យន្តការត្រីភាគី ចាប់ផ្ដើមបើកកិច្ចប្រជុំចរចាកំណត់ប្រាក់ឈ្នួលកម្មករ ឆ្នាំ២០២៥

ក្រមប្រឹក្សាជាតិប្រាក់ឈ្នួលអប្បបរមា ចាប់ផ្ដើមបើកកិច្ចប្រជុំចរចាកំណត់ប្រាក់ឈ្នួលអប្បបរមារបស់កម្មករនិយោជិតផ្នែកវាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប សម្រាប់ឆ្នាំ២០២៥។

កិច្ចប្រជុំនេះ រៀបចំឡើងនៅរសៀលថ្ងៃទី១៤ ខែសីហា ឆ្នាំ២០២៤ ក្រោមការដឹកនាំដោយលោក ហេង សួរ រដ្ឋក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា ដោយមានការចូលរួមពីសមាជិកក្រុមប្រឹក្សាជាតិប្រាក់ឈ្នួលអប្បបរមាសរុបចំនួន៥១រូប ដែលមានសមាសភាពពីតំណាងភាគីរាជរដ្ឋាភិបាល តំណាងភាគីកម្មករនិយោជិត និងតំណាងភាគីនិយោជក។

កិច្ចប្រជុំចរចាកំណត់ប្រាក់ឈ្នួលអប្បបរមានេះ ផ្ដោតការពិភាក្សាលើបច្ចុប្បន្នភាពសេដ្ឋកិច្ច និងលក្ខណវិនិច្ឆ័យសម្រាប់ការកំណត់ប្រាក់ឈ្នួលអប្បបរមា ដោយ ប្រើប្រាស់មូលដ្ឋានទិន្នន័យផ្លូវការស្របច្បាប់ និងការស្រាវជ្រាវបែបវិទ្យាសាស្ត្រ។

គួរជម្រាបថា ការកំណត់ប្រាក់ឈ្នួលអប្បបរមាសម្រាប់កម្មករនិយោជិត ត្រូវបានធ្វើឡើងជារៀងរាល់ឆ្នាំតាមរយៈយន្តការត្រីភាគី។ ជាក់ស្ដែង ឆ្នាំ២០២៤ រាជរដ្ឋាភិបាលបានដំឡើងប្រាក់ឈ្នួលអប្បបរមាដល់កម្មករនិយោជិតផ្នែកវាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ចំនួន៤ដុល្លារ ក្នុងនោះ២ដុល្លារអនុម័តដោយត្រីភាគី និង២ដុល្លារទៀតផ្តល់បន្ថែមដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលធ្វើឱ្យប្រាក់ឈ្នួលអប្បបរមារបស់កម្មករនិយោជិតកើនឡើងដល់២០៤ដុល្លារ ក្នុង១ខែ ដោយមិនបូកបញ្ចូលប្រាក់អត្ថប្រយោជន៍ផ្សេងៗទៀតទេ៕

ដោយ៖ ធឿន វ៉ាន់សុង