អាជ្ញាធរជាតិប្រយុទ្ធប្រឆាំងគ្រឿងញៀន គ្រោងស្នើក្រសួងអ​ប់រំបញ្ចូលបញ្ហាគ្រឿងញៀនក្នុងវិញ្ញាសាប្រឡង

លោក​ឧបនាយករដ្ឋមន្ត្រី នេត សាវឿន បង្ហើបឱ្យដឹងថា អាជ្ញាធរជាតិប្រយុទ្ធប្រឆាំងគ្រឿងញៀន គ្រោងស្នើទៅក្រសួងអប់រំ  ឱ្យសិក្សាអំពីច្បាប់ស្ដីពីការពិនិត្យគ្រឿងញៀន គុណវិបត្តិនៃគ្រឿងញៀន ដើម្បីដាក់បញ្ចូលវិញ្ញាសាអំពីគ្រឿងញៀន ទៅក្នុងការប្រឡងកម្រិតណាមួយ។ លោក នេត សាវឿន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បង្ហើបដូច្នេះ នៅក្នុងពិធី ចុះអនុស្សារណៈនៃការយោគយល់គ្នារវាងអាជ្ញាធរជាតិប្រយុទ្ធប្រឆាំងគ្រឿងញៀន ជាមួយសមាគមសិល្បករខ្មែរ ​ ស្ដីពីកិច្ចសហការពង្រឹង និងលើកកម្ពស់ប្រសិទ្ធភាពការងារផ្សព្វផ្សាយអប់រំអំពីផលប៉ះពាល់និងគ្រោះថ្នាក់នៃគ្រឿងញៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកម្មវិធីដែលធ្វើឡើងនៅថ្ងៃទី០៧ ខែកក្កដា ប្រធានអាជ្ញាធរជាតិប្រយុទ្ធប្រឆាំងគ្រឿងញៀន សង្កត់ធ្ងន់ដូច្នេះ ៖«យើងខ្ញុំ នឹងសំណូមពរទៅក្រសួងអប់រំ យុវជន និងកីឡា ថ្ងៃក្រោយដើម្បីឱ្យសិក្សាពីច្បាប់គ្រឿងញៀន សិក្សាពីផលប៉ះពាល់គ្រឿងញៀន ថ្ងៃក្រោយអាច រឿងគ្រឿងញៀននេះ ដាក់ចូលនៅក្នុងវិញ្ញាសាប្រឡងកម្រិតណាមួយ »។  

នៅចំពោះមុខសមាជិកសមាគមសិល្បករខ្មែរ លោក នេត សាវឿន អំពាវនាវឱ្យភាគីពាក់ព័ន្ធជាពិសេសសិល្បករល្បីៗ ដែលមានកេរ្តិ៍ឈ្មោះ មានឥទ្ធិពលត្រូវជួយផ្សព្វផ្សាយពីកម្មវិធីទូរស័ព្ទដៃ NO DRUG  ទៅកាន់អ្នកគាំទ្រ និងក្រុមគ្រួសារ មិត្តភក្ដិ ជាពិសេសសិស្សនុសិស្ស ឱ្យទាញយកកម្មវិធីនោះប្រើប្រាស់បង្កើនជាចំណេះដឹង ព្រោះកម្មវិធីមួយនេះ មាននូវ​ឯកសារពន្យល់ពីច្បាប់ៗសំខាន់ពាក់ព័ន្ធនឹងបញ្ហាគ្រឿងញៀន វិធានការនៃការបង្ក្រាប និងគ្រោះថ្នាក់បណ្ដាលមកពីការប្រើប្រាស់គ្រឿងញៀន។

ជាការកត់សម្គាល់ ក្រសួងអប់រំ បាននិងកំពុងដាក់បញ្ចូលមេរៀនដែលពាក់ព័ន្ធនឹងបញ្ហាគ្រឿងញៀន សម្រាប់គ្រូបង្រៀនទាំងកម្រិតបឋមសិក្សា និងនៅកម្រិតវិទ្យាល័យ។ ហើយគ្រូបង្រៀន ដែលបង្រៀនមុខវិជ្ជាពាក់ព័ន្ធនឹងគ្រឿងញៀន គឺយកមេរៀនដែលពាក់ព័ន្ធបញ្ហាគ្រឿងញៀន ធ្វើជាវិញ្ញាសាប្រឡងប្រចាំខែ ប្រចាំឆមាសជាដើម៕​

ដោយ៖ ង៉ិល ណារ៉ាត់