ក្រសួងការងារ រង់​ចាំការ​ផ្តល់​ព័ត៌មាន​លម្អិត​ពី​អង្គការ​សង់ត្រាល់​លើ​ទិន្នន័យ​ដែល​ថា​ពលរដ្ឋ​ខ្មែរ​៤៨នាក់ ចាញ់​បោក​ក្រុម​មេខ្យល់

ភ្នំពេញ ៖ ក្រសួងការងារ និងបណ្ដុះបណ្ដាលវិជ្ជាជីវៈ បានរង់ចាំការផ្ដល់ព័ត៌មានលម្អិតពីមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ ជុំវិញទិន្នន័យដែលថា ពលរដ្ឋខ្មែរចំនួន ៤៨នាក់ក្នុងចំណោម ៣០០នាក់ចាញ់បោកក្រុមមេខ្យល់ទៅធ្វើការនៅសាធារណរដ្ឋកូរ៉េ ដើម្បីជួយសង្រ្គោះជនរងគ្រោះ និងចាត់វិធានការទៅលើជនល្មើសឱ្យបានទាន់ពេលវេលា។

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានថ្លែងថា “ក្រសួងស្វាគមន៍ និងថ្លែងអំណរគុណចំពោះការផ្តល់ព័ត៌មានរបស់អង្គការដៃគូដែលផ្សព្វផ្សាយអំពីជនរងគ្រោះដែលចាញ់បោកមេខ្យល់រឿងសន្យាទៅធ្វើការនៅប្រទេសកូរ៉េ។ ការផ្សព្វផ្សាយនេះ ជាព័ត៌មានជ្រុងមួយសម្រាប់ផ្ទៀងផ្ទាត់​អំពី​កម្រិត​នៃការ​ពិត និង​ពេល​វេលា​ដែល​បាន​កើតឡើងថា ជារឿងចាស់ ឬ ថ្មី ឬ​ជា​រឿង​ប្រភេទ​ណា​មួយ”។

ជា​មួយ​គ្នា​នេះ លោក​បន្ត​ថា​ក្រសួង​នៅរង់ចាំការផ្តល់ព័ត៌មានលម្អិតពីអង្គការដៃគូ​ចំពោះ​ទិន្នន័យ​ដែល​ថា​ ពលរដ្ឋខ្មែរចំនួន៤៨នាក់​ ក្នុង​ចំណោម ៣០០នាក់ ចាញ់​បោក​ក្រុម​មេខ្យល់​សន្យា​ទៅ​ធ្វើការ​នៅប្រទេសកូរ៉េ។

ដោយមានសំណួរ​ជាច្រើនដែលត្រូវចោទសួរស្វែងយល់ដូចជា ប្រភពព័ត៌មានដែលច្បាស់លាស់ អត្តសញ្ញាណ​បងប្អូនទាំង ៤៨រូបមកពីភូមិឃុំណាខ្លះ បុគ្គល​ណា​ដែល​ចេញ​មុខ​បោកប្រាស់ពលរដ្ឋខ្មែរ ហើយម្នាក់ៗចាញ់បោកអស់ប្រាក់ប៉ុន្មាន និង​វឌ្ឍនភាព​នៃការជួយរបស់អង្គការ​ដៃគូ​ដល់ពលរដ្ឋរងគ្រោះជាដើម។

ជាមួយព័ត៌មានទាំងអស់នេះ ក្រសួងការងារ និងបណ្តុះបណ្តាលវិជ្ជាជីវៈ អាជ្ញាធរ និងផ្នែកពាក់ព័ន្ធផ្សេងទៀត អាចវែកមុខ និងស្វែងរកការ​ពិត​ដែល​ឈានដល់ការលុបបំបាត់ ដល់​ឫសគល់​នៃបញ្ហាព្រោះក្រសួងការងារដែលមានលោក​រដ្ឋមន្ត្រីជាអ្នកដឹកនាំ មិន​អនុញ្ញាតឱ្យមានរឿងនេះកើតឡើង ចំពោះពលរដ្ឋខ្មែរស្លូតត្រង់បានឡើយ ហើយក្រសួងមានឆន្ទៈក្នុងការលុបបំបាត់ និងមិនអត់ឱនឱ្យបុគ្គល ក្រុមហ៊ុន សាលាបណ្តុះបណ្តាល សមាគម និងជនឆ្លៀត​ឱកាស​ណា​ម្នាក់រួចខ្លួនក្រៅសំណាញ់ច្បាប់ឡើយ។

លោក​ស៊ុន មេសា សង្ឃឹមថា អង្គការដៃគូនឹងចូលរួមសហការជាមួយក្រសួងប្រកបដោយ តម្លាភាព វិជ្ជាជីវៈនិងការទទួលខុសត្រូវខ្ពស់ដើម្បីរួមគ្នាលុបបំបាត់ឱ្យបាននូវអំពើឆបោកនេះដែលជាបំណងដ៏ពិសិដ្ឋរបស់សម្តេចមហាបវរធិបតីនាយករដ្ឋមន្ត្រីប្រមុខរាជរដ្ឋាភិបាលកម្ពុជា៕