មន្រ្តី​ក្រសួងសាធារណការ​ ចុះ​ពិនិត្យ​ដំណើរការ​សាងសង់ផ្លូវ​ជាតិ​លេខ ៧ ពង្រីក ៤ គន្លង ចំណាយ​ថវិកា​ជាង ១០០ លាន​ដុល្លារ

មន្រ្តីក្រសួងសាធារណការ និងដឹកជញ្ជូន បាន​ដឹកនាំក្រុមការងារចុះត្រួតពិនិត្យវឌ្ឍនភាពការងារលើកកម្រិតកំណាត់ផ្លូវជាតិលេខ៧ ចាប់រង្វង់មូលស្គន់ ដល់រង្វង់មូលស្ពានគីហ្សូណា ក្រុងកំពង់ចាម។

លោក លឹម ស៊ីដេនីន រដ្ឋលេខាធិការ​ក្រសួងសាធារណការ និងដឹកជញ្ជូន និងជាប្រធានគ្រប់គ្រងគម្រោងស្ថាបនាផ្លូវជាតិលេខ ៧ (រង្វង់មូលស្គន់ ដល់រង្វង់មូលស្ពានគីហ្សូណា ក្រុងកំពង់ចាម) បានចុះដឹកនាំមន្ត្រីជំនាញបច្ចេកទេស ចុះពិនិត្យការងារសាងសង់ផ្លូវ ការរៀបចំបង្គោលភ្លើង និងតបណ្តាញទីកស្អាតរបស់ក្រុមហ៊ុនម៉ៅការសាងសង់ ឱ្យបានឆាប់រួចរាល់។

ក្នុង​ការ​ចុះ​ពិនិត្យដោយ​ផ្ទាល់ លោក លឹម ស៊ីដេនីន បានណែនាំដល់​មន្រ្តីជំនាញក្រសួង អាជ្ញាធរមូលដ្ឋានពាក់ព័ន្ធ និងក្រុមហ៊ុនម៉ៅការសាងសង់ ចុះត្រួតពិនិត្យវាយតម្លៃនូវផលប៉ះពាល់ ពន្លឿនកិច្ចការចំពោះមុខ និងត្រូវសហការគ្នា ដើម្បីពន្លឿនការសាងសង់កំណាត់ផ្លូវជាតិលេខ៧ ឱ្យសម្រេចទៅតាមកិច្ចសន្យាដែលបានកំណត់។

គម្រោងពង្រីកលើកកម្ពស់កម្រិតគុណភាព ផ្លូវជាតិលេខ ៧ ជាបួនគន្លង ចំណុចចាប់ផ្ដើមពីរង្វង់មូលស្គន់ស្រុកជើងព្រៃ និងចំណុចបញ្ចប់នៅរង្វង់មូលត្រើយខាងលិចស្ពានគីហ្សូណា ក្រុងកំពង់ចាម មានប្រវែងសរុបជាង ៤៥ គីឡូម៉ែត្រ បាន​បើក​ការដ្ឋានសាងសង់កាលពីថ្ងៃទី០៩ ខែមករា ឆ្នាំ២០២៣ ក្រោមអធិបតីភាពសម្ដេចតេជោ ហ៊ុន សែន។

តាមការគ្រោងទុកផ្លូវដែល​ត្រូវ​ស្តារ​និង​ពង្រីក​បន្ថែម​នេះ ប្រើប្រាស់រយៈពេលសាងសង់ចំនួន ៤០ ខែ ​គ្រោង​បញ្ចប់​នៅក្នុងឆ្នាំ២០២៦ ដែលចំណាយថវិកាសរុបជាង ១១៧ លានដុល្លារអាមេរិក ដែលជាឥណទានសម្បទានពីរដ្ឋាភិបាលចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា៕