Meta ឈ្នះក្ដី ១៦៨ លានដុល្លារ ប្រឆាំងក្រុមហ៊ុនចារកម្មអ៊ិនធឺណិតអ៊ីស្រាអែល NSO

ក្រុមហ៊ុន Meta Platforms ដែលជាក្រុមហ៊ុនមេរបស់វេទិកា Facebook និង WhatsApp បាន​ឈ្នះសំណុំរឿងក្ដី ១៦៨ លាន​ដុល្លារ ប្រឆាំងក្រុមហ៊ុនចារកម្មអ៊ិនធឺណិតរបស់អ៊ីស្រាអែល ​NSO ដោយ​បញ្ចប់ការតតាំងផ្លូវច្បាប់គ្នារយៈពេល ៦ ឆ្នាំ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មែនទែនទៅ Meta បានឈ្នះក្នុងសេចក្តីសម្រេច​កាលពីខែធ្នូ ឆ្នាំមុន រួចទៅហើយ ដែល​សេចក្ដីសម្រេចនោះ​បាន​រកឃើញថា ក្រុមហ៊ុន NSO បាន​ឆ្លៀតឱកាសប្រើចំណុចខ្វះចន្លោះរបស់ WhatsApp ដើម្បីបំពាក់នូវ​ចារកម្មសុសវែរ​លើ​ទូរស័ព្ទរបស់​អ្នកប្រើប្រាស់​។

ជាថ្មីម្ដងទៀតកាលពីថ្ងៃអង្គារ ក្រុមហ៊ុន Meta ​បានប្រកាសថា គណៈវិនិច្ឆ័យតុលាការនៅរដ្ឋកាលីហ្វ័រញ៉ា បានសម្រេចថា NSO ​ត្រូវផ្ដល់សំណងនៃការខូចខាត​ឱ្យក្រុមហ៊ុន Meta ៤៤៤ ៧១៩ ដុល្លារ ​និងបង់ ១៦៧,៣ លាន​ដុល្លារ ​សម្រាប់ការពិន័យទណ្ឌកម្ម។​

Meta បាននិយាយ​ក្នុងសេចក្តីថ្លែងការណ៍មួយថា៖ «សាលក្រម​​ក្នុងករណីរបស់ WhatsApp នៅថ្ងៃនេះ គឺជាជំហានដ៏សំខាន់មួយឆ្ពោះទៅមុខសម្រាប់ភាពឯកជន និងសុវត្ថិភាព ដែលជាជ័យជម្នះលើកដំបូងប្រឆាំងនឹងការអភិវឌ្ឍ​ និងការប្រើប្រាស់ចារកម្មសុសវែរខុសច្បាប់ ដែលគំរាមកំហែងដល់សុវត្ថិភាព និងភាពឯកជនរបស់មនុស្សគ្រប់គ្នា»។

​ក្រុមហ៊ុន NSO ឯណោះវិញ បាននិយាយថា ខ្លួននឹង «ពិនិត្យដោយប្រុងប្រយ័ត្ននូវព័ត៌មានលម្អិតនៃសាលក្រម និងបន្តការដោះស្រាយផ្លូវច្បាប់សមស្រប រួមទាំង​ការប្តឹងឧទ្ធរណ៍»។

បើតាមមេធាវីជាន់ខ្ពស់របស់អង្គការសិទ្ធិមនុស្ស Access Now លោកស្រី Natalia Krapiva ​ក្រុមហ៊ុន NSO ​បាន​ទាញការចាប់អារម្មណ៍ជាសកលជាលើកដំបូងក្នុងឆ្នាំ ២០១៦ បានក្លាយជាឧទាហរណ៍សម្រាប់ ​ឧស្សាហកម្ម​ចារកម្ម ​ក៏ដូចជាការរំលោភបំពាន និងនិទណ្ឌភាព​នៃឧស្សាហកម្ម​នេះ។

យ៉ាងណាមិញ NSO បានប្រកែកជាយូរមកហើយថា កម្មវិធីរបស់ខ្លួនត្រូវបានប្រើដើម្បីតាមដានភេរវករ និង​ពួកស្រឡាញ់អនិតិជន។ ប៉ុន្តែក្រុមហ៊ុននេះ​ត្រូវបានគេរាយការណ៍ថា បានជាប់ពាក់ព័ន្ធក្នុងចារកម្មដោយបំពាន​ក្នុងប្រទេសជុំវិញពិភពលោក រួមមានអារ៉ាប៊ីសាអូឌីត អេស្ប៉ាញ ម៉ិកស៊ិក ប៉ូឡូញ និងអែលសាល់វ៉ាឌ័រ៕