សពទ័ពមួកខៀវកម្ពុជា២រូប កំពុងត្រូវបានបញ្ចូនមកកម្ពុជាតាមយន្តហោះ ដែលនឹងមកដល់មាតុភូមិឆាប់ៗនេះ

សពកងទ័ពមួកខៀវកម្ពុជាពីររូប គឺអនុសេនីយ៍ឯក ដួង មាហ្គាលី និងអនុសេនីយ៍ទោ ផាត មុន្នី ដែលបាត់បង់ជីវិតកាលពីថ្ងៃទី១៣ ខែឧសភា ឆ្នាំ២០២៥ នៅទីក្រុងម៉ាឡាកាល់ ប្រទេសស៊ូដង់ខាងត្បូង ត្រូវបានអ្នកជំនាញបញ្ជូនតាមយន្តហោះកាន់កម្ពុជាវិញហើយ ដែលគ្រោងនឹងមកដល់មាតុភូមិកំណើតក្នុងពេលឆាប់ៗខាងមុខនេះ ដើម្បីប្រារព្ធពិធីបុណ្យតាមប្រពៃណី។ នេះបើតាមសំណេរលើទំព័រហ្វេសប៊ុកឧត្ដមសេនីយ៍ទោ សែម រតនៈ អគ្គនាយករងមជ្ឈមណ្ឌលជាតិរក្សាសន្តិភាព ដែលស្រង់សម្ដីមេបញ្ជាការកងអនុសេនាធំរាជអាវុធហត្ថមួកខៀវកម្ពុជា កញ្ញាវរសេនីយ៍ឯក កែន បុប្ផា ដែលបំពេញបេសកកម្មនៅស៊ូដង់ខាងត្បូងផ្សព្វផ្សាយនៅល្ងាចថ្ងៃសៅរ៍នេះ។

អគ្គនាយករងមជ្ឈមណ្ឌលជាតិរក្សាសន្តិភាព សែម រតនៈ សរសេរលើទំព័រហ្វេសប៊ុកដូច្នេះ៖«សពយោធិនមួកខៀវកម្ពុជាទាំងពីររូបដែលបានពលី កាលពីថ្ងៃទី១៣ ខែឧសភា ឆ្នាំ២០២៥ នៅ ម៉ាឡាកាល់ ប្រទេសស៊ូដង់ខាងត្បួង ត្រូវបានបញ្ជូនតាមយន្តហោះUNឆ្ពោះទៅកាន់ព្រលានយន្តហោះអន្តរជាតិជូបា ដើម្បីបញ្ជូនបន្ត មកកាន់ប្រទេសកម្ពុជាវិញ នាពេលដ៏ខ្លីខាងមុខនេះ។ នេះបើយោងតាមការបញ្ជាក់ពីមេបញ្ជាការកងអនុសេនាធំរាជអាវុធហត្ថមួកខៀវកម្ពុជាលេខ៨៧២ កញ្ញាវរសេនីយ៍ឯក កែន បុប្ផា ក្នុងបេសកកម្មអង្គការសហ ប្រជាជាតិនៅសាធារណរដ្ឋស៊ូដង់ខាងត្បូង នៅថ្ងៃទី២៤ ខែឧសភា ឆ្នាំ២០២៥នេះ។»។

កាលពីថ្ងៃទី២០ ខែឧសភា មេបញ្ជាការប្រចាំតំបន់ភូមិភាគខាងត្បូង, ភូមិភាគខាងលិច , មេបញ្ជាការកងអនុសេនាធំរាជអាវុធហត្ថលេខ៨៧២ និងមេបញ្ជាការតាមបណ្តាប្រទេសដែលឈរជើងនៅក្នុង UN Tomping ទីក្រុង Juba នឹង តំបន់ ម៉ាឡាកាល់ នៃតំបន់បេសកកម្មសាធារណរដ្ឋស៊ូដង់ខាងត្បូង ក៏បានអញ្ជើញចូលរួមគោរពវិញ្ញាណក្ខន្ធអ្នកទាំងពីរ មុននឹងបញ្ជូនសាកសពមកកាន់ប្រទសកំណើតវិញនាថ្ងៃនេះ។

ក្រសួងការពារជាតិកម្ពុជា និងភាគីពាក់ព័ន្ធ មិនបានអត្ថាធិប្បាយលម្អិតអំពីមូលហេតុដែលនាំឱ្យកងទ័ពមួកខៀវទាំងពីររូបនេះ បាត់បង់ជីវិតឡើយ។

ជុំវិញការ​បាត់​បង់យោធិនទាំងពីររូបនេះ សម្ដេចមហាបវរធិបតី នាយឧត្ដមសេនីយ៍ ហ៊ុន ម៉ាណែត នាយករដ្ឋមន្ត្រីកម្ពុជា បានផ្ញើសាររំលែកទុក្ខជូនចំពោះក្រុមគ្រួសារសពផងដែរ។ សម្ដេច ហ៊ុន ម៉ាណែត ចាត់ទុកការបាត់បង់អនុសេនីយ៍ឯក ដួង មាហ្គាលី និងអនុសេនីយ៍ទោ ផាត មុន្នី ថាជាការបាត់បង់នាយទាហានដ៏អង់អាចក្លាហាន ដែលបានលះបង់អស់ពីកម្លាំងកាយ បញ្ញាស្មារតី ស្ម័គ្រចិត្តចាកឆ្ងាយមាតុភូមិកំណើត និងក្រុមគ្រួសារ ជាទីស្រឡាញ់ និងបានធ្វើពលិកម្មគ្រប់បែបយ៉ាង ដើម្បីបុព្វហេតុមនុស្សធម៌អន្តរជាតិ ដែលជាការរួមចំណែក ដ៏ធំធេង ក្នុងការលើកតម្កើងកិត្យានុភាពកម្ពុជានៅលើឆាកអន្តរជាតិ។

ឧប​នាយករដ្ឋមន្ត្រី រដ្ឋមន្ត្ក្រីក្រសួងការពារជាតិ នាយឧត្ដមសេនីយ៍ ទៀ សីហា ក៏បានសម្ដែងការសោកស្ដាយ ចូលរួមរំលែកទុក្ខ និងចាត់ទុកការបាត់យោធិនទាំងពីរ ថាគឺជាការបាត់បង់យោធិនដ៏ឆ្នើមពីររូប ដែលបានធ្វើពលិកម្ម ដើម្បីបុព្វហេតុជាតិមាតុភូមិកម្ពុជា ចូលរួមថែក្សាសន្តិភាព ក្រោមឆត្រអង្គការសហប្រជាតិ និងរួមសុខទុក្ខជាមួយប្រជាជនកម្ពុជារហូតដល់ថ្ងៃអវសាននៃជីវិត។ 

ចាប់ពីឆ្នាំ២០០៦-បច្ចុប្បន្ន កម្ពុជាបានបន្តបញ្ជូនកងទ័ពមួកខៀវចំនួនជិត១ម៉ឺននាក់ ទៅបំពេញបេសកកម្មចំនួន១២ ក្នុងប្រទេសចំនួន១០ មានជាអាទិ៍៖ ស៊ូដង់ ស៊ូដង់ខាងត្បូង លីបង់ ឆាដ សាយប្រឺស ស៊ីរីម៉ាលី អាហ្រិ្វកកណ្តាល យេមែន និងកុងហ្គោ លើជំនាញបោសសំអាតមីន អាវុធហត្ថ ពេទ្យកម្រិត២ កម្ទេចគ្រាប់មិនទាន់ផ្ទុះ វិស្វកម្មព្រលានយន្តហោះ វិស្វកម្មសំណង់ផ្តេក-បញ្ឈរ នាយទាហានសេនាធិការ និងសង្កេតការណ៍។

គិតត្រឹមខែកក្កដា ឆ្នាំ ២០២៤ លោក អាទល់ ខារ៉េ អគ្គលេខាធិការរងអង្គការសហប្រជាជាតិ ទទួលបន្ទុកផ្នែកគាំទ្រប្រតិបត្តិការរក្សាសន្តិភាព ឱ្យដឹងថាកងទ័ពមួកខៀវកម្ពុជាចំនួន១១រូប បានបាត់បង់ជីវិត ក្នុងបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ។ បើគេរាប់បញ្ចូល ទាំងការបាត់បង់ជីវិតរបស់កងទ័ពមួកខៀវចំនួន២ នាខែឧសភា ឆ្នាំ២០២៥ នេះទៀត នោះគឺមានន័យថាចំនួនកងទ័ពមួកខៀវកម្ពុជា ដែលបាត់បង់ជីវិតក្នុងបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ គឺកើនដល់១៣រូបហើយ៕

ដោយ៖ ង៉ិល ណារ៉ាត់