ក្រុមហ៊ុនរបស់កូរ៉េ គ្រោងនឹងបើករោងចក្រដំឡើងរថយន្តអគ្គិសនីនៅកម្ពុជា

នៅចំពោះមុខសម្ដេចតេជោ ប្រធានព្រឹទ្ធសភា, អគ្គនាយកក្រុមហ៊ុន Camko Motor និង Camko Infracore  របស់កូរ៉េខាងត្បូង បានបង្ហើបឱ្យដឹងពីគម្រោងចាប់ផ្ដើមបើករោងចក្រដំឡើងរថយន្តអគ្គិសនីនៅកម្ពុជា នាពេលខាងមុខ បន្ទាប់ពីទទួលបានការឯកភាពពីសម្ដេចធិបតីឱ្យក្រុមហ៊ុនពិនិត្យលទ្ធភាពបង្កើតរោងចក្រផលិតរថយន្តអគ្គិសនីនៅកម្ពុជា។

នៅក្នុងឱកាសចូលជួបសម្ដែងគួរសម និងទទួលទានអាហារថ្ងៃត្រង់ការងារជាមួយ សម្ដេចតេជោ ហ៊ុន សែន នាថ្ងៃទី១១ ខែកញ្ញា ឆ្នាំ២០២៤ នៅទីក្រុងសេអ៊ូល ដែលរៀបចំដោយលោក Kim Jin-pyo អតីតប្រធានសភាកូរ៉េខាងត្បូង, លោក Park Joo-bong អគ្គនាយកក្រុមហ៊ុន Camko Motor និង Camko Infracore បានជម្រាបជូនសម្ដេចតេជោ ថា ក្រុមហ៊ុនរបស់លោកសព្វថ្ងៃ បានចាប់ផ្តើមដំណើរការ​​នៅកម្ពុជា និង​មានបំណងបើករោងចក្រដំឡើងរថយន្តនៅកម្ពុជា ពីព្រោះរថយន្តអគ្គិសនីកំពុងពេញនិយមទូទាំងពិភពលោក ជាមួយនឹង​ការប្រើប្រាស់មានការកើនឡើងជាលំដាប់។

លោកអគ្គនាយកក្រុមហ៊ុន Camko Motor ក៏បានបង្ហាញបំណងពង្រីកសកម្មភាពផលិតរបស់ក្រុមហ៊ុនឱ្យកាន់តែធំថែមទៀត ហើយលោក បានសន្យាជាមួយសម្ដេចតេជោថា នឹងខិតខំធ្វើការឱ្យអស់លទ្ធភាព សំដៅសម្រេចគម្រោងនេះឱ្យបានជោគជ័យ ដើម្បីរួមចំណែកក្នុងការអភិវឌ្ឍសេដ្ឋកិច្ចកម្ពុជា ពិសេសប្រែក្លាយកម្ពុជា ជាទីផ្សារផលិតរថយន្តអគ្គិសនី មិនត្រឹមប្រើប្រាស់នៅក្នុងប្រទេសប៉ុណ្ណោះទេ ថែមទាំងសម្រាប់ការនាំចេញទៅបណ្ដាប្រទេសនានាផងដែរ។ តែយ៉ាងណា លោក ក៏បានបញ្ជាក់ពីតម្រូវការចាំបាច់នូវបុគ្គលិកជំនាញ សម្រាប់ដំណើរការរបស់ក្រុមហ៊ុន។

ជំនួបអាហារការងារថ្ងៃត្រង់នេះ លោក Kim Jin-pyo អតីតប្រធានសភាកូរ៉េខាងត្បូង ក៏បានណែនាំជូនសម្ដេចតេជោ នូវប្រធានក្រុមប្រឹក្សាភិបាល​នៃសាកលវិទ្យាល័យពហុបច្ចេកទេសកូរ៉េផងដែរ គឺលោក Charles Lee ។ លោកអតីតប្រធានសភាកូរ៉េ បានបញ្ជាក់ថា ការបង្ហាញនូវប្រធានក្រុមហ៊ុនទាំងពីររូប គឺដោយសារលោកមានបំណងពង្រឹងនិងពង្រីកថែមទៀតនៅផ្នែកសេដ្ឋកិច្ច និងបណ្ដុះបណ្ដាលធនធានមនុស្សរបស់កម្ពុជា ជាពិសេសក្នុងវិស័យបច្ចេកវិទ្យាទំនើប ដោយលោកចង់​ឱ្យពលករកម្ពុជាដែលមកធ្វើការនៅប្រទេសកូរ៉េ ទទួលការហ្វឹកហ្វឺនផ្នែកបច្ចេកវិទ្យា បច្ចេកទេស ដើម្បីពេលវិលត្រឡប់ទៅកម្ពុជាវិញ អាចឱ្យពួកគេយកជំនាញនេះក្នុងការអភិវឌ្ឍឧស្សាហកម្មដំឡើងរថយន្តអគ្គិសនីនៅកម្ពុជា និងផលិតសម្ភារៈសម្រាប់ផលិតរថយន្តដទៃទៀត។

ឆ្លើយតបនឹងការបណ្ដុះបណ្ដាលធនធានមនុស្សរបស់កម្ពុជាលើជំនាញបច្ចេកវិទ្យាទំនើបនេះដែរ លោក Charles Lee ប្រធានក្រុមប្រឹក្សាភិបាល​នៃសាកលវិទ្យាល័យពហុបច្ចេកទេសកូរ៉េ បានបង្ហើបជូនសម្ដេចតេជោ ពីគម្រោងនៃការបង្កើតវិទ្យាស្ថានពហុបច្ចេកទេសមួយនៅកម្ពុជា ដើម្បីហ្វឹកហ្វឺនពលករជំនាញនៅកម្ពុជា។

សម្ដេចតេជោ ប្រធានព្រឹទ្ធសភា បានលើកឡើងថា ពិភពលោកសព្វថ្ងៃងាកទៅរកការប្រើប្រាស់រថយន្តអគ្គិសនី ដែលនឹងរួមចំណែកក្នុងការការពារបរិស្ថាន​ និងអាកាសធាតុ ដែលក្នុងនោះ ថ្វីត្បិតតែនៅកម្ពុជា ចលនានៃការប្រើប្រាស់រថយន្តអគ្គិសនីមិនខ្លាំង តែសម្ដេច សង្ឃឹមថា ទៅអនាគត ការប្រើប្រាស់រថយន្តអគ្គិសនីដែលមានបច្ចេកវិទ្យាទំនើប និងកាត់បន្ថយការចំណាយ ធៀបនឹងការប្រើប្រាស់ប្រេងឥន្ធនៈដែលមានតម្លៃខ្ពស់។

គួរជម្រាបថា​ កាលពីខែឧសភា ឆ្នាំ២០២៤ កន្លងទៅ ក្នុងឱកាសដែលពេលសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មកបំពេញទស្សនកិច្ចនៅប្រទេសកូរ៉េ បានទទួលជួបជាមួយអគ្គនាយកក្រុមហ៊ុន Camko Motor ដោយសម្ដេចធិបតី បានយល់ព្រម និងឯកភាពឱ្យក្រុមហ៊ុននេះធ្វើការសិក្សា និងលើកទឹកចិត្តឱ្យមានការបង្កើតរោងចក្រផលិតរថយន្តអគ្គិសនីនៅកម្ពុជា ដែលនឹងផ្ដល់ឱកាសឱ្យកម្ពុជាជាទីផ្សារមួយ ដែលមិនត្រឹមតែអាចប្រើប្រាស់នៅក្នុងស្រុកប៉ុណ្ណោះទេ ថែមទាំងអាចនាំចេញទៅក្រៅប្រទេសថែមទៀត៕

អត្ថបទ៖ ធឿន វ៉ាន់សុង