អំណោយ និងម៉ាស១តោនកន្លះរបស់ជំទាវ ម៉ែន សំអន ដើម្បីទប់ស្កាត់ជំងឺកូវីដ-១៩បានទៅដល់រដ្ឋបាលខេត្តស្វាយរៀង

ស្វាយរៀង៖ លោកស្រី ដួង វណ្ណា សមាជិការដ្ឋសភាតំណាងរាស្រ្តខេត្តស្វាយរៀង បានអញ្ជើញទៅទទួលអំណោយរបស់លោកជំទាវ ម៉ែន សំអន ប្រធានសមាគមមិត្តភាពកម្ពុជា-វៀតណាម នៅច្រកទ្វារព្រំដែនអន្តរជាតិបាវិត ក្រុងបាវិត ខេត្តស្វាយរៀង នៅថ្ងៃទី៩ ខែមីនា ឆ្នាំ២០២១នេះ ដើម្បីចូលរួមអនុវត្តការការពារទប់ស្កាត់ការរីករាលដាលជំងឺកូវីដ-១៩។

មន្ត្រីក្រុមការងារដែលបានរួមដំណើរទទួលអំណោយពីសមាគម នៅក្រុងបាវិត បានបញ្ជាក់ឱ្យដឹងថា ម៉ាស ជាជំនួយរបស់សមាគមមិត្តភាពកម្ពុជា-វៀតណាម មានចំនួន ៣០០,០០០ ម៉ាស ដែលគិតជាទម្ងន់ ១តោនកន្លះ សម្រាប់ផ្ដល់ជូនរដ្ឋបាលក្រុង-ស្រុកទាំង៨ និងកងកំលាំងប្រដាប់អាវុធទាំង៣ប្រភេទ មន្ទីរពេទ្យបង្អែកក្រុង-ស្រុកទាំង៨ សម្រាប់ផ្ដល់ជូនមណ្ឌលចត្តាឡីស័ក រដ្ឋបាលឃុំសង្កាត់ទាំង៨០ និងរួមថវិកាចំនួន១០លានរៀល ដើម្បីធ្វើសកម្មភាពទប់ស្កាត់ការរីករាលដាលជំងឺកូវីដ-១៩ ក្នុងខេត្តស្វាយរៀង។

សូមបញ្ជាក់ផងដែរថា ក្រោយពីទទួលបានអំណោយនៅច្រកទ្វារព្រំដែនអន្តរជាតិបាវិតរួចមក លោកស្រី ដួង វណ្ណា តំណាងដ៏ខ្ពង់ខ្ពស់លោកជំេទាវកិត្តិសង្គហបណ្ឌិត ម៉ែន សំអន ប្រធានសមាគមមិត្តភាពកម្ពុជា-វៀតណាម បាននាំយកម៉ាសទាំងអស់នេះដើម្បីទៅចែកជូនដល់រដ្ឋបាលក្រុង-ស្រុក កងកំលាំងប្រដាប់អាវុធទាំង៣ប្រភេទ រួមមានកម្លាំងនគរបាល កម្លាំងកងរាជអាវុធហត្ថ កម្លាំងកងយោធពលខេមរៈភូមិន្ទ មន្ទីរពេទ្យបង្អែក និងរដ្ឋបាលឃុំសង្កាត់ ភ្លាមៗផងដែរ ដើម្បីឱ្យមន្ត្រីទាំងអស់ចាត់ចែងធ្វើសកម្មភាពក្នុងការទប់ស្កាត់ការឆ្លងរីករាលដាលជំងឺកូវីដ-១៩។

ជាមួយគ្នានេះផងដែរលោកជំទាវ ដួង វណ្ណា ក៏បានផ្តាំផ្ញើដល់មន្ត្រីរាជការ កងកម្លាំងប្រដាប់អាវុធទាំងអស់ ត្រូវចូលរួមការពារខ្លួនក៏ដូចជួយបំផុសប្រជាពលរដ្ឋឱ្យអនុវត្តតាមវិធានការ ៣កុំ ៣ការពារ និងវិធានការណែនាំផ្សេងៗរបស់ក្រសួងសុខាភិបាលដើម្បីកុំឱ្យមានការឆ្លងរីករាលដាលជំងឺកូវីដ-១៩ នៅក្នុងខេត្តស្វាយរៀងផងដែរ៕

អត្ថបទ៖ អ៊ុង ភក្ដី