Breaking News: រកឃើញហើយ! ឧទ្ធម្ភាគចក្រយោធាដែលបាត់កាលពី១៧ ថ្ងៃមុន

ឧទ្ធម្ភាគចក្រយោធាដែលបាត់ដាន កាលពីថ្ងៃទី១២​ ខែកក្កដា​ ត្រូវបានរកឃើញហើយនៅចំណុចលើខ្នងភ្នំយ៉ាវយ៉ៃ ស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់ ក្រោយចំណាយពេលរុករកអស់រយៈពេល១៧ថ្ងៃ។ នេះបើតាមការបញ្ជាក់របស់លោក ឈុំ សុជាត អ្នកនាំពាក្យក្រសួងការពារជាតិ នៅលើទំព័រហ្វេសប៊ុកផ្លូវការ។

លោក ឈុំ សុជាត សរសេរលើទំព័រហ្វេសប៊ុកដូច្នេះ៖«សូមជម្រាបជូនដំណឹងបឋមថា បន្ទាប់ពីបើកប្រតិ​បត្តិការរុករក អស់រយៈពេល១៧ថ្ងៃ នៅថ្ងៃទី២៩ ខែកក្កដា ឆ្នាំ២០២៤នេះ ក្រុមប្រតិបត្តិការរុករកបានប្រទះឃើញឧទ្ធម្ភាគចក្រ ដែលបានបាត់ដំណឹងនៅតំបន់ជួរភ្នំក្រវាញ តាំងពីថ្ងៃទី១២ ខែកក្កដាហើយ។ ឧទ្ធម្ភាគចក្រនេះ ត្រូវបានប្រទះឃើញពីលើអាកាសនៅចំណុចភ្នំយ៉ាវយ៉ៃ ស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់ បន្ទាប់ពីអាកាសធាតុអំណោយផល ខណៈពេលនេះ កម្លាំងថ្មើរជើងកំពុងទៅកាន់ទីនោះ»។

គួរឱ្យដឹងថា តាមផែនការហោះហើររបស់កងទ័ពអាកាសកម្ពុជា គឺ ឧទ្ធម្ភាគចក្រមួយគ្រឿងនេះ​ បានហោះចេញពីរាជធានីភ្នំពេញនៅវេលាម៉ោង១១ ៖០០ នាទីព្រឹក តាមទិសដៅទៅតំបន់ថ្មដា ខេត្តពោធិ៍សាត់ និងគ្រោងត្រឡប់មកភ្នំពេញវិញនៅវេលាម៉ោង២រសៀល។ នៅលើឧទ្ធម្ភាគចក្រនេះ គឺ​មនុស្សចំនួន២នាក់ គឺលោក ស៊ុន ផ្លា​ ប្រធានក្រុមហោះហើរ និងលោក ខេង ឆៃយុទ្ធ ជាអាកាសយានិក។

ដំណើរការរុករកឧទ្ធម្ភាគចក្រនេះ បានចាប់ផ្ដើមភ្លាមៗដោយមិនបង្អង់យូរឡើយពោលគឺនៅ ព្រឹកថ្ងៃទី១៣ ខែកក្កដា ក្រសួងការពារជាតិបានបញ្ជូនកម្លាំងជាបន្តបន្ទាប់ទៅកាន់តំបន់ជួរភ្នំក្រវាញទីដែលឧទ្ធម្ភាចក្របាត់ដាន។ ការរុករកនេះ ធ្វើឡើងជាមួយនឹងកម្លាំងថ្មើរជើងសរុបប្រមាណ១០០០នាក់ រួមជាមួយដ្រូន និងឧទ្ធម្ភាគចក្រ ដើម្បីរុករកពីលើអាកាសបន្ថែមទៀត៕