ក្រសួងអប់រំ សហការភាពជាដៃគូ ជាមួយ បណ្តាញសាកលវិទ្យាល័យអាស៊ាន AUN

ក្រុមការងារ នៃអគ្គនាយកដ្ឋានឧត្តមសិក្សា ក្រសួងអប់រំ យុវជន និងកីឡា ដឹកនាំដោយ លោក ម៉ក់ ងយ អគ្គនាយក នៃអគ្គនាយកដ្ឋានឧត្តមសិក្សា បានជួបប្រជុំជាមួយក្រុមការងារ នៃបណ្តាញសាកលវិទ្យាល័យអាស៊ាន ASEAN University Network (AUN) ដែលដឹកនាំដោយ Dr. Choltis Dhirathiti នាយកប្រតិបត្តិ នៃ AUN នៅទីក្រុងបាងកក ប្រទេសថៃ នាថ្ងៃទី៦ ខែកក្កដា ឆ្នាំ២០២៤។

កិច្ចប្រជុំនេះ បានផ្តោតលើកិច្ចសហប្រតិបត្តិការភាពជាដៃគូរវាងអគ្គនាយកដ្ឋានឧត្តមសិក្សា និងបណ្ដាញសាកលវិទ្យាល័យអាស៊ាន លើការកសាងសមត្ថភាព និងការអភិវឌ្ឍប្រព័ន្ធធានាគុណភាពអប់រំផ្ទៃក្នុង នៃឧត្តមសិក្សាកម្ពុជា ឆ្ពោះទៅទទួលបានការទទួលស្គាល់គុណភាពកម្រិតតំបន់ ពី ASEAN University Network-Quality Assurance (AUN-QA)។

ជាលទ្ធផល ក្រុមការងារទាំងពីរបានឯកភាពគ្នាជាចម្បងលើ ផែនការកសាងសមត្ថភាពមន្ត្រីរបស់អគ្គនាយកដ្ឋានឧត្តមសិក្សា និងគ្រឹះស្ថានឧត្តមសិក្សាកម្ពុជាឱ្យមានសមត្ថភាពពេញលេញ ក្នុងការអភិវឌ្ឍ និងប្រតិបត្តិប្រព័ន្ធធានាគុណភាពអប់រំផ្ទៃក្នុង និងការវាយតម្លៃ ការសរសេររបាយការណ៍ស្វ័យវាយតម្លៃកម្រិតកម្មវិធី និងកម្រិតស្ថាប័នឱ្យបានត្រឹមត្រូវ ដើម្បីទទួលបានការវាយតម្លៃ និងការទទួលស្គាល់គុណភាពពី AUN-QA នាពេលខាងមុខ។

ការកសាងសមត្ថភាពឧត្តមសិក្សាកម្ពុជាឱ្យមានគុណភាពកម្រិតតំបន់ និងអន្តរជាតិ ជាការឆ្លើយតបទៅនឹងគោលនយោបាយកំណែទម្រង់របស់ ក្រសួងអប់រំ យុវជន និងកីឡា ក្នុងការបណ្តុះបណ្តាលមូលធនមនុស្ស ចូលរួមចំណែកអភិវឌ្ឍសេដ្ឋកិច្ច-សង្គមកម្ពុជាស្របតាមយុទ្ធសាស្ត្របញ្ជកោណដំណាក់កាលទី១ របស់រាជរដ្ឋាភិបាល៕