្សារកដំណោះស្រាយសារជាថ្មី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Global Times ផ្សាយដោយស្រង់សម្ដីអ្នកសង្កេតការណ៍ថា លទ្ធផលដ៏ល្អបំផុត គឺសហភាពអឺរ៉ុបលុបចោលនូវវិធានការពន្ធរបស់ខ្លួនមុនថ្ងៃទី ៤ កក្កដា ខណៈការបង្កើនគោលនយោបាយការពារនិយមរបស់ប្លុក នឹងបង្កឱ្យមានវិធានការតបត ហើយកំណើនភាពតានតឹងនៃជម្លោះពាណិជ្ជកម្មនឹងនាំទៅរកតែលទ្ធផលចាញ់សម្រាប់ភាគីទាំងសងខាងប៉ុណ្ណោះ។

គួរគូសបញ្ជាក់ថា វិធានការដំឡើងពន្ធលើរថយន្តអគ្គិសនីនាំចូលពីចិនរបស់សហភាពអឺរ៉ុប នឹងចូលជាធរមានជាបណ្ដោះអាសន្ននៅថ្ងៃទី ៤ កក្កដា ខាងមុខ ខណៈប្លុកបន្ដស៊ើបអង្កេតលើករណីរដ្ឋាភិបាលចិនផ្ដល់ឧបត្ថម្ភធនជាសណ្ធឹកដល់ក្រុមហ៊ុនក្នុងស្រុក ដែលអាចឱ្យពួកគេលក់ផលិតផលរបស់ខ្លួនក្នុងតម្លៃថោកជាងលើទីផ្សារបរទេស។

ចិនតែងបដិសេធការចោទប្រកាន់ និងបានជំរុញឱ្យប្លុកអឺរ៉ុបលុបចោលវិធានការ ដោយលើកឡើងផងដែរថា ខ្លួនមិនចង់ប្រឡូកក្នុងសង្រ្គាមពាណិជ្ជកម្មមួយទៀតទេ។

ទោះបីជាភាពតានតឹងបន្តក៏ដោយ រ៉យទ័របានចុះផ្សាយថា ភាគីទាំង២បានយល់ព្រមគ្នាចាប់ផ្តើមកិច្ចចរចាឡើងវិញ បន្ទាប់ពីជំនួបរវាងស្នងការសហភាពអឺរ៉ុបលោក Valdis Dombrovskis និងរដ្ឋមន្ត្រីពាណិជ្ជកម្មចិនកាលពីថ្ងៃសៅរ៍ ក្នុងអំឡុងដំណើរទស្សនកិច្ចទៅកាន់ប្រទេសចិនជាមួយរដ្ឋមន្ត្រីសេដ្ឋកិច្ចអាល្លឺម៉ង់ ដែលបាននិយាយថា ទ្វារសម្រាប់កិច្ចពិភាក្សាគឺបើកចំហ៕