ព័ត៌មានជាតិ

រដ្ឋាភិបាលផ្ដល់កញ្ចប់លើកទឹកចិត្តពិសេស ជំរុញការវិនិយោគនៅតំបន់ភាគឦសាន

បានផុស

២ years មុន

នៅ

ថ្ងៃសុក្រ ២៣ សីហា ២០២៤

ដោយ

នាយករដ្ឋមន្ត្រីកម្ពុជាបានប្រកាសប្រគល់ភារកិច្ចដល់លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការគោលនយោបាយសេដ្ឋកិច្ច និងហិរញ្ញវត្ថុ ឲ្យរៀបចំកញ្ចប់លើកទឹកចិត្តដើម្បីជំរុញការវិនិយោគនៅតំបន់ខេត្តភាគឦសាន។

ថ្លែងការណ៍បង្ហាញអំពីសមិទ្ធផលរយៈពេល ១ ឆ្នាំ របស់រាជរដ្ឋាភិបាលនីតិកាលទី ៧ នៅយប់ថ្ងៃទី២២ ខែសីហា ឆ្នាំ២០២៤ សម្តេចធិបតី ហ៊ុន ម៉ាណែត បានណែនាំឲ្យរៀបចំធ្វើកិច្ចការនេះឲ្យចប់សព្វគ្រប់នៅចុងឆ្នាំ ២០២៤ និងដាក់ឲ្យដំណើរការនៅឆ្នាំ ២០២៥។

សម្តេចបានលើកពីគោលនយោបាយលើកទឹកចិត្តនេះ ផ្តោតពិសេសលើអ្នកវិនិយោគក្នុងស្រុកឲ្យទៅអភិវឌ្ឍនៅតំបន់ខេត្តនៅភាគឦសាន។

សម្តេចបានបញ្ជាក់ថា ការដាក់ចេញគោលនយោបាយនេះ ដើម្បីឆ្លើយតបទៅកង្វល់របស់ប្រជាពលរដ្ឋ លើការការពារបូរណភាពទឹកដីដែលផ្ដោតសំខាន់លើខេត្តចំនួន ៤ នៅភាគឦសាន។

សម្តេចបានលើកឡើងពីការព្រួយបារម្ភរបស់ពលរដ្ឋ ខ្លាចប្រទេសបាត់បង់អធិបតេយ្យភាព គ្មានពលរដ្ឋរស់នៅ គ្មានការអភិវឌ្ឍ ខ្លាចគ្មានការតភ្ជាប់ ដែលទុកឱកាសប្រទេសផ្សេងត្រួតត្រា។

គោលនយោបាយនេះពាក់ព័ន្ធការលើកទឹកចិត្តការវិនិយោគនៅខេត្តនៅតំបន់ឦសាន ដើម្បីជំរុញកំណើនប្រជាជន និងការអភិវឌ្ឍសេដ្ឋកិច្ចធ្វើឲ្យពលរដ្ឋមានជីវភាពធូរធារ សេដ្ឋកិច្ចកាន់តែរីកចម្រើន ធានាបានភាពម្ចាស់ការរបស់កម្ពុជាក្នុងការអភិវឌ្ឍ ជាមួយការធានាបានសុខសន្តិភាព និងការមិនបែកបាក់ជាតិ។

ជាមួយគ្នានេះ សម្តេចនាយករដ្ឋមន្រ្តីស្នើពលរដ្ឋគ្រប់និន្នាការជឿទុកចិត្តលើរដ្ឋាភិបាល ដែលសម្តេចបានអះអាងថាបុព្វហេតុបម្រើជាតិនិងប្រជាជន ជាគោលដៅធំបំផុតរបស់រដ្ឋាភិបាល។ ប្រមុខរដ្ឋាភិបាលក៏លើកឡើងដែរថា គ្មានអ្នកណាស្រលាញ់ខ្មែរជាងខ្មែរនោះទេ។ សម្តេចបានប្រកាសនឹងបន្តជំរុញការអភិវឌ្ឍសេដ្ឋកិច្ចជាតិមិនថានៅខេត្តទាំង ៤ នៅភាគឦសាន ធ្វើយ៉ាងណាអភិវឌ្ឍជីវភាពរបស់ពលរដ្ឋឲ្យកាន់តែរីកចម្រើន ដើម្បីឈានសម្រេចគោលដៅក្លាយជាប្រទេសអ្នកមាននៅឆ្នាំ ២០៥០៕